ސްކޫލްތައް ބަންދުވެ، ފޭލިގެތަކުގައި ދިރިއުޅެން ޖެހިފައިވީ ނަމަވެސް، ޣައްޒާގެ ދަރިވަރުންނަށް މިއީ އިމްތިހާނުގެ ދުވަސްވަރު

އިސްރާއީލުން ޣައްޒާއަށް ދެމުންދާ ހަމަލާތަކުގެ ސަބަބުން ސްކޫލްތައް ބަންދުވެ، ދިރިއުޅުން ފޭލިގެތަކަށް ބަދަލުވެފައިވީ ނަމަވެސް، ފަލަސްތީނުގެ އެތައް ހާސް ދަރިވަރުންނެއް މިއަހަރުގެ ފައިނަލް އިމްތިހާނުތަކުގައި ބައިވެރިވާން ފަށާފައިވާ ކަމަށް ބައިނަލްއަގުވާމީ މީޑިއާތަކުން ރިޕޯޓުކޮށްފިއެވެ. 2023 ގެ އޮކްޓޫބަރު މަހުން ފެށިގެން ކުރިއަށްދާ ހަނގުރާމައިގެ ސަބަބުން ތައުލީމީ ނިޒާމަށް ބޮޑެތި ހުރަސްތަކެއް ކުރިމަތިވެފައިވީ ނަމަވެސް، ކުދިންގެ މުސްތަގުބަލަށްޓަކައި މި އިމްތިހާނުތައް ކުރިއަށް ގެންދިއުމަށް ފަލަސްތީނުގެ ތައުލީމީ ވުޒާރާއިން ވަނީ ނިންމާފައެވެ.

ދާނާ ޝަބާތަށް އޭނާގެ އިމްތިހާނަށް ތައްޔާރުވުމަށްޓަކައި ކިޔަވާނެ ކޮންމެވެސް ތަނެއް ހޯދަން ވަނީ މަޖުބޫރުވެފަ | އަލްޖަޒީރާ

ޣައްޒާގެ އެކި ސަރަހައްދުތަކުގައި ހުރި ސްކޫލް އިމާރާތްތަކުގެ ބޮޑު ބައެއް ހަލާކުވެފައިވާއިރު، ގިނަ އިމާރާތްތަކަކީ މިހާރު ރެފިއުޖީން ދިރިއުޅޭ މަރުކަޒުތަކެވެ. އަލްޖަޒީރާއިން ރިޕޯޓުކޮށްފައިވާ ގޮތުގައި، ދަރިވަރުން އިމްތިހާނަށް ތައްޔާރުވަމުންދަނީ ކަރަންޓާއި ފެނުގެ ހިދުމަތުން މަހުރޫމްވެފައިވާ ފޭލިގެތަކުގައެވެ. ގިނަ ދަރިވަރުންނަށް ފޮތްތަކާއި ކިޔަވާނެ ސާމާނު ލިބުމުގައި ބޮޑެތި ދަތިތަކެއް ހުރި އިރު، ބައެއް ކުދިން އިމްތިހާނަށް ތައްޔާރުވަނީ އެކި މީހުންގެ އަތުން ހޯދާފައިވާ ބާ ފޮތްތަކާއި ނޯޓުތައް ބޭނުންކޮށްގެންނެވެ.

މި ހަނގުރާމައިގައި ޣައްޒާގެ 600،000 އަށްވުރެ ގިނަ ދަރިވަރުންނަށް ތައުލީމުން މަހުރޫމްވެފައިވާ ކަމަށް އދ. ގެ ތަފާސްހިސާބުތަކުން ދައްކައެވެ. މީގެ އިތުރުން، އެތައް ހާސް ދަރިވަރުންނާއި މުދައްރިސުން ހަމަލާތަކުގައި ޝަހީދުވެފައިވާ ކަމަށް އޮފިޝަލުން ބުނެ އެވެ. އިމްތިހާނު ހަދާ މަރުކަޒުތަކުގެ ގޮތުގައި ބޭނުންކުރާ ބައެއް އިމާރާތްތަކަކީވެސް ހަމަލާތަކުގެ ނުރައްކާ އޮތް ތަންތަން ކަމަށްވުމުން، ދަރިވަރުންނާއި ބެލެނިވެރިން ތިބީ ނުތަނަވަސްކަމެއްގެ ތެރޭގައެވެ.

ޣައްޒާގައި ކުރަމުންދާ ހަނގުރާމައިގެ ސަބަބުން ތަޢުލީމީ މަރުކަޒުތަކާއި ސްކޫލްތައް ސުންނާފަތިވެފައިވާތީ، މިއަހަރުގެ އިމްތިހާނުގައި އެތައް ހާސް ދަރިވަރުންނެއް އޮންލައިންކޮށް ބައިވެރިވަމުން އެބަދެ | އަލްޖަޒީރާ

އިމްތިހާނުގައި ބައިވެރިވާ ބައެއް ދަރިވަރުންނާ ހަވާލާދީ ރިޕޯޓުތައް ބުނާ ގޮތުގައި، ކިޔެވުމަށް އެންމެ ބޮޑު ހުރަހަކަށް ވަނީ ނަފްސާނީ ބިރުވެރިކަމާއި ކާބޯތަކެތީގެ ދަތިކަމެވެ. ބަނޑުހައިހޫނުކަމާއި ބޯމަތިން އިވޭ ބޮންގޮވުމުގެ އަޑުތަކުގެ ތެރޭގައި ފިލާވަޅުތަކަށް ސަމާލުކަން ދިނުމަކީ ނުހަނު އުނދަގޫ ކަމެއް ކަމަށް ދަރިވަރުން ބުނެ އެވެ. ނަމަވެސް، މި ހުރިހާ ގޮންޖެހުންތަކާއެކުވެސް އިމްތިހާނުން ފާސްވެ، މަތީ ތައުލީމަށް ވާސިލްވުމަކީ އިސްރާއީލުގެ އުދުވާނާ ދެކޮޅަށް ކުރެވޭނެ މުހިންމު މަސައްކަތެއް ކަމަށް އެ ކުދިން ގަބޫލުކުރެއެވެ.

ފަލަސްތީނުގެ ތައުލީމީ ވުޒާރާއިން ބުނެފައިވަނީ، ޣައްޒާގެ ދަރިވަރުންނަށް އިމްތިހާނު ހެދުމުގެ ފުރުސަތު ދިނުމަކީ އެކުދިންގެ ހައްގުތައް ހިމާޔަތްކުރުމަށް ކުރެވޭ މަސައްކަތެއް ކަމަށެވެ. އަދި ހަނގުރާމައިގެ ސަބަބުން ގެއްލިފައިވާ ތައުލީމީ އަހަރު އިއާދަކުރުމަށްޓަކައި ހާއްސަ ޕްލޭންތަކެއް އެކުލަވާލަމުންދާ ކަމަށްވެސް އެ ވުޒާރާއިން މައުލޫމާތުދެއެވެ. މީގެ އިތުރުން، ޣައްޒާއިން ބޭރަށް ހިޖުރަކޮށްފައިވާ ދަރިވަރުންނަށްވެސް އޮންލައިންކޮށް އިމްތިހާނުގައި ބައިވެރިވުމުގެ އިންތިޒާމުތައް ހަމަޖައްސާފައިވާ ކަމަށް ރިޕޯޓުތައް ބުނެ އެވެ.