ހުރްމުޒް ކަނޑުއޮޅީގެ ހަލަބޮލިކަމުގެ ސަބަބުން ނާޒުކު އިގްތިސާދުތަކަށް ދިގުދެމިގެންދާ ނުރައްކާ ކޮށްފާނެ ކަމުގެ އިންޒާރު އދ. އިން ދީފި

ހުރުމުޒް ކަނޑުއޮޅި އަލުން ހުޅުވާލުމާއެކު ހަކަތައިގެ ބާޒާރަށް ވަގުތީ ލުޔެއް ލިބުނު ނަމަވެސް، ބާޒާރުގައި ކާބޯތަކެއްޗާއި ތެލުގެ އަގު ދިގު މުއްދަތަކަށް އުފުލިފައި ހުރުމުގެ ސަބަބުން ނާޒުކު އިގްތިސާދުތަކަށް އޮތް ނުރައްކާ އަދިވެސް ކުޑައެއް ނުވާ ކަމަށް އދ. ގެ ވިޔަފާރިއާއި ތަރައްގީއާ ބެހޭ އިދާރާއިން އަންގާރަ ދުވަހު ބުނެފި އެވެ.

އދ. ގެ ކޮންފަރެންސް އޮން ޓްރޭޑް އެންޑް ޑިވެލޮޕްމަންޓް (އަންކްޓަޑް) އިން ނެރުނު އާ ރިޕޯޓެއްގައި ބުނެފައިވަނީ، އިސްތިރާތީޖީ ގޮތުން މުހިންމު މި ކަނޑުއޮޅިން ދަތުރުފަތުރު ކުރުމަށް 100 އަށްވުރެ ގިނަ ދުވަސް ވަންދެން ކުރިމަތިވި ބޮޑެތި ހުރަސްތަކާ ގުޅިގެން، މެދުކެނޑިފައިވާ ސަޕްލައި ޗެއިންތައް އަލުން އިއާދަކުރުމަށް ވަގުތު ބޭނުންވާނެ ކަމަށެވެ. އެހެންކަމުން، ހަކަތައިގެ ބާޒާރަށް ވުރެ ކާބޯތަކެއްޗާއި ދަތުރުފަތުރުގެ ނިޒާމުތައް ހަމައަކަށް އެޅުމަށް ނަގާ މުއްދަތު އިތުރުވާނެ ކަމަށް ބެލެވޭ ކަމަށް އެ ރިޕޯޓުގައިވެ އެވެ.

ދުނިޔޭގެ ތެލާއި ގޭހުގެ ސަޕްލައިގެ ގާތްގަނޑަކަށް ފަސްބައިކުޅަ އެއްބައި އާންމުކޮށް އުފުލާ މި ކަނޑުއޮޅީގެ ދަތުރުފަތުރުތައް ހުއްޓުމަކަށް އައީ، ފެބްރުއަރީ މަހުގެ ފަހުކޮޅު އެމެރިކާއާއި އިސްރާއީލުން ގުޅިގެން އީރާނަށް ދިން ހަމަލާތަކާ ގުޅިގެން އުފެދުނު ހަމަނުޖެހުންތަކުގެ ތެރޭގަ އެވެ.

އެމެރިކާއާއި އީރާނާ ދެމެދު ވެވުނު ވަގުތީ އެއްބަސްވުމަށްފަހު، ބްރެންޓް ކްރޫޑް ތެލުގެ އަގު ފީފާއަކަށް 73 ޑޮލަރަށް، ނުވަތަ ހަމަނުޖެހުންތަކުގެ ކުރިން ހުރި މިންވަރަށް ވަރަށް ބޮޑަށް ދަށަށް ގޮސްފައިވީ ނަމަވެސް، ތެލާއި ގޭސް އަދި ގަސްކާނާގެ އަގު ބޮޑުވުމުގެ އަސަރު ދަނޑުވެރިކަމުގެ އުފެއްދުންތަކަށާއި، ދަތުރުފަތުރުގެ ޚަރަދުތަކަށާއި އާއިލާތަކުގެ ބަޖެޓަށް ކުރަމުންދާނެ ކަމަށް އަންކްޓާޑުން ބުނެފައިވެ އެވެ.

ނާޒުކު އިގްތިސާދުތަކަށް ތެލާއި ގަސްކާނާގެ އަގަށް އަންނަ ލޮޅުންތަކުގެ ނުރައްކާ ބޮޑުއިރު، ކާބޯތަކެތީގެ އަގު މަތީގައި ހުރުމުގެ ސަބަބުން ފަގީރު އާއިލާތަކަށް އިތުރު ތަކްލީފުތަކާ ކުރިމަތިވާނެ އެވެ. އަންކްޓަޑުން ހާމަކުރި ގޮތުގައި، ކާބޯތަކެތީގެ އަގު 5 އިންސައްތަ އުފުލުމަކީވެސް ކުޑަކުދިންގެ ސިއްހަތައް ނޭދެވޭ އަސަރު ކުރުމުގެ ނުރައްކާ ވަރަށް ބޮޑަށް އިތުރުވާނެ ކަމެކެވެ.

ހުރްމުޒް ކަނޑުއޮޅީގެ ދަތުރުފަތުރަށް އައި ބުރޫއާ ގުޅިގެން، ތެލާއި ގޮދަން އެތެރެކުރުމުގައި ދަތިތަކާ ކުރިމަތިވެފައިވާ ނާޒުކު 61 އިގްތިސާދެއް އެ އިދާރާއިން ވަނީ ފާހަގަކޮށްފަ އެވެ. 

މިފަދަ ލޮޅުންތަކުން އަރައިގަތުމަށްޓަކައި އެންމެ ބޮޑަށް ނުރައްކަލަށް ހުށަހެޅިފައިވާ ގައުމުތަކަށް ބައިނަލްއަގުވާމީ އެހީތެރިކަން ފޯރުކޮށްދިނުމަށް އަންކްޓަޑުން ވަނީ ގޮވާލާފަ އެވެ.