އިސްލާމީ އުސޫލުތަކާ އެއްގޮތަށް އަޟްޙާ އީދު ފާހަގަ ކުރުމަށް ޚުތުބާގައި ގޮވާލައިފި

ހައްޖުގެ މަތިވެރި އަޅުކަމާ ވިދިގެން އަންނަނީ އަޟުޙާ އީދު ކަމަށާއި، އިސްލާމީ އުސޫލުތަކާ އެއްގޮތަށް އީދު ފާހަގަ ކުރަން ޖެހޭ ކަމަށް ހުކުރު ޚުތުބާގައި ބުނެފި އެވެ. 

''ހައްޖުގެ އަޅުކަމުން ލިބޭ ފިލާވަޅުތައް'' މިމައުޟޫއަށް މުޅި ރާއްޖެއަށް އިއްވި ޚުތުބާގައި ވަނީ ހައްޖުގެ އަޅުކަމާއި، ހައްޖުވެރިޔާގެ އަމަލުތައް ބަހައްޓަންވީ ގޮތް ވަރަށް ތަފްސީލު ކޮށް ކިޔައިދީފަ އެވެ. އަދި ހައްޖުގެ އަޅުކަމުގައި މާތް الله ލައްވައިފައިވާ ޝަޢީރާތަކުން ކަށަވަރުވެ އެނގޭ އެއް ހަގީގަތަކީ ހައްޖަކީ އިންސާނާގެ ދުންޔަވީ ހަޔާތުގެ ކުޑަކުޑަ ދަތުރެއްކަން ފާހަގަކޮށްފައިވެ އެވެ 

އެގޮތުން ހައްޖުވެރިޔާ އިޙުރާމް ބަންނަ ވަގުތުން ފެށިގެން އޭނާ އެ ވަނީ އޭނާ ގެ ނަފުސުގެ މައްޗަށް ހައްޖުގެ މަނާސިކުތައް އަދާކުރުން ލާޒިމުކޮށްފައި ކަމަށާއި، ހައްޖުވެރިޔާ އިޙުރާމު ބަންނަ ވަގުތުން ފެށިގެން ދުރުހެލިވާން ޖެހޭ، ކަންތައްތަކެއްވާ ކަމަށް ބަޔާން ކޮށްފައިވެ އެވެ. 

ޚުތުބާގައި ބުނީ، އިޙުރާމް ބަނުމުގެ ކުރީން އޭނާއަށް ހުއްދަވެގެންވީ ކަންތައްތަކެއް އިޙުރާމް ބަނުމުގެ ސަބަބުން ހަރާމް ވާ ކަމަށެވެ. އޭނާ ގެ ނަފުސަށް މި ކަންތައްތައް މަނާކުރެވުނު މީހާއަށް އޭނާ ގެ ހަޔާތުގެ ރާސްތާގައި މާތް الله ހަރާމްކުރައްވައިފައިވާ ކަންތައްތަކާ ދުރުހެލިވެވޭނެ ކަމަށް ޚުތުބާގައި ބުނެފައިވެ އެވެ.

ހައްޖަކީ އެހެނިހެން އަޅުކަންތަކާ ޚިލާފަށް ވަރަށް ބުރަ އަޅުކަމެއްކަން ފާހަގަކޮށް ޚުތުބާގައި ބުނީ، އެ ކަމުގައި ތިމާގެ ޖާނާއި މުދާ ހޭދަކުރާން ޖެހޭ ކަމަށާއި، އެ ކަމުގައި ދަތުރުފަތުރު ހިމެނޭ ކަމަށެވެ. އަދި ބައިބޯކަމާއި ކާރުބާރު ބޮޑުކަން ހިމެނޭކަން ފާހަގަކޮށްފައިވެ އެވެ. 

ކީރިތި ރަސޫލާ مُحَمَّدُ صَلَّى اللهُ عَلَيْهِ وَسَلَّمَ ޙަދީޘްކުރައްވައިފައި ވެ އެވެ. (مَنْ حَجَّ لِلَّهِ فَلَمْ يَرْفُثْ وَلَـمْ يَفْسُقْ رَجَعَ كَيَوْمِ وَلَدَتْهُ أُمُّهُ) މާނައީ: "ޙައްޖުވުމުގެ ތެރޭގައި ޖިމާޢުވުމެއް، އުރެދުމެއް ނެތި، މާތް اللهގެ ވަޖުހުފުޅު އަދައި، ޙައްޖުވެއްޖެ މީހާ، މައިމީހާގެ ބަނޑުން އޭނާ އުފަންވީ ދުވަހެކޭ އެއްފަދައިން އެނބުރި އަތުވެއްޖެއެވެ." އެ ފަދަ ޙައްޖެއްގެ ޖަޒާއެއްކަމުގައި ސުވަރުގެ މެނުވީ ނުވެއެވެ. އެފަދަ މީހާއަށް މާތް الله އެ ވަނީ މަބުރޫރު ޙައްޖެއް ދެއްވައިފައެވެ. ކީރިތި ރަސޫލާ مُحَمَّدُ صَلَّى اللهُ عَلَيْهِ وَسَلَّمَ ޙަދީޘްކުރައްވައިފައި ވެ އެވެ. (...وَالْحَجُّ الْمَبْرُوْرُ لَيْسَ لَهُ جَزَاءٌ إِلَّا الْجَنَّةُ) މާނައީ: "... އަދި މަބުރޫރު ޙައްޖެއްގެ ޖަޒާއެއްކަމުގައި ސުވަރުގެ މެނުވީ ނުވެއެވެ."  

ހުކުރު ޚުތުބާ 

މީގެ އިތުރުން ޚުތުބާގައި ވަނީ ހައްޖުގެ އަޅުކަން އަދާކުރުމަށް ފަހު ތިމާގެ ދިރިއުޅުމަށް މަސައްކަތްކުރުމާއެކު ރަހިމުގެ ގުޅުމާއި އެކުވެރިކަމާއި އެއްބައިވަންތަކަމާއި އާއިލީގުޅުން ދެމެހެއްޓުމަށް މަސައްކަތްކުރާ މީހެއްގެ ގޮތުގައި އުޅުމަށް ގޮވާލާފަ އެވެ. އަދި ހައްޖުގެ މަތިވެރި އަޅުކަމާ ވިދިގެން އަންނަނީ އަޟްޙާ އީދުކަން ފާހަގަކޮށް ޚުތުބާގައި ވަނީ އީދުގެ އުފާ ފާޅުކުރާ އިރު އިސްލާމީ އުސޫލުތަކާއި ޝަރުއީ ހަމަތައް ހިފެހެއްޓުމަށް ނަސޭހަތްތެރިވެފަ އެވެ.