އީރާނުގެ މިސައިލްތައް ހުއްޓުވުމުގައި އެމެރިކާގެ ދިފާއީ ނިޒާމުތައް ނުކެޅިފައިވާ ކަމަށް ތަޖުރިބާކާރުން ބުނެފި: ރިޕޯޓް

ހުޅަނގު އޭޝިއާގައި އެމެރިކާއާއި އެމެރިކާގެ ބައިވެރިން ގާއިމުކޮށްފައިވާ ވައިގެ ދިފާއީ ނިޒާމުތައް ފޫއަޅުވާލުމަށްފަހު، އީރާނުން ފޮނުވާލާ މިސައިލްތައް އަމާޒަށް ވާސިލުވާ މިންވަރު އިތުރުވަމުންދާ ކަމަށް އެމެރިކާގެ އޮފިޝަލުންނާއި ތަޖުރިބާކާރުން ބުނެފި އެވެ. މި ހަމަލާތަކުގައި އެމެރިކާ ސިފައިންނަށް ލިބޭ އަނިޔާތައް އިތުރުވަމުންދާއިރު، އެމެރިކާގެ ދިފާއީ ނިޒާމުތަކުގެ ފެންވަރާ މެދު މިހާރު ވަނީ ސުވާލު އުފެދިފަ އެވެ.

މި މައްސަލަ ބޮޑަށް ފާހަގަވެގެން ދިޔައީ މިދިޔަ ހުކުރު ދުވަހު އުރުދުންގައި ހުންނަ މުވައްފަގު ސަލްތީ އެއާ ބޭސްއަށް ދިން ހަމަލާއެއްގައި އެމެރިކާގެ ދެ ސިފައިން މަރުވެ، އެކަކު ގެއްލުމާ ގުޅިގެންނެވެ. އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވަނީ، އެމެރިކާގެ ދިފާއީ ނިޒާމުތަކަށް މިސައިލެއް ނުހުއްޓުވުމުގެ ސަބަބުން އެ މަރުކަޒަށް އަމާޒުވިކަމަށް އެއްބަސްވެވަޑައިގެންފަ އެވެ.

"އެއް މިސައިލް ދިފާއީ ނިޒާމު ފޫއަޅުވާލި. އަޅުގަނދުުމެން ގާތްގަނޑަކަށް ހުރިހާ މިސައިލެއް ވައްޓާލިން. ނަމަވެސް އެއް މިސައިލް ސަލާމަތްވެގެން ގޮސް އަމާޒަށް އެރީ. މިއީ ވަރަށް ހިތާމަވެރި ކަމެއް،" ރޫބިއޯ ވިދާޅުވި އެވެ.

ނަމަވެސް މިއީ ހަމައެކަނި ހިނގި މިބާވަތުގެ ހާދިސާއެއް ނޫނެވެ. ސީބީއެސް ނިއުސްއިން ރިޕޯޓްކޮށްފައިވާ ގޮތުގައި، މިދިޔަ 48 ގަޑިއިރުގެ ތެރޭގައި އެ މަރުކަޒަށް ދެ ފަހަރެއްގެ މަތިން ހަމަލާދީފައިވެ އެވެ. އަދި މި ހަމަލާތައް ސީދާ އަމާޒަށް އެރުމުގެ ސަބަބުން އެމެރިކާގެ ގިނަ އަދަދެއްގެ ސިފައިންނަށް ވަނީ އެކިވަރުގެ އަނިޔާތައް ލިބިފަ އެވެ.

މިސައިލްތައް އެ މަރުކަޒަށް އަމާޒުވާން މެދުވެރިވި ސަބަބާ ގުޅޭގޮތުން ސުވާލު ކުރުމުން، އެމެރިކާގެ ސެންޓްރަލް ކޮމާންޑްގެ ތަރުޖަމާނު ކެޕްޓަން ޓިމް ހޯކިންސް ވިދާޅުވީ، މިހާރު ކުރިއަށްދާ މުރާޖައާއާ ގުޅޭ ތަފްސީލެއް ދެވެން ނެތް ކަމަށެވެ. ނަމަވެސް ޖުލައި 17 ވަނަ ދުވަހު އީރާނުން ފާރިސީ ކަނޑުއޮޅީގެ ގައުމުތަކަށް ފޮނުވާލި އެތައް މިސައިލަކާއި ޑްރޯންއެއް އެމެރިކާއާއި އެގައުމާއި އެކުވެރި ގައުމުތަކުން ނާކާމިޔާބު ކޮށްލި ނަމަވެސް، ހިތާމައަކީ ބައެއް މިސައިލްތައް ފޫއަޅުވާލުމަށްފަހު އަމާޒަށް ވާސިލުވުން ކަމަށް އޭނާ ވިދާޅުވި އެވެ.

ރައީސް ޑޮނަލްޑް ޓްރަމްޕް ވަނީ މި ނާކާމިޔާބީގެ ޒިންމާ އެހެން ފަރާތްތަކެއްގެ ބޮލުގައި އަޅުވާފަ އެވެ. އެމަނިކުފާނު ވިދާޅުވީ އެ މަރުކަޒުގައި ތިބި "އެހެން އޮޕަރޭޓަރުން" މިސައިލްތައް ވަނުމަށް ފުރުސަތު ދިނީ ކަމަށެވެ.

ވައިޓް ހައުސްގައި ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ، އީރާނުން އުރުދުންގެ މަރުކަޒަށް ހަމަލާދިނީ އެތަނުގައި ތިބި އެހެން އޮޕަރޭޓަރުންގެ އިހުމާލުން ކަމަށެވެ.

"އަޅުގަނޑުމެންގެ އަތުގައި ދުނިޔޭގެ އެންމެ ފެންވަރު ރަނގަޅު ވަސީލަތްތައް އެބަހުރި. ގާތްގަނޑަކަށް ހުރިހާ ހަމަލާއެއް އަޅުގަނޑުމެން ހުއްޓުވިން. ނަމަވެސް، އެމެރިކާގެ މަސައްކަތް ކުރަން އެހެން ބަޔަކާ ހަވާލުކުރުމުން ބައެއް ފަހަރު ކަންކަން ދަނީ އެންމެ ރަނގަޅަކަށް ނޫން،" ޓްރަމްޕް ވިދާޅުވި އެވެ.

ނަމަވެސް އެ "އޮޕަރޭޓަރުންނަކީ" ކޮބައިކަމެއް ޓްރަމްޕް ސާފުކޮށްދެއްވާފައެއް ނުވެ އެވެ.

ޕެންޓަގަނުން ކަށަވަރުކޮށްދީފައިވާ ގޮތުގައި، އުރުދުންގައި ދިން ނުރައްކާތެރި ހަމަލާ ނުހިމަނައި، މި މަހުގެ ތެރޭގައި ހުޅަނގު އޭޝިއާގެ އެކި ސަރަހައްދުތަކުގައި އީރާނުން ދިން ހަމަލާތަކުގައި އެމެރިކާގެ 100 އެއްހާ ސިފައިންނަށް ވަނީ އަނިޔާވެފަ އެވެ.

އުރުދުންގެ އަސްކަރިއްޔާގެ ކުރީގެ ޑެޕިއުޓީ ޗީފް އޮފް ސްޓާފް، ރިޓަޔާޑް ލެފްޓިނަންޓް ޖެނެރަލް ގާސިދު މަހްމޫދު ވިދާޅުވި ގޮތުގައި، އީރާނުގެ ހަމަލާތައް ކާމިޔާބުވަމުންދަނީ އެގައުމުގެ މިސައިލް ޓެކްނޮލޮޖީ ކުރިއަރައި، ހަމަލާދޭ އުސޫލުތަކަށް ގެންނަ ބަދަލުތަކުގެ ސަބަބުންނެވެ.

"އީރާނުގެ އަތުގައި މިހާރު ވަރަށް ކުރިއަރާފައިވާ މިސައިލް ޓެކްނޮލޮޖީ އެބަހުރި. ރާޑަރު ދިފާއީ ނިޒާމުތަކަށް އޮޅުވާލުމަށްޓަކައި ޑްރޯންއާއި މިސައިލް އެއްކޮށް ބޭނުންކޮށްގެން ހަމަލާދޭނެ އާ އުކުޅުތައް އެމީހުން ދަނީ ތަރައްގީ ކުރަމުން،" މަހްމޫދު ވިދާޅުވި އެވެ.

މަހްމޫދު ތަފްސީލުކޮށްދެއްވި ގޮތުގައި، އީރާނުން ފުރަތަމަ ފޮނުވާލަނީ ރާޑަރު ސިސްޓަމްތަކުގެ ސަމާލުކަން އަނބުރާލުމަށް ބޭނުންކުރާ އާދައިގެ މިސައިލްތަކެކެވެ. އޭގެ ފަހުން، އަމާޒަށް ވާސިލުވުމުގެ 30 ނުވަތަ 40 ކިލޯމީޓަރު ކުރިން ދަތުރުކުރާ މިސްރާބު ބަދަލުކޮށްލެވޭ ފަދަ ފެންވަރު ރަނގަޅު 'ޕްރެސިޝަން ގައިޑެޑް' މިސައިލްތައް ފޮނުވާލަ އެވެ.

އޭނާ ވިދާޅުވީ، މިސައިލް ދަތުރުކުރާ މިސްރާބަށް ގެންނަ މި ބަދަލުގެ ސަބަބުން އެ ވައްޓާލުމަށް ދަތިވާ ކަމަށެވެ. އީރާނުގެ މިސައިލެއް އަމާޒަށް އެރީނަމަ، އޭގެ މާނައަކީ އެމެރިކާގެ ދިފާއީ ނިޒާމަށް އެ މިސައިލް ހުއްޓުވުމުގައި ނުވަތަ އެކަށީގެންވާ ވަގުތުގެ ތެރޭގައި އެ ދެނެގަތުމުގައި ނާކާމިޔާބުވުން ކަމަށްވެސް އޭނާ ވިދާޅުވި އެވެ.

ފަހަކާ ޖެހެންދެން އުރުދުންއަކީ އީރާނުގެ ހަމަލާތަކުން ސަލާމަތްވެފައި އޮތް ގައުމެކެވެ. މީގެ ކުރިން އީރާނުން އަމާޒުކުރަމުން ދިޔައީ ފާރިސީ ކަނޑުއޮޅީގެ ގައުމުތައް ކަމަށްވާ ކުވެއިތާއި ބަހްރައިންގައި ހުންނަ އެމެރިކާގެ މަރުކަޒުތަކަށެވެ. ބަހްރައިނަކީ އެމެރިކާގެ ކަނޑުގެ ސިފައިންގެ ފަސްވަނަ ފްލީޓް އޮންނަ ގައުމެވެ. އަދި ކުވެއިތުގެ އެކި މަރުކަޒުތަކުގައި އެމެރިކާގެ 13،000 އެއްހާ ސިފައިން ހަރަކާތްތެރިވެ އެވެ.

މިދިޔަ އަންގާރަ ދުވަހު އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ބުނެފައިވަނީ، ބަދަލުހިފުމުގެ ގޮތުން ދެމުންދާ ހަމަލާތަކުގައި ކުވެއިތުގައި ހުރި އެމެރިކާގެ އެތައް ރާޑަރު ސިސްޓަމެއް ހަލާކުކޮށްލާފައިވާ ކަމަށެވެ.

އުރުދުންގެ އޮފިޝަލުން އެގައުމުގައި އެމެރިކާ ސިފައިން ތިބޭ ތިބުމާ މެދު ވާހަކަދެއްކުމުގައި ވަރަށް ބޮޑަށް ސަމާލުވެ އެވެ. އެގައުމުގެ ފޮރިން މިނިސްޓަރު އައިމަން ސަފާދީ މީގެ ކުރިން ވިދާޅުވެފައިވަނީ، އެމެރިކާގެ ދާއިމީ އަސްކަރީ މަރުކަޒުތަކެއް އުރުދުންގައި ނުހުންނާނެ ކަމަށާއި، އެމީހުން މަސައްކަތް ކުރަނީ ދެގައުމުގެ ދެމެދުގައި ވެފައިވާ އެއްބަސްވުންތަކެއްގެ ދަށުން ކަމަށެވެ.

މިދިޔަ ހުކުރު ދުވަހުގެ ހަމަލާގައި މަރުވި އެމެރިކާގެ ދެ ސިފައިންނަކީ، ވައިގެ ދިފާއީ ނިޒާމުތައް ބެލެހެއްޓުމުގެ ޒިންމާ އޮންނަ 'އާމީ އެއާ މިސައިލް ޑިފެންސް ކޮމާންޑް' އަށް ނިސްބަތްވާ ދެ މީހުން ކަމަށް ރިޕޯޓްތައް ބުނެ އެވެ.