ޓްރަމްޕްގެ ބޯޑު އޮފް ޕީސްގައި ބައިވެރި ނުވުމަށް، ވެޓިކަން އިން ނިންމައިފި

އެމެރިކާގެ ރައީސް ޑޮނަލްޑް ޓްރަމްޕް އިސްވެ އުފައްދަވާފައިވާ ބޯޑު އޮފް ޕީސްގައި ބައިވެރި ނުވަން ވެޓިކަން އިން ނިންމައިފި އެވެ. 

އަންގާރަ ދުވަހު އެކަން ހާމަ ކޮށްފައި ވަނީ ވެޓިކަންގެ އެންމެ އިސް ޑިޕްލޮމެޓިކް އޮފިޝަލް ކާޑިނަލް ޕިއެޓްރޯ ޕެރޮލިން އެވެ. އެއާ އެކު އޭނާ ވިދާޅުވެފައި ވަނީ، ކުއްލި ޙާލަތްތައް ޙައްލު ކުރުމުގެ މަސައްކަތްތައް ކުރިއަށް ގެންދަން ޖެހޭނީ އދ އިން ކަމަށެވެ. 

އެމެރިކާގެ ފުރަތަމަ ޕޯޕް ކަމަށްވާ، ޕޯޕް ލިއޯ އަކީ ޓްރަމްޕްގެ ސިޔާސަތު ތަކަށް ވަރަށް ބޮޑަށް ފާޑު ވިދާޅުވާ ބޭފުޅެޅެވެ. ނަމަވެސް، މިދިޔަ ޖަނަވަރީ މަހުގެ ތެރޭގައި ޓްރަމްޕް ވަނީ، އެ ބޯޑުގައި ބައިވެރިވުމުގެ ދައުވަތު އޭނާ އަށް ދެއްވައިފަ އެވެ.

ޣައްޒާ ހަނގުރާމަ ހުއްޓާލުމަށް ޓްރަމްޕް އެކުލަވާލި ޕްލޭންގެ ދަށުން، މިދިޔަ އަހަރުގެ އޮކްޓޫބަރު މަހުގެ ތެރޭގައި ވަނީ ހަނގުރާމަ ހުއްޓާލުމުގެ އެއްބަސްވުމެއް ޤާއިމު ކޮށްފަ އެވެ. އެއާ އެކު ޓްރަމްޕް އުފެއްދެވި ބޯޑުން ޣައްޒާގެ ވަގުތީ ވެރިކަން ބަލަހައްޓަން ވެސް ވަނީ ހިމަނައިފަ އެވެ. އޭގެ ފަހުން ޓްރަމްޕް ވަނީ އެ ބޯޑުގެ ދައުރު އިތުރަށް ފުޅާކޮށް، ދުނިޔޭގެ ހަނގުރާމަތައް ޙައްލު ކުރުމަށް މަސައްކަތް ކުރައްވާނެ ކަމަށް ވިދާޅުވެފަ އެވެ. 

ސްވިޒަލެންޑުގެ ޑާވޯސްގައި ކުރިއަށް ދިޔަ ވޯލްޑް އިކޮނޮމިކް ފޯރަމްގެ ތެރެއިން މި ބޯޑު ރަސްމީކޮށް އިފްތިތާޙު ކޮށްފައިވާއިރު، އެ ބޯޑުގެ ފުރަތަމަ ރަސްމީ ބައްދަލުވުން ބުރާސްފަތި ދުވަހު ބޭއްވުމަށް ވަނީ ހަމަޖެހިފަ އެވެ. އެ ބައްދަލުވުމުގައި ޣައްޒާ އަލުން ބިނާ ކުރުމުގެ މަސައްކަތް ކުރިއަށް ގެންދިޔުމާ ގުޅޭ ގޮތުން މަޝްވަރާ ކުރުމަށް ހަމަޖެހިފައިވެ އެވެ. 

އިޓަލީ އާއި ޔޫރަޕުގެ ބައެއް ޤައުމު ތަކުން ބުނެފައި ވަނީ، އެ ބައްދަލުވުން މޮނިޓާ ކުރުމަށް އެ ޤައުމު ތަކުގެ މަންދޫބުން ވަޑައިގަންނަވާނެ ކަމަށެވެ. ސަބަބަކީ، އެ ޤައުމު ތަކަކީ އެ ބޯޑުގެ މެމްބަރުންނަށް ނުވާތީ އެވެ. ވެޓިކަން އިން ސުލްޙައިގެ ބޯޑުގައި ބައިވެރި ނުވާން ނިންމީ، ބޯޑު އުފެދިފައިވާ ގޮތާއި، އެކަމުގެ ސަބަބުން އެހެން ޤައުމުތަކާ ޚިލާފު ކަމެއް އޮތުމުން ކަމަށް ޕެރޮލިން ވިދާޅުވެފައިވެ އެވެ. 

އިންސާނީ ޙައްގު ތަކަށް މަސައްކަތް ކުރާ ތަޖުރިބާކާރުން އަދި މާހިރުން ބުނެފައިވާ ގޮތުގައި ބޭރުގެ ކަންކަން ބަލަހައްޓާ ބޯޑެއްގެ އިސްވެރިޔާގެ ގޮތުގައި ޓްރަމްޕް ހުންނެވުމަކީ އެންމެ ރަނގަޅު ގޮތް ނޫން ކަމަށެވެ. ޓްރަމްޕް ރިޔާސަތު ބަލަހައްޓަވާ އެ ބޯޑުގައި ފަލަސްޠީނު ހިމަނާފައި ނުވާއިރު، އެކަމާ ގުޅިގެން ވެސް ގިނަ ބައެއްގެ ފާޑު ކިޔުންތައް ވަނީ އަމާޒުވެފަ އެވެ. 

ބޯޑުގައި ބައިވެރި ނުވާން ވެޓިކަން އިން ނިންމާފައިވާއިރު، ލިއޯ ވަނީ މީގެ ކުރިން އެތައް ފަހަރެއްގެ މަތިން ޣައްޒާގައި އޮތް ޙާލަތު ކުށްވެރި ކުރައްވައިފަ އެވެ. ދުނިޔޭގެ 1.4 ބިލިއަން ކެތަލިކް މަސީހީންގެ ލީޑަރު ޕޯޕް، ބައިނަލްއަޤުވާމީ ބޯޑު ތަކުގައި ބައިވެރިވެ ވަޑައިގަންނަވަނީ ވަރަށް މަދު ފަހަރެއްގަ އެވެ. ވެޓިކަން އަކީ ފުޅާ ދާއިރާއެއްގައި ޚާރިޖީ ޚިދުމަތްތައް ފޯރުކޮށްދޭ، އަދި އދ ގެ ދާއިމީ އޮބްޒާވަރެއްގެ ދަރަޖަ އޮންނަ ދައުލަތެކެވެ.