ފަސާދައިގެ ދޮރުތައް ބަންދުކޮށް، މީސްތަކުންގެ ލެޔާއި އަބުރު ރައްކާތެރި ކުރުމުގެ މަސައްކަތް ކުރުމަށް ޚުތުބާގައި ގޮވާލައިފި

ފަސާދައިގެ ދޮރުތައް ބަންދުކޮށް، އަމާން މުޖުތަމައެއް ބިނާ ކުރުމުގެ މަސައްކަތް ކުރުމަށް ހުކުރު ޚުތުބާގައި ގޮވާލައިފި އެވެ.

''ހެޔޮ ކަންތަކަށް އަމުރުކުރުމާއި މުންކަރާތްތައް ނަހީކުރުން'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ވަނީ މާތް ﷲގެ ހެޔޮ ރަހުމަތްފުޅުން އިސްލާމްދީނުގެ ހިދާޔަތުގެ މަތީގައި ފައިތިލަ ސާބިތުކޮށްގެން ގަރުނުތަކެއްވަންދެން ދެމިތިބިކަން ފާހަގަކޮށްފަ އެވެ.

ޚުތުބާގައި ބުނީ، އަހަރެމެންގެ ތެރޭގައި އޮންނަނީ އެއްބައިވަންތަ ކަމާއި އެކަކު އަނެކަކަށް އިޙުތިރާމްކުރުމާއި ލޮބުވެތިކަމާއި އަމާނާތްތެރިކަމާއި މަކާރިމުލްއަޚްލާގުގެ ރިވެތި ސިފަތައް ކަމަށެވެ. މިކަންކަމަކީ އަބަދުވެސް ދަމަހަންޓާން ޖެހޭނޭ ކަންކަން ކަމަށެވެ. ނަމަވެސް މިއަދު ގައުމުގެ އިޖުތިމާއީ އަދި އަހުލާގީ ފޭރާމަށް ބަލާއިރު ރަނގަޅުކުރާންޖެހޭ ބައެއްކަންތައް އެބަހުރި ކަމަށް ޚުތުބާގައި ބުންޏެވެ. އަދި ވަކީން ޚާއްޞަކޮށް މާތް ﷲ ހުރުމަތްތެރި ކުރައްވައިފައިވާ، މީސްތަކުންގެ ލެޔާއި، މުދަލާއި، އަބުރު ރައްކާތެރިކުރުމަށް ޓަކައި މަސައްކަތްތަކެއް ކުރަން ޖެހިފައިވާ ކަމަށް ޚުޠުބާގައި ބުނެފައިވެ އެވެ.

ޚުޠުބާގައި ބުނީ، މިފަދަ ކަންކަން ރަނގަޅު ކުރެވޭނީ ހެޔޮ ކަންތައްތަކަށް އަމުރުކޮށް ނުބައިކަންތައްތައް ނަހީކުރުމުގެ އިޖުތިމާއީ  މަސްއޫލިއްޔަތު ދަމަހައްޓައިގެން ކަމަށެވެ. 

ކޮންމެ ފަރުދަކު ވެސް، ހެޔޮ ކަންކަމަށް އަމުރުކޮށް ނުބައި ކަންކަން ނަހީކުރުމުގައި ފަރުދީ ޒިންމާ އަދާކުރާން ޖެހެއެވެ. އެ މީހަކަށް ކުޅަދާނަވީ މިންވަރަކުންނެވެ. މި ކަމަށް އިޝާރާތްކުރައްވައި، ކީރިތި ރަސޫލާ مُحَمَّدُ صَلَّى اللهُ عَلَيْهِ وَسَلَّمَ ޙަދީޘްކުރައްވައިފައި ވެ އެވެ. (مَنْ رَأَى مِنْكُمْ مُنْكَرًا فَلْيُغَيِّرْهُ بِيَدِهِ، فَإِن لَّـمْ يَسْتَطِعْ فَبِلِسَانِهِ، فَإِن لَّـمْ يَسْتَطِعْ فَبِقَلْبِهِ، وَذَلِكَ أَضْعَفُ الْإِيـْمَانِ[1] މާނައީ: "ތިޔަބައިމީހުން ކުރެ މީހަކަށް މުންކަރާތެއް ފެނިއްޖެ ނަމަ، ފަހެ އެ މީހެއްގެ އަތުން އެ ކަން މަނާކުރާށެވެ! އަތުން މަނާކުރުމުގެ ކުޅަދާނަކަން ނުލިބުނު މީހާ، ދުލުން އެ ކަން މަނާކުރާށެވެ! ދުލުން މަނާކުރުމުގެ ކުޅަދާނަކަން ނުލިބުނު މީހާ ހިތުން އެ ކަމަށް އިންކާރުކުރާށެވެ! މިއީ އީމާންކަމުގެ އެންމެ ދަށު ދަރަޖައެވެ." شَيْخُ الْإِسْلَام اِبْنُ تَيْمِيَّة - رَحِمَهُ اللهُ – ވިދާޅުވިއެވެ. "މާތް ﷲއާއި އެކަލާނގެ ރަސޫލާ مُحَمَّدُ صَلَّى اللهُ عَلَيْهِ وَسَلَّمَ z ޙަރާމްކުރައްވައިފައިވާ މުންކަރާތްތަކުގެ ތެރޭގައި ހިމެނޭ ކުފުރާއި، ފާސިޤުކަމާއި، އުރެދުމުގެ ޢަމަލުތަކަށް، ރުހިގެން ހުންނަމީހާގެ ހިތުގައި، މާތް ﷲ އޭނާ ގެ މައްޗަށް ވާޖިބުކުރެއްވި އީމާންކަމެއް ނުވެއެވެ.  

ހުކުރު ޚުތުބާ

ޚުތުބާގައި ބުނީ، މުޖުތަމައު ރަނގަޅު މުޖުތަމައަކަށް ނުވަތަ ނުބައި މުޖުތަމައަކަށް ބަދަލުކުރަނީ އަހަރެމެން އަމިއްލައަށް ކަމަށެވެ. މުޖުތަމައު އިސްލާހުކުރާން ތިބީ ވެސް ހަމަ އަހަރެމެން ކަމަށާއި، އިސްލާހު ކުރާން މަސައްކަތްކުރާހައި ހިނދަކު، މާތް ﷲގެ މަދަދާއި އެހީތެރިކަން އެ ބަޔަކަށް ލިބޭނެ ކަމަށް ޚުތުބާގައި ބުނެފައިވެ އެވެ.

މީގެ އިތުރުން ދުންޔަވީ އެދުންތަކާއި ފަސާދައިގެ މަގުތައް ބަންދުކޮށް، ފިތުނައިގެ މަގުތަކަށް ތަބާވާ މީހަކަށް ނުވުމަށް ނަސޭހަތްތެރިވެ، ޚުޠުބާގައި ވަނީ ފިތުނައިގެ އަލިފާންގަނޑަށް ދަރުއަޅާ މީހަކަށް ނުވުމަށް ވެސް ގޮވާލާފަ އެވެ. 

ޚުޠުބާގައި ބުނީ، މާތް ﷲގެ ހަޟުރަތުން ވާގި އެދި ހަރުދަނާ އަހުލާގީ ޖީލެއް ބިނާކުރުމަށް ޓަކައި އެންމެން ގުޅިގެން މަސައްކަތް ކުރަން ޖެހޭ ކަމަށެވެ.

އެގޮތުން މުޖުތަމައުގައި ހުރި، ފަސާދައިގެ ދޮރުތައް ބަންދުކޮށް، މި މުޖުތަމައަކީ އަމާން މުޖުތަމައެއް ކަމުގައި ހެދުމަށް މަސައްކަތް ކުރަންޖެހޭ ކަމަށާއި، ކޮންމެ މީހަކުވެސް އެ މީހެއްގެ ފަރުދީ ޒިންމާ ފުރިހަމަގޮތުގައި އަދާ ކުރުމަށް ޚުތުބާގައި ނަސޭހަތްތެރިވެފައިވެ އެވެ. އަދި ގައުމުގެ ދީނީ އިލްމުވެރީން މީސްތަކުންނަށް ހެޔޮ ނަސޭހަތާއި އިރުޝާދު ދޭން ޖެހޭ ކަމަށާއި، މުޖުތަމައުގައި ތިބި މަސްއޫލުވެރިންނާއި ކަމުވޮށިގެންވާ މީހުން ގައުމުގެ މަސްލަހަތު އިސް ކުރުމަށް ޚުތުބާގައި ބާރުއަޅާފައިވެ އެވެ. މީގެ އިތުރުން މައިންބަފައިން އެ މީހުންގެ ދަރީން ހެޔޮ ގޮތުގައި ތަރުބިޔަތުކޮށް، މުދައްރިސުންނާއި އެދުރުން އެ މީހުންގެ ޒިންމާއަދާކޮށް، ނަމޫނާ ބަޔަކަށް ވުމަށް ޚުތުބާގައި ގޮވާލާފައިވެ އެވެ.