ޑރ. އަބޫ ސަފިއްޔާއަށް އިސްރާއީލުގެ ޖަލުގައި އަނިޔާކުރާ މައްސަލައިގައި އދ.އިން ކަންބޮޑުވުން ފާޅުކޮށްފި

2024 ވަނަ އަހަރުގެ ޑިސެމްބަރު މަހު އިސްރާއީލު ސިފައިން ގައްޒާއިން ހައްޔަރުކޮށް، އަދިވެސް ބަންދުގައި ހުރި ފަލަސްތީނުގެ މަޝްހޫރު ޑޮކްޓަރަކަށް އަނިޔާކުރަމުންދާ ކަމަށް ލިބޭ ރިޕޯޓުތަކާ ގުޅިގެން އދ. ގެ ތަހުގީގީ އިދާރާއަކުން ބުދަ ދުވަހު ކަންބޮޑުވުން ފާޅުކޮށް، އޭނާ މިނިވަންކުރުމަށް ގޮވާލައިފި އެވެ.

އިރުމަތީ ގުދުސް ހިމެނޭހެން ފަލަސްތީނުގެ އިސްތިއުމާރުކޮށްފައިވާ ސަރަހައްދުތަކާ ބެހޭ އދ. ގެ މިނިވަން ބައިނަލްއަގުވާމީ ކޮމިޝަން އޮފް އިންކުއަރީން ވަނީ، ޣައްޒާގެ ކަމާލް އަދުވާން ހޮސްޕިޓަލުގެ ޑިރެކްޓަރު ޑރ. ހުސާމް އަބޫ ސަފިއްޔާ ވަގުތުން މިނިވަންކުރުމަށް ގޮވާލާފަ އެވެ.

އިސްރާއީލުގެ އިންސާނީ ހައްގުތަކަށް މަސައްކަތްކުރާ ޖަމާއަތެއް ކަމަށްވާ 'ފިޒީޝަންސް ފޯ ހިއުމަން ރައިޓްސް އިސްރާއީލް' އާ ހަވާލާދީ އިންސާނީ ހައްގުތަކަށް މަސައްކަތްކުރާ ޖަމާއަތްތަކުންނާއި އަބޫ ސަފިއްޔާގެ ވަކީލު ވިދާޅުވީ، އެއްވެސް ދައުވާއަކާ ނުލައި ބަންދުކޮށްފައި ހުރި ޑޮކްޓަރުގެ ފުރާނައަށް މިހާރު ނުރައްކާވެފައިވާ ކަމަށެވެ.

އދ. ގެ ތަހުގީގީ އިދާރާއިން ނެރުނު ބަޔާނެއްގައި ބުނެފައިވަނީ، ފަލަސްތީނުގެ ކުށްވެރިންނާ މެދު އިސްރާއީލުގެ ޖަލުތަކާ ބެހޭ އިދާރާގެ ގާޑުން އަމަލުކުރަމުންދާ ގޮތަކީ ބައިނަލްއަގުވާމީ ގާނޫނުތަކާ ހިލާފު، އަދި ބައިނަލްއަގުވާމީ ކުށެއްގެ ގޮތުގައި ބެލެވިދާނެ ފަދަ ނުރައްކާތެރި އަމަލުތަކެއް ކަމަށެވެ. އަދި ޑރ. އަބޫ ސަފިއްޔާގެ ސިއްހީ ހާލަތު ގޯސްވެފައިވަނީ ސީދާ އެ އަމަލުތަކުގެ ސަބަބުން ކަމަށްވެސް އެ ބަޔާނުގައިވެ އެވެ.

އިސްރާއީލުގެ ޕްރިޒަން ސާވިސް (އައި.ޕީ.އެސް) ގެ ތަރުޖަމާނަކު ބުދަ ދުވަހު ބުނީ، އެ އިދާރާއާ މެދު ކުރެވޭ ތުހުމަތުތަކަކީ ދޮގު، ހަގީގަތާ ހިލާފު އަދި އެއްވެސް އަސާސެއް ނެތް ވާހަކަތަކެއް ކަމަށެވެ.

އެ ތަރުޖަމާނު ޑރ. އަބޫ ސަފިއްޔާގެ ނަން ސީދާ ބޭނުންކޮށްފައި ނުވި ނަމަވެސް، އޭނާއާއި އެހެން ޑޮކްޓަރުންނަށް ޖަލުގައި އަނިޔާކުރާ ކަމަށް ކުރެވޭ ތުހުމަތުތައް މީގެ ކުރިންވެސް އައި.ޕީ.އެސް އިން ވަނީ ދޮގުކޮށްފަ އެވެ.

ޑރ. އަބޫ ސަފިއްޔާގެ ސިއްހީ ހާލަތު ނުރައްކަލެއްގެ ތެރޭގައިވާ ކަމަށާއި، ކޮންމެ ދުވަހަކު އޭނާއަށް އަނިޔާކުރަމުންދާ ކަމަށް އޭނާގެ ވަކީލު ހޯމަ ދުވަހު ވަނީ ތުހުމަތުކޮށްފަ އެވެ. މިދިޔަ ޖޫން މަހު ގުދުސްގެ ސުޕްރީމް ކޯޓުގައި ވީޑިއޯ ކޮންފަރެންސް މެދުވެރިކޮށް ބޭއްވި އަޑުއެހުމެއްގައި އަބޫ ސަފިއްޔާ ބައިވެރިވިއިރު، އޭނާގެ މޫނުމަތިންނާއި ހަށިގަނޑުން ވަރަށް ބޮޑަށް ހިކިފައިވާކަން ފާހަގަކުރެވުނެވެ.

އދ. ގެ ތަހުގީގީ އިދާރާއިން ބުނި ގޮތުގައި، އަބޫ ސަފިއްޔާއާ މެދު އިސްރާއީލުގެ ކަމާބެހޭ ފަރާތްތަކުން އަމަލުކުރަމުންދާ ގޮތަކީ، މީގެ ކުރިން ނެރުނު ރިޕޯޓުތަކުގައިވެސް ފާހަގަކޮށްފައިވާ ފަދަ، އިންސާނީ ހައްގުތަކާ ހިލާފުވުމުގެ ފުޅާ ސިޔާސަތެއްގެ ބައެކެވެ.

2023 ވަނަ އަހަރުގެ އޮކްޓޫބަރު މަހުން ފެށިގެން ޣައްޒާގެ ސިއްހީ ނިޒާމަށާއި ސިއްހީ ހިދުމަތްތެރިންނަށް އަމާޒުކޮށް އިސްރާއީލުން ހަމަލާދީ، ނަސްލު ނައްތާލުމުގެ އަމަލުތަކެއް ހިންގާފައިވާ ކަމަށް 2025 ވަނަ އަހަރުގެ ސެޕްޓެމްބަރު މަހު އެ އިދާރާއިން ބުނެފައިވެ އެވެ. ނަމަވެސް އިސްރާއީލުން ވަނީ އެ ތުހުމަތުތަކަކީ ބޮޑު ދޮގެއްގެ ގޮތުގައި ސިފަކޮށްފަ އެވެ.

އިސްރާއީލުން ވަނީ އެ ތަހުގީގީ އިދާރާއަކީ އެ ގައުމާ ދެކޮޅަށް ސިޔާސީ އެޖެންޑާއެއް ގެންގުޅޭ އަދި އޭގެ މަސްއޫލިއްޔަތުން ބޭރުވެފައިވާ ތަނެއް ކަމަށް ތުހުމަތުކޮށް، އެ އިދާރާއަށް އެއްބާރުލުން ދިނުމަށް އިންކާރުކޮށްފަ އެވެ.

ހޯމަ ދުވަހު އދ. ގެ އިންސާނީ ހައްގުތަކާ ބެހޭ ވަކި އިދާރާއަކުން ވަނީ، އިސްރާއީލުން އަބޫ ސަފިއްޔާ ބަންދުކޮށްފައިވަނީ އެއްވެސް އުސޫލެއް ނެތި ކަމަށް ބުނެ، އޭނާ ވަގުތުން މިނިވަންކުރުމަށް ގޮވާލާފަ އެވެ. އދ. ގެ 'ވޯކިން ގްރޫޕް އޮން އާބިޓްރަރީ ޑިޓެންޝަން' އިން ނިންމި ނިންމުމުގައި ބުނެފައިވަނީ، އިސްރާއީލުގެ އަމަލުތަކަކީ އިންސާނީ ހައްގުތަކާ ބެހޭ ބައިނަލްއަގުވާމީ މުއާހަދާތަކާއި އާންމު އުސޫލުތަކުގެ އެތައް މާއްދާއަކާ ހިލާފު އަމަލުތަކެއް ކަމަށެވެ.