މުޅި ސަރަހައްދުގައި އެމެރިކާއާ ވާގިވެރިވާ ފަރާތްތަކުގެ ކަރަންޓު ކަނޑާލާނެ ކަމުގެ އިންޒާރު އީރާނުން ދީފި
23 ޖުލައި 2026 | ބުރާސްފަތި 05:47އީރާނުގެ އުމްރާނީ ވަސީލަތްތަކަށް އެމެރިކާއިން ހަމަލާދީފިނަމަ، އެ ސަރަހައްދުގައި ތިބި އެމެރިކާގެ ބައިވެރިންގެ ކަރަންޓު ކަނޑާލާނެ ކަމުގެ އިންޒާރު އީރާނުން ދީފި. މި އިންޒާރު ދީފައިވަނީ އީރާނުގެ ބްރިޖުތަކާއި އިންޖީނުގެތަކަށް ބޮން އަޅާނެ ކަމަށް ޑޮނަލްޑް ޓްރަމްޕް ވިދާޅުވުމާ ގުޅިގެން.
އުރުދުންގައި ހުންނަ އެމެރިކާގެ އަސްކަރީ މަރުކަޒަކަށް އީރާނުން ދިން ހަމަލާގެ ވީޑިއޯ. | ސޯޝަލް މީޑިއާ
އީރާނުގެ ބްރިޖުތަކަށް ނުވަތަ އިންޖީނުގެތަކަށް އެމެރިކާއިން އެއްވެސް ހަމަލާއެއް ދީފިނަމަ، އެކަމުގެ ބަދަލު ވަގުތުން ހިފާނެ ކަމަށާއި، މުޅި ސަރަހައްދުގައި ތިބި އެމެރިކާގެ ބައިވެރިންގެ ކަރަންޓު ކަނޑާލާނެ ކަމުގެ އިންޒާރު، އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) ގެ އެއަރޯސްޕޭސް ފޯސްގެ ކޮމާންޑަރު ބްރިގޭޑިއާ ޖެނެރަލް ސައްޔިދު މަޖީދު މޫސަވީ ދެއްވައިފި އެވެ.
ބުދަ ދުވަހު އެކްސްގައި ކުރެއްވި ޕޯސްޓެއްގައި ޖެނެރަލް މޫސަވީ ވިދާޅުވީ، އީރާނުގެ ބްރިޖުތަކާއި އިންޖީނުގެތަކަށް ހަމަލާދީ އުސޫލުތަކާ ޚިލާފުވެއްޖެ ނަމަ، "ކުޑަކުދިން މަރާ މީހުންނަށް" ވާގިވެރިވާ ފަރާތްތަކާއި އެމީހުންނަށް މަރުހަބާ ކިޔާ ގައުމުތަކުން ކަރަންޓު ކެނޑޭނެކަން ކަށަވަރު ކަމަށެވެ.
މި އިންޒާރު ދީފައިވަނީ، ހުރްމުޒް ކަނޑުއޮޅިން ދަތުރުކުރާ އުޅަނދަކަށް އީރާނުން އަމާޒުކޮށްފި ކޮންމެ ފަހަރަކު، އީރާނުގެ "ބްރިޖަކަށް ނުވަތަ އިންޖީނުގެއަކަށް ބޮން އަޅައި ސުންނާފަތި ކުރާނެ" ކަމަށް ބުނެ އެމެރިކާގެ ރައީސް ޑޮނަލްޑް ޓްރަމްޕް އޭނާގެ "ޓްރޫތު ސޯޝަލް" ޕްލެޓްފޯމުގައި އިންޒާރު ދެއްވުމާ ގުޅިގެންނެވެ. ޓްރަމްޕް ވިދާޅުވި ގޮތުގައި މިފަދަ ހަމަލާތައް އަމާޒުކުރާނީ ވެރިރަށް ތެހެރާނުގައި ނުވަތަ ތެހެރާނާ ކައިރީގައި ހުންނަ ވަސީލަތްތަކަށެވެ.
އީރާނުގެ އިންޖީނުގެތަކަށް ނުވަތަ ބްރިޖުތަކަށް އެމެރިކާއިން ދޭ ކޮންމެ ހަމަލާއަކަށް ރައްދު ދިނުމުގެ ގޮތުން، އެ ސަރަހައްދުގެ އުމްރާނީ ވަސީލަތްތަކަށް ހަމަލާދިނުމަށް އީރާނުން ފަސްނުޖެހޭނެ ކަމަށް އަސްކަރީ އިސް މަސްދަރަކުން ތަސްނީމް ނިއުސް އެޖެންސީއަށް ބުނެފައިވެ އެވެ.
އެ މަސްދަރުން ބުނި ގޮތުގައި، އެމެރިކާއިން އީރާނުގެ ބްރިޖަކަށް ނުވަތަ އިންޖީނުގެއަކަށް އަމާޒުކޮށްފި ނަމަ، އީރާނުން ބަދަލުގައި އެ ސަރަހައްދުގައި ހުރި އުމްރާނީ ވަސީލަތްތަކާއި ބްރިޖުތަކުގެ އިތުރުން އެމެރިކާގެ މަސްލަހަތު އޮތް ހަކަތައިގެ ވަސީލަތްތަކަށް ހަމަލާދޭނެ އެވެ.
ފެބްރުއަރީ 28 ވަނަ ދުވަހު އީރާނާ ދެކޮޅަށް އެމެރިކާ އާއި އިސްރާއީލުން ފެށި ޣައިރު ގާނޫނީ އުދުވާނީ ހަނގުރާމައަށް ފަސް މަސް ފުރެން ކައިރިވެފައިވާއިރު، މަސްރަހު ވަނީ ވަރަށް ބޮޑަށް ނުތަނަވަސްވެފަ އެވެ.
އެމެރިކާއިން ދަނީ ވިދިވިދިގެން 12 ރޭ ވަންދެން އީރާނަށް ހަމަލާތައް ދެމުންނެވެ. މި ހަމަލާތައް މައިގަނޑު ގޮތެއްގައި އަމާޒުކޮށްފައިވަނީ އެ ގައުމުގެ ދެކުނު އައްސޭރިފަށަށާއި ހުރްމުޒް ކަނޑުއޮޅި ކައިރީގައިވާ ސަރަހައްދުތަކަށެވެ.
އީރާނުން ދަނީ ކޮންމެ ދުވަހަކުވެސް މިސައިލާއި ޑްރޯން ބޭނުންކޮށްގެން ޕާޝިއަން ގަލްފް ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށާއި ވަސީލަތްތަކަށް ހަމަލާދެމުންނެވެ. މީގެ އިތުރުން އީރާނުން ވަނީ ހުރްމުޒް ކަނޑުއޮޅި ވެސް އަމަލީގޮތުން ބަންދުކޮށްފަ އެވެ.
