ހުރްމުޒް ގައި ޓޭންކަރުތަލުގައި ރޯވެފައި، އެމެރިކާ އާއި އީރާނުން ހަމަލާތައް ބަދަލު ކުރަނީ، އެންމެ ފަހުގެ ޚަބަރަކީ ކޮބާ؟

އަންގާރަ ދުވަހުގެ ފަތިހުގެ ވަގުތެއްގައި އެމެރިކާއިން އީރާނުގެ އަސްކަރީ ކޮމާންޑް ސެންޓަރުތަކަށް އަމާޒުކޮށް ވަރުގަދަ ހަމަލާތަކެއް ދީފިއެވެ. މިއީ މެދުނުކެނޑި އެމެރިކާއިން އީރާނަށް ހަމަލާދިން 10 ވަނަ ރޭ ކަމަށްވާއިރު، އީރާނުގެ ގިޝްމް އައިލެންޑާއި، ބަންދަރު އައްބާސް އަދި ބުޝެހްރުން ބާރުގަދަ ގޮވުންތަކުގެ އަޑު އިވިފައިވާ ކަމަށް ރިޕޯޓުތައް ބުނެ އެވެ.

އެމެރިކާގެ ހަމަލާތަކަށް ރައްދު ދިނުމުގެ ގޮތުން އީރާނުން ވަނީ ގަލްފް ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް ބަހުރޭނާއި ކުވެއިތަށް ހަމަލާދީފަ އެވެ. މީގެ އިތުރުން، ހުރްމުޒް ކަނޑުއޮޅިން ދަތުރުކުރި ދެ ތެޔޮ ޓޭންކަރެއްގައި "ބޮޑު އަލިފާންގަނޑެއް" ރޯވެފައިވާ ކަމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ވަނީ ހާމަކޮށްފަ އެވެ.

މި ހިމަނާލަނީ ހޯމަ ދުވަހުގެ ރެއާއި އަންގާރަ ދުވަހު ހިނގާދިޔަ ކަންތައްތަކުގެ ޚުލާސާއެކެވެ.

އެމެރިކާ އިން ހަމަލާދިނީ ކޮން ތަންތަނަކަށް؟

އެމެރިކާގެ ސެންޓްރަލް ކޮމާންޑް (ސެންޓްކޮމް) އިން އިއުލާންކޮށްފައިވާ ގޮތުގައި، އަންގާރަ ދުވަހުގެ ގްރިނިޗް މީން ޓައިމުން 01:00 ގައި އީރާނަށް އަމާޒުކޮށް ވަނީ އިތުރު ހަމަލާތަކެއް ދީފަ އެވެ. މިއީ އެމެރިކާއިން ޖެހިޖެހިގެން އީރާނަށް ހަމަލާދިން 10 ވަނަ ރެއެވެ.

ސެންޓްކޮމް އިން ބުނި ގޮތުގައި މި ހަމަލާތައް އަމާޒުކޮށްފައިވަނީ އީރާނުގެ އަސްކަރީ ކޮމާންޑް ސެންޓަރުތަކަށާއި، ކަނޑުގެ އަސްކަރީ ގާބިލުކަން ހުރި ތަންތަނަށާއި، މިސައިލާއި ޑްރޯން ފޮނުވާ މަރުކަޒުތަކުގެ އިތުރުން ވައިގެ ދިފާއީ ނިޒާމުތަކަށެވެ.

އަލްޖަޒީރާގެ ރިޕޯޓަރު ތައުހީދު އަސީދީ އީރާނުގެ ވެރިރަށް ތެހެރާނުން މައުލޫމާތު ދިން ގޮތުގައި، ހުރްމުޒް ކަނޑުއޮޅީގައި އޮންނަ އެންމެ ބޮޑު ރަށް ކަމަށްވާ ގިޝްމް އައިލެންޑާއި، ބަންދަރު އައްބާސް އަދި ބަންދަރު ލެންގޭ ފަދަ ބަނދަރުމަތީ ސިޓީތަކުން ގޮވުންތަކުގެ އަޑު އިވިފައިވެ އެވެ.

އީރާނުގެ ދައުލަތުގެ މީޑިއާ، އައި.އާރް.އައި.ބީ އިން ރިޕޯޓުކޮށްފައިވާ ގޮތުގައި އަންގާރަ ވިލޭރޭ މެން ދަމު 1 ޖެހިއިރު (ގްރިނިޗް މީން ޓައިމުން 21:30 ގައި) އީރާނުގެ ހުޅަނގު ދެކުނު ސިޓީއެއް ކަމަށްވާ ޝީރާޒުން ގޮވުންތަކުގެ އަޑު ވަނީ އިވިފަ އެވެ.

އެ މީޑިއާއިން ބުނި ގޮތުގައި ޝީރާޒްގެ އިރުމަތީ ފަރާތުންނާއި ހުޅަނގު ފަރާތުން ވަކި ސަރަހައްދުތަކަކަށް "ދުޝްމަނުން ވަނީ ހަމަލާދީފަ" އެވެ.

ނަމަވެސް، އިސްފަހާން ޕްރޮވިންސްގެ ޑެޕިއުޓީ ގަވަރުނަރާ ހަވާލާދީ އައި.އާރް.އައި.ބީ އިން ބުނީ، އިސްފަހާން ސިޓީއަށް ނުވަތަ އެ ޕްރޮވިންސްގެ އެއްވެސް ހިސާބަކަށް "ދުޝްމަނުންގެ ހަމަލާއެއް ނުވަތަ ގޮވުމެއް" ކުރިމަތިވެފައި ނުވާ ކަމަށެވެ. މިއީ މެހެރް ނިއުސް އެޖެންސީން ކުރިން ފެތުރި ޚަބަރުތައް ދޮގުކޮށް އޭނާ ދެއްވި މައުލޫމާތެކެވެ. މީގެ އިތުރުން ބުޝެހްރުގެ ގަވަރުނަރު އައި.އާރް.އައި.ބީ އަށް ވިދާޅުވީ، އެ ޕްރޮވިންސްގައި އިވުނު ގޮވުންތަކުގެ އަޑަކީ "ދިފާއީ ނިޒާމުތަކުގެ ހަރަކާތްތަކާ" ގުޅިގެން އިވުނު އަޑުތަކެއް ކަމަށެވެ.

އީރާނުގެ ހުޅަނގު އިލާމް ޕްރޮވިންސްގެ އަބްދާނަން ސިޓީގެ ގަވަރުނަރު ބެހްޒާދު ނޫރުމުހައްމަދީއާ ހަވާލާދީ މެހެރް ނިއުސް އެޖެންސީން އަންގާރަ ދުވަހު ބުނީ، އެ ސިޓީގެ އެކި ސަރަހައްދުތަކުން ގިނަ ގޮވުންތަކެއްގެ އަޑު އިވިފައިވާ ކަމަށެވެ.

ގަލްފް ސަރަހައްދުން ހަމަލާދިނީ ކޮން ތަންތަނަކަށް؟

ބަހުރައިން: އީރާނުގެ އައި.އާރް.ޖީ.ސީ އިން އަންގާރަ ދުވަހު ބުނި ގޮތުގައި، އެންމެ ފަހުން ހިންގި އަސްކަރީ އޮޕަރޭޝަންގައި ބަހުރޭނުގެ މުހައްރަގު ސަރަހައްދުގައި ހުރި އެމެރިކާގެ ވައިގެ ދިފާއީ ނިޒާމަކާއި ރާޑަރެއް ވަނީ ހަލާކުކޮށްލާފަ އެވެ. އައި.އާރް.އައި.ބީ އިން އާންމުކުރި ބަޔާނެއްގައިވާ ގޮތުން، ބަހުރޭނުގެ އަލް-ރިފާގައި ހުރި އެމެރިކާގެ ޕޭޓްރިއަޓް އެއާ ޑިފެންސް ސިސްޓަމް ވަނީ މިސައިލާއި ޑްރޯން ބޭނުންކޮށްގެން ދިން ވަރުގަދަ ހަމަލާއެއްގައި ގޮއްވާލާފަ އެވެ.

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ބުނި ގޮތުގައި، ދިން ހަމަލާތަކުގެ މަގުސަދަކީ ކުރިއަށް އޮތް އަސްކަރީ އޮޕަރޭޝަންތަކަށް މަގުފަހިކުރުމެވެ. އީރާނުގެ ސެމީ-އޮފިޝަލް ނިއުސް އެޖެންސީއެއް ކަމަށްވާ "ތަސްނީމް" އިން ރިޕޯޓްކޮށްފައިވާ ބަޔާނެއްގައި އައި.އާރް.ޖީ.ސީ އިން ދައުވާކޮށްފައިވާ ގޮތުގައި، އެ ޖަމާއަތުގެ އެއަރޯސްޕޭސް ފޯސް އިން ވަނީ ކްރޫޒް މިސައިލް ބޭނުންކޮށްގެން އެމެޒޯން ކުންފުނީގެ މަރުކަޒީ ޑޭޓާ އިންފްރާސްޓްރަކްޗަރ ނައްތާލާފަ އެވެ.

ކުވެއިތު: ދާދިފަހުން ދިން ހަމަލާތަކެއްގައި ކުވެއިތުގައި ހުރި އެމެރިކާގެ އަސްކަރީ ބައެއް ވަސީލަތްތަކަށް އަމާޒުކޮށް އެތަންތަން ހަލާކުކޮށްލާފައިވާ ކަމަށް އައި.އާރް.ޖީ.ސީ އިން ބުނެފި އެވެ. ތަސްނީމް ނިއުސް އެޖެންސީން އާންމުކުރި ބަޔާނެއްގައި އައި.އާރް.ޖީ.ސީ އިން ބުނީ، ކުވެއިތުގައި ހުރި އެމެރިކާ އަސްކަރިއްޔާގެ ދުރު ރާސްތާގެ ރޭޑާ ސައިޓަކަށާއި، މުވާސަލާތީ މަރުކަޒަކަށާއި، ސެޓެލައިޓް ސިގްނަލް ބަލައިގަންނަ ނިޒާމުތަކުގެ އިތުރުން މިސައިލް ޑިފެންސް ރާޑަރަކަށް ހަމަލާދީފައިވާ ކަމަށެވެ. މީގެ އިތުރުން، އަލީ އަލް ސާލިމް އެއަރބޭސްގައި ހުރި އެމް.ކިއު-9 ޑްރޯން ހޭންގަރަކަށް ހަމަލާދީ، އިންސާނަކާ ނުލައި ދުއްވާ ބައެއް އުޅަނދުތައް ނައްތާލާފައިވާ ކަމަށް ނުވަތަ ބޮޑެތި ގެއްލުންތަކެއް ދީފައިވާ ކަމަށްވެސް އެ ޖަމާއަތުން ވަނީ ބުނެފަ އެވެ.

މިކަމާ ގުޅިގެން ދެ ފަރާތުގެ ވެރިން ވިދާޅުވަނީ ކީކޭ ހެއްޔެވެ؟

އެމެރިކާގެ ރައީސް އެހެން ގޮތަކަށް ނިންމަވަންދެން މި ހަމަލާތައް ކުރިއަށްދާނެ ކަމަށް ވައިޓް ހައުސްއިން އަލްޖަޒީރާއަށް ދިން ބަޔާނެއްގައި ބުނެފައިވެ އެވެ. ނަމަވެސް، އެ ބަޔާން ނިންމާލަމުން ވައިޓް ހައުސްއިން ފާހަގަކޮށްފައިވަނީ ދެ ގައުމުގެ ދެމެދުގައި ޚާރިޖީ މަޝްވަރާތައް އަދިވެސް ކުރިއަށްދާ ކަމަށެވެ.

އަންގާރަ ދުވަހު އީރާނުގެ އައި.އާރް.ޖީ.ސީ އިން ބުނި ގޮތުގައި، ހުރްމުޒް ކަނޑުއޮޅީގެ ނުރައްކާތެރި ދެކުނު މަގުން ދަތުރުކުރަން އުޅުނު ތެޔޮ އުފުލާ ދެ އުޅަނދެއްގައި ގޮވުމެއް ގޮވައި، "ބޮޑު އަލިފާންގަނޑެއް" ވަނީ ރޯވެފަ އެވެ.

އީރާނުގެ ދައުލަތުގެ މީޑިއާ ކަމަށްވާ އައި.އާރް.އައި.ބީ އިން އާންމުކުރި ބަޔާނެއްގައި އައި.އާރް.ޖީ.ސީ އިން ބުނީ، އެ އުޅަނދުތަކުގައި ތިބި ފަޅުވެރިން ސަލާމަތްކުރުމުގެ މަސައްކަތް ރެސްކިއު ޓީމުތަކުން ކުރަމުންދާ ކަމަށެވެ.

އައި.އާރް.ޖީ.ސީ އިން ވަނީ ފަޅުވެރިންގެ ސަލާމަތާއި ރައްކާތެރިކަން ކަށަވަރުކުރުމަށް ޝިޕިންގ ކުންފުނިތަކަށް އަނެއްކާވެސް އިންޒާރު ދީފަ އެވެ. އަދި އެމެރިކާ އަސްކަރިއްޔާއިން ފަތުރާ "ދޮގު މައުލޫމާތަށް" އިތުބާރު ނުކުރުމަށާއި، ނުރައްކާތެރި ކަމަށް ބެލެވޭ މަގުތަކުން ދަތުރުނުކުރުމަށްވެސް ވަނީ އިލްތިމާސްކޮށްފަ އެވެ.

"މި ސަރަހައްދުގައި އެމެރިކާގެ ނުބައި އަމަލުތައް ކުރިއަށްދާހާ ހިނދަކު، ހުރްމުޒް ކަނޑުއޮޅި އޮންނާނީ ބަންދުކޮށްފައި ކަމާއި، އަދި މި ސަރަހައްދުން ތެލާއި، ގޭސް ނުވަތަ ކެމިކަލް ފާޓިލައިޒާ ޕެކޭޖެއްގެ މިންވަރުވެސް ބޭރު ނުކުރެވޭނެކަން އެއީ ސާފުކޮށް އެނގެން އޮތް ކަމެއް،" އެ ބަޔާނުގައި އިތުރަށް ބުނެފައިވެ އެވެ.