އީރާން ހަމަލާތަކުގައި އެމެރިކާ ސިފައިންގެ 100 މީހުންނަށް އަނިޔާވެެއްޖެ

ޖުލައި މަހުގެ 7 ވަނަ ދުވަހުން ފެށިގެން އެމެރިކާއާއި އީރާނާ ދެމެދު ހަމަލާތައް ބަދަލުކުރަމުންދާއިރު، މި ކުރިމަތިލުންތަކުގައި އެމެރިކާ ސިފައިންގެ ގާތްގަނޑަކަށް 100 މީހުންނަށް އެކިވަރުގެ އަނިޔާތައް ލިބިފައިވާ ކަމަށް ޕެންޓަގަނުން ބުނެފި އެވެ.

އެމެރިކާ ސިފައިންނަށް ލިބުނު އަނިޔާތަކާ ގުޅޭގޮތުން ޕެންޓަގަނުގެ ތަރުޖަމާނަކު ސީއެންއެން އަށް މައުލޫމާތު ދެއްވަމުން ވިދާޅުވީ، އަނިޔާވި ގާތްގަނޑަކަށް 100 ސިފައިންގެ ތެރެއިން ގިނަ މީހުންނަށް ލިބިފައިވަނީ ކުދި އަނިޔާތައް ކަމަށެވެ. ނަމަވެސް، ސިފައިންނަށް ލިބޭ އަނިޔާތަކުގެ ތަފުސީލު ހާމަކުރުމުގައި އެމެރިކާގެ އަސްކަރިއްޔާއިން ލަސްތަކެއް ކުރިމަތިކުރުވާފައިވާ ކަމަށް ސީއެންއެން އިން ހޯމަ ދުވަހު ރިޕޯޓުކޮށްފައިވެ އެވެ. އަސްކަރިއްޔާއިން ބުނާ ގޮތުގައި މި މައުލޫމާތުތައް ހާމަކުރުން ލަސްކުރީ ސިފައިންގެ ރައްކާތެރިކަމަށްޓަކައެވެ.

އީރާނުގެ ހަމަލާތަކުގައި މަރުވި އެމެރިކާ ސިފައިންގެ ހަށިތައް އެނބުރި ގައުމަށް ގެންދިއުމުގެ ރަސްމިއްޔާތު ބުދަ ދުވަހު ބޭއްވުމަށް މިހާރު ވަނީ ހަމަޖެހިފައެވެ. ޓްރަމްޕް ސަރުކާރުގެ އޮފިޝަލަކު ވިދާޅުވި ގޮތުގައި، ކުރިން އަންގާރަ ދުވަހު ބޭއްވުމަށް ނިންމި މި ރަސްމިއްޔާތުގައި ރައީސް ޑޮނަލްޑް ޓްރަމްޕް ބައިވެރިވެވަޑައިގަންނަވާނެ ކަމަށް ބެލެވެއެވެ. ފާއިތުވި މަދު ދުވަސްކޮޅެއްގެ ތެރޭގައި އެމެރިކާގެ ތިން ސިފައިން މަރުވި މައްސަލާގައި، އީރާނުން އޭގެ ބަދަލު ދޭންޖެހޭނެ ކަމަށް ޓްރަމްޕް ވަނީ މީގެ ކުރިން އިންޒާރު ދެއްވާފަ އެވެ. ހަނގުރާމައިގައި މިހާތަށް އެމެރިކާގެ 17 ސިފައިން މަރުވެފައިވާ ކަމަށް ރިޕޯޓުތައް ބުނެ އެވެ.

އެމެރިކާގެ އަސްކަރިއްޔާއިން ބުނި ގޮތުގައި، ހޯމަ ދުވަހުގެ ރޭގަނޑުން ފެށިގެން އަންގާރަ ދުވަހާ ހަމައަށް އެމެރިކާއިން ވަނީ އީރާނަށް އަމާޒުކޮށް 10 ވަނަ ރެއަށް ހަމަލާތައް ދީފަ އެވެ. މި ހަމަލާތަކުގައި އީރާނުގެ ކޮމާންޑް ސެންޓަރުތަކަށާއި ކަނޑުގެ އަސްކަރީ ގާބިލުކަން ހުރި ތަންތަނަށް އަމާޒުކޮށްފައިވާ ކަމަށް އެމެރިކާއިން ބުނެ އެވެ. އީރާނުގެ ދައުލަތުގެ މީޑިއާއިން ރިޕޯޓުކޮށްފައިވާ ގޮތުގައި، އީރާނުގެ ދެކުނު ހުރްމުޒްގާން ޕްރޮވިންސްގެ ބަންދަރު އައްބާސް، ގޭޝްމް އަދި ބެމާނީ ޑިސްޓްރިކްޓް ހިމެނޭހެން އެކި ސަރަހައްދުތަކުގައި ބާރުގަދަ ގޮވުންތަކެއް ވަނީ ގޮވާފަ އެވެ.

ހުރްމުޒް ކަނޑުއޮޅީގައި ހިނގަމުންދާ ހަމަލާތަކާ ގުޅިގެން، އިނގިރޭސިވިލާތުގެ މެރިޓައިމް އޮތޯރިޓީން ބުނީ ހޯމަ ދުވަހު ހަމަލާއެއް އަމާޒުވި އުޅަނދެއްގައި ތިބި ފަޅުވެރިން އެ އުޅަނދު ދޫކޮށްލުމަށްފަހު މިހާރު ތިބީ ލައިފްބޯޓެއްގައި ކަމަށެވެ. މެރިން ޓްރެފިކްގެ ތަފާސްހިސާބުތަކުން ދައްކާ ގޮތުގައި، އެ ސަރަހައްދުން ދަތުރުކުރާ އުޅަނދުފަހަރުގެ އަދަދު ވަނީ ވަރަށް ބޮޑަށް ދަށްވެފަ އެވެ. އެގޮތުން ހޯމަ ދުވަހު އެ ކަނޑުއޮޅިން ދަތުރުކުރީ އެންމެ ނުވަ އުޅަނދެވެ. ނަމަވެސް، މެއި މަހުގެ ކުރީކޮޅުން ފެށިގެން މިހާތަނަށް ވިޔަފާރިކުރާ ގާތްގަނޑަކަށް 900 އުޅަނދަކަށް ދަތުރުފަތުރު ކުރުމުގެ މަގު ފަހިކޮށްދީފައިވާނެ ކަމަށް އެމެރިކާގެ އަސްކަރިއްޔާއިން ބުނެ އެވެ.

މި ކުރިމަތިލުންތަކުގެ އަސަރު މުޅި މެދުއިރުމައްޗަށް ދަނީ ފޯރަމުންނެވެ. ކުވެއިތުން ބުނި ގޮތުގައި ހޯމަދުވަހުގެ ރޭގެ ވަގުތެއްގައި އެ ގައުމަށް އަމާޒުވި "ދުޝްމަނުންގެ" މިސައިލްތަކާއި ޑްރޯންތަކެއް ވަނީ ހުއްޓުވާފަ އެވެ. އަދި އީރާނުގެ ސަރަހައްދުން ފޮނުވާލި ތިން މިސައިލެއް ވައްޓާލާފައިވާ ކަމަށް އުރުދުންއިން ވެސް ވަނީ ބުނެފަ އެވެ. ހަމައެއާއެކު، އެމެރިކާއިން ދަނީ މެދުއިރުމަތީގައި ހަރަކާތްތެރިވާ އަސްކަރީ ބޯޓުތަކުގެ އަދަދު އިތުރުކުރަމުންނެވެ. އެގޮތުން ފާއިތުވި ދުވަސްތަކުގައި އެމެރިކާގެ ތެޔޮ އަޅައިދޭ ގިނަ އަދަދެއްގެ ބޯޓުތައް ވަނީ އިޒްރޭލަށް ގޮސްފަ އެވެ.

މައްސަލަ ހައްލުކުރުމަށް މެދުވެރިއެއްގެ ދައުރު އަދާކުރާ ފަރާތްތަކުން އެމެރިކާއާއި އީރާނާ ދެމެދު 10 ދުވަހުގެ މުއްދަތަށް ހަމަލާ ބަދަލުކުރުން ހުއްޓާލުމުގެ ހުށަހެޅުމެއް ހުށަހަޅާފައިވެ އެވެ. ނަމަވެސް، ރައީސް ޓްރަމްޕް މި ހުށަހެޅުން ގަބޫލުކުރައްވާނެ ކަމުގެ ފުރުސަތު ކުޑަކަމަށް ވޮޝިންގްޓަނުން ވަނީ އިޝާރާތްކޮށްފަ އެވެ.