އީރާނާއެކު ވާހަކަ ދައްކަން ތައްޔާރު، އެކަމަކު އެ މީހުން ސީރިއަސްއެއް ނޫން: ރޫބިއޯ

އެމެރިކާ އާއި އީރާންއާ ދެމެދު އުފެދިފައިވާ ނުތަނަވަސްކަން ޙައްލު ކުރުމަށް މަޝްވަރާ ކުރުމަށް އެމެރިކާ އޮތީ ތައްޔާރަށް ކަަމަށާއި، ނަމަވެސް އީރާންގެ ކިބައިން އެއްވެސް ސީރިއަސް ކަމެއް ނުފެންނަ ކަމަށް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވެއްޖެ އެވެ.

ރޫބިއޯ މިހެން ވިދާޅުވީ ދެކުނު އިރުމަތީ އޭޝިއާގެ ފޮރިން މިނިސްޓަރުންގެ ބައްދަލުވުމެއްގައި ވާހަކަ ދައްކަވަމުންނެވެ.

އީރާންގެ އިސް ވެރިޔަކު ހޯމަ ދުވަހު ރޮއިޓާސް އަށް ވިދާޅުވީ ދިހަ ދުވަހަށް ހަނގުރާމަ ހުއްޓާލުމަށް މެދުވެރިން ހުށަހަޅާފައިވާ ހުށަހެޅުމެއް އީރާން އަށް ލިބިފައިވާ ކަމަށެވެ. މިއީ ޖޫން މަހު އެމެރިކާ އާއި އީރާންއާ ދެމެދު ސޮއިކުރި ވަގުތީ ހަނގުރާމަ ހުއްޓުމުގެ އެއްބަސްވުން ސަލާމަތް ކުރުމުގެ މަސައްކަތެއް ކަމަށް ވެސް އޭނާ ވިދާޅުވެފައިވެ އެވެ. 

ރޫބިއޯ ވިދާޅުވީ އެމެރިކާ އިން އަބަދުވެސް ޑިޕްލޮމަސީ އަށް ތައްޔާރަށް އޮތް ކަމަށާއި، ނަމަވެސް އީރާން އިން ސީރިއަސްކަމާ އެކު އޮތް ކަމާ މެދު ޝައްކު އުފެދޭ ކަމަށެވެ. މެނީލާގައި ރޫބިއޯ ވިދާޅުވީ މިހާރު ކުރިމަތި ވެފައިވާ މައްސަލަ އަކީ އީރާން އިން ވާހަކަތަކުގައި ސީރިއަސް ނުވުން ކަމަށާއި، އީރާން އިން ސީރިއަސް ނަމަ އެމެރިކާ އިން ވެސް ސީރިއަސް ވާނެ ކަމަށެވެ. އެހެން ނޫން ނަމަ، އެމެރިކާގެ މަސްލަހަތާއި އެމެރިކާގެ އެކުވެރިންގެ މަސްލަހަތު ރައްކާތެރި ކުރުމަށް ބޭނުންވާ ކަންތައްތައް ކުރާނެ ކަމަށް ވެސް ރޫބިއޯ ވިދާޅުވި އެވެ.

ރޫބިއޯ މިހެން ވިދާޅުވެފައިވާއިރު، ހަނގުރާމަ މެދުކަނޑާލުމުގެ އެއްބަސްވުން ނިމުމަކަށް ގެނައީ އެމެރިކާ އިންނެވެ. އެމެރިކާ އިން އިސްވެ އީރާން އަށް ހަމަލާ ދޭން ފެށުމުން، އީރާން އިން ވެސް ވަނީ ރައްދުގައި ހަމަލާތައް ދީފައި އެވެ. އޭގެ ސަބަބުން ދެ ޤައުމުގެ ދެ މެދުގައި އޮތް ނުތަނަވަސްކަން ވަނީ އިތުރުވެފައި އެވެ.