އދ.ގެ ސެކްރެޓަރީ ޖެނެރަލްގެ މަޤާމަށް ވާދަކުރައްވާ 6 ކެންޑިޑޭޓުންގެ މައުލޫމާތު އާންމުކޮށްފި

އެކުވެނިވި ދައުލަތްތައް (އދ.) ގެ މިހާރުގެ ސެކްރެޓަރީ ޖެނެރަލް އެންޓޯނިއޯ ގުޓެރޭޒްގެ ދައުރު ހަމަވުމުން، މި މަޤާމަށް ވާދަކުރައްވާ 6 ކެންޑިޑޭޓުންގެ މައުލޫމާތު ހާމަކޮށްފި އެވެ.

މި ރޭހުގައި ވާދަކުރައްވާ 6 ކެންޑިޑޭޓުންނަކީ ވެސް ބައިނަލްއަޤްވާމީ ދާއިރާގައި ގިނަ ދުވަސްތަކެއް ވަންދެން ޚިދުމަތް ކުރައްވާފައިވާ، ތަޖުރިބާކާރު ސިއްކަވެރިންނާއި ސިޔާސީ ބޭފުޅުންނެވެ.

އެގޮތުން އެ މަޤާމަށް ވާދަކުރައްވާ ކެންޑިޑޭޓުންނަކީ

1- ރަފައެލް ގްރޮސީ (އާޖެންޓީނާ): އިންޓަނޭޝަނަލް އެޓޮމިކް އެނާޖީ އޭޖެންސީ (އައިއޭއީއޭ) ގެ މިހާރުގެ ޑިރެކްޓަރު ޖެނެރަލް އެވެ. ގްރޮސީއަކީ އާޖެންޓީނާގެ ތަޖުރިބާކާރު ޑިޕްލޮމެޓެކެވެ.

2- މިޝެލް ބަޗެލެޓް (ޗިލީ): ޗިލީގެ ކުރީގެ ރައީސާ. އޭނާއަކީ 'ޔޫއެން ވިމެން' ގެ ފުރަތަމަ އެގްޒެކެޓިވް ޑިރެކްޓަރުގެ އިތުރުން 2022 ވަނަ އަހަރާ ހަމައަށް އދ.ގެ އިންސާނީ ޙައްޤުތަކާ ބެހޭ ހައިކޮމިޝަނަރުގެ މަޤާމު ވެސް ފުރައްވާފައިވާ ބޭފުޅެކެވެ.

3- މެކީ ސާލް (ސެނެގާލް): 2024 ވަނަ އަހަރާ ހަމައަށް ސެނެގާލްގެ ރައީސްކަން ކުރެއްވި މެކީ ސާލްއަކީ މި ފަހަރުގެ އިންތިޚާބުގައި އެފްރިކާ ބައްރުން ވާދަކުރައްވާ ހަމައެކަނި ކެންޑިޑޭޓެވެ.

4- ރެބެކާ ގްރީންސްޕޭން (ކޮސްޓަރީކާ): އދ.ގެ ޓްރޭޑް އެންޑް ޑިވެލޮޕްމަންޓް އިދާރާގެ ސެކްރެޓަރީ ޖެނެރަލްގެ މަޤާމުން ޗުއްޓީ ނަންގަވައިގެން ވާދަކުރައްވާ އިޤްތިޞާދީ މާހިރެކެވެ.

5- މާރިއާ ފެރްނާންޑާ އެސްޕިނޯސާ (އެކުއެޑޯ): އެކުއެޑޯ ސަރުކާރުގެ އިސް މަޤާމުތަކެއް ފުރައްވާފައިވާ އަދި 2018 އިން 2019 އަށް އދ.ގެ އާންމު މަޖިލީހުގެ ރިއާސަތު ބެލެހެއްޓެވި ބޭފުޅެކެވެ.

6- ކެރޮލިން ރޮޑްރިގޭޒް-ބާކެޓް (ގުޔާނާ): އދ.އަށް ގުޔާނާއިން ކަނޑައަޅާފައި ހުންނަވާ ދާއިމީ މަންދޫބު. އުމުރުން 52 އަހަރުގެ ބާކެޓްއަކީ މި ރޭހުގައި ވާދަކުރައްވާ އެންމެ ހަގު ކެންޑިޑޭޓެވެ.

މި ފަހަރުގެ ރޭހުގައި ލެޓިން އެމެރިކާއާއި ކެރިބިއަން ސަރަޙައްދަށް ނިސްބަތްވާ ކެންޑިޑޭޓުން ގިނަ އަދަދަކަށް ހިމެނެނީ، އދ.ގެ ސެކްރެޓަރީ ޖެނެރަލްގެ މަޤާމު ސަރަޙައްދުތަކުގެ މެދުގައި ބަދަލުވަމުންދާ އުޞޫލުން ނުވަތަ ރޮޓޭޝަނަލް އުޞޫލުން، މިފަހަރު އެ ސަރަހައްދަށް ފުރުސަތު ލިބޭތީއެވެ.

އދ.ގެ ސެކްރެޓަރީ ޖެނެރަލްގެ މަޤާމަށް އައު ބޭފުޅަކު އިންތިޚާބު ކުރުމުގެ މަރުހަލާތައް ކުރިއަށްދާއިރު، އައު ސެކްރެޓަރީ ޖެނެރަލް ކަށަވަރުވެގެންދާނީ ސެޕްޓެމްބަރާއި ޑިސެމްބަރު މަހާ ދެމެދުގަ އެވެ.