ޔަމަނުގެ ހޫޘީން ސައުދީއާ ދެކޮޅަށް ކަނޑުގެ ބްލޮކޭޑެއް އިއުލާނުކޮށްފި

ޔަމަނުގެ ހޫޘީން ސައުދީ އަރަބިއްޔާއާ ދެކޮޅަށް ކަނޑުގެ ބްލޮކޭޑެއް ނުވަތަ ކަނޑުގެ މަގުން މުދާ އުފުލުން ހުއްޓުވުމުގެ ހަރަކާތް ކުރިއަށް ގެންދާނެކަން އިއުލާނުކޮށްފި އެވެ. ހޫޘީންގެ އަސްކަރީ ތަރުޖަމާނު ވިދާޅުވި ގޮތުގައި މި ނިންމުމަށް ވަގުތުން އަމަލުކުރަން ފަށާނެއެވެ.

ހޯމަ ދުވަހު ނެރުނު ބަޔާނެއްގައި ޔަމަނުގެ ހަތިޔާރު އެޅި ފައުޖުތަކުގެ ތަރުޖަމާނު ބްރިގޭޑިއާ ޖެނެރަލް ޔަހްޔާ ސަރީއު އިއުލާނުކުރެއްވި ގޮތުގައި، "ހިސާރުގެ ބަދަލުގައި ހިސާރު" ކުރުމުގެ އުސޫލުގެ ދަށުން، ކުށްވެރި ސައުދީ ދުޝްމަނުންނާ ދެކޮޅަށް ކަނޑުގެ ދަތުރުފަތުރުގެ ހުރަސްއެޅުމަށް ވަނީ ކަނޑައަޅާފައެވެ. އަދި މި ބަޔާން ނެރުނު ވަގުތުން ފެށިގެން އެ ނިންމުމަށް އަމަލުކުރަން ފަށާނެ ކަމަށްވެސް އޭނާ ވިދާޅުވި އެވެ.

މި ބަޔާނުގައިވާ ގޮތުން، މި ބްލޮކޭޑް ކުރިއަށްގެންދަން ނިންމީ، ވޭތުވެދިޔަ 12 ވަރަކަށް އަހަރު ދުވަހު ސައުދީ އަރަބިއްޔާއިން ޔަމަނުގެ ލޮބުވެތި ރައްޔިތުންނާ ދެކޮޅަށް ހިންގަމުންދާ ބޭއިންސާފު އަދި އަނިޔާވެރި ހިސާރުގެ ސަބަބުން ކަމަށް ތަރުޖަމާނު ވިދާޅުވި އެވެ. ސައުދީން ޔަމަނުގެ ވަސީލަތްތައް ފޭރިގަނެ، އެ ގައުމުގެ ބަނދަރުތަކާއި އެއާޕޯޓުތައް އެއްގަމާއި، ކަނޑާއި، ވައިގެ މަގުން ބަންދުކޮށްފައިވާ ކަމަށާއި، އަދި ދާދިފަހުން ސަންޢާ އިންޓަނޭޝަނަލް އެއާޕޯޓަށް ދިން ހަމަލާތަކާ ގުޅިގެން މި ފިޔަވަޅު އަޅަން ޖެހުނު ކަމަށް ބަޔާނުގައިވެ އެވެ.

ޔަމަނުގެ ހަތިޔާރު އެޅި ފައުޖުތައް އޮތީ ހުރިހާ ފުރުސަތަކަށް ފުރިހަމައަށް ތައްޔާރުވެގެން ކަމަށް ތަރުޖަމާނު ވިދާޅުވި އެވެ. އަދި ރިޔާޟުން ހިންގާ ކޮންމެ "މޮޔަ އަމަލަކަށް" ވަރުގަދަ ރައްދު ހަމަލާއެއް ދޭނެ ކަމުގެ އިންޒާރުވެސް އޭނާ ދެއްވި އެވެ.

ޔަމަނުގެ ރައްޔިތުން ސާބިތުކަމާއެކު ތިބޭ ތިބުމަށާއި، ސަންޢާ ސަރުކާރަށް ތާއީދުކޮށް އެތައް މިލިއަން ބަޔަކު ބޭއްވި މުޒާހަރާތަކަށް މި ބަޔާނުގައި ތައުރީފުކޮށްފައިވެ އެވެ. އަދި ރައްޔިތުންގެ ކިބައިން ފޭރިގެންފައިވާ ހައްގުތައް އަނބުރާ ހޯދައިދިނުމަށާއި، ކުރިމަތިވެފައިވާ ބޭއިންސާފު ހިސާރު ނައްތާލުމަށް، ކޮންމެ ނަތީޖާއެއް ނުކުތް ނަމަވެސް އެއްވެސް މަސައްކަތެއް ދޫނުކުރާނެ ކަމުގެ ޔަގީންކަން ރައްޔިތުންނަށް ދޭ ކަމަށްވެސް ބަޔާނުގައިވެއެވެ.

މި މަހުގެ ކުރީކޮޅު މަސްލަހަތު ގޯސްވީ، އީރާނުގެ އަވަހާރަވެފައިވާ ލީޑަރު އާޔަތުﷲ ސައްޔިދު އަލީ ޚާމަނާއީގެ ޖަނާޒާއަށް ތެހެރާނަށް ދިޔަ ޔަމަނުގެ އޮފިޝަލުންގެ ވަފުދެއް ގޮވައިގެން ދަތުރުކުރި އީރާނުގެ ބޯޓެއް އެނބުރި އައުން ހުއްޓުވަން ސައުދީން މަސައްކަތް ކުރި ކަމަށް ހޫޘީން ތުހުމަތު ކޮށްފަ އެވެ. ސަންޢާ އެއާޕޯޓަށް ބޮން އެޅުމުގެ ސަބަބުން އެ ބޯޓުގެ މިސްރާބު ބަދަލުކޮށް، ރައްކާތެރިކަމާއެކު ހުދައިދާ ސިޓީއަށް ވަނީ ޖައްސާފައެވެ.

ޔަމަނު އޮތީ ފުރިހަމަ ހަނގުރާމައަކަށް ތައްޔާރަށް: އޮފިޝަލް

މިދެމެދުގައި، އަންސާރުﷲ ޖަމާއަތުގެ ސިޔާސީ ބިއުރޯގެ އިސް މެންބަރެއް ކަމަށްވާ ހިޒާމް އަލް-އަސަދު އިންޒާރު ދެއްވި ގޮތުގައި، ޔަމަނަށް ކުރިމަތިކޮށްފައިވާ 11 އަހަރުވީ ހިސާރު ނައްތާނުލައިފިނަމަ، ފުރިހަމަ ހަނގުރާމައަކަށް ދިއުމަށް ޔަމަނު އޮތީ ތައްޔާރަށެވެ.

އޭނާ ވިދާޅުވީ، ޔަމަނުގެ ރައްޔިތުން ހަނު ތިއްބައި، ރިޔާޟުން ތެޔޮ އެކްސްޕޯޓްކޮށް، ހަތިޔާރު ގަނެގެން ޔަމަނަށް ބޮން އަޅައި ބަންދުކޮށްފައި ބޭއްވުމަކީ ބަލައިގަނެވޭނެ ކަމެއް ނޫން ކަމަށެވެ.

"އަޅުގަނޑުމެން މިއަދު މިތިބީ އުނދަގޫ ހާލަތެއްގައި. އެއީ ބަނޑަށް މަރުވުން، ނުވަތަ ބާރުގެ ބޭނުންކޮށްގެން އަޅުގަނޑުމެންގެ ހައްގުތައް އަނބުރާ ހޯދުން،" އަލް-މަޔާދީން ނޫހުން ރިޕޯޓްކޮށްފައިވާ ގޮތުގައި އަލް-އަސަދު ވިދާޅުވި އެވެ.

ބްލޮކޭޑް ކުރިއަށްދާނަމަ، މިސައިލާއި ޑްރޯން ބޭނުންކޮށްގެން ސައުދީގެ ތެލުގެ ވަސީލަތްތަކާއި، ރިފައިނަރީތަކާއި، ތެޔޮ ބޭރުކުރާ ބަނދަރުތަކަށް ހަމަލާދިނުމަށް ޔަމަނުގެ އަސްކަރިއްޔާ އޮތީ ތައްޔާރަށް ކަމަށް އަލް-އަސަދު އިންޒާރު ދެއްވި އެވެ.

އޭނާ އިތުރަށް ވިދާޅުވީ، ތެޔޮ ވަޅުތަކާއި، ހޮޅިތަކާއި، ޕެޓްރޯކެމިކަލް ކާރުޚާނާތަކުގައި ރޯވުމުގެ ސަބަބުން ތިމާވެއްޓަށް ލިބޭ ގެއްލުންތަކުގެ ޒިންމާ އުފުލަންޖެހޭނީ ސައުދީ އަރަބިއްޔާއިން ކަމަށެވެ.

އާދީއްތަ ދުވަހު، އަންސާރުﷲ ގެ ސިޔާސީ ބިއުރޯގެ އެހެން މެންބަރެއް ކަމަށްވާ އަބްދުﷲ އަލް-ނުއާމީ ވިދާޅުވީ، ސައުދީ އަރަބިއްޔާގައި ޔަމަނުގެ އަސްކަރިއްޔާއަށް ހަމަލާދެވޭ ފަށުގައި "އަގުހުރި އެތައް އަމާޒުތަކެއް" އެބަހުރި ކަމަށެވެ. އަދި މުޅި ސަރަހައްދު އޮތީ ގޮވުމެއްގެ ތުންފަތްމަތީގައި ކަމަށާއި، އެކަން ސައުދީއަށްވެސް އެނގޭނެ ކަމަށް އޭނާ ވިދާޅުވި އެވެ.

އޮފިޝަލް ވިދާޅުވި ގޮތުގައި އަންސާރުﷲ އިން ދަނީ އެކި ގޮތްގޮތް ދިރާސާކުރަމުންނެވެ. އަދި ހިސާރު ނައްތާލުމަށްޓަކައި ކޮންމެ ފަދަ އަގެއް ދައްކަން ޖެހުނަސް އެކަމަށް ތައްޔާރަށް ތިބި ކަމަށް އޭނާ ވިދާޅުވި އެވެ. އަދި ސައުދީއާ ގުޅިގެން އެމެރިކާއިން ޔަމަނާ ދެކޮޅަށް ހަނގުރާމައަށް ނުކުމެއްޖެނަމަ، އެމެރިކާވެސް ބޮޑު ނުރައްކަލެއްގެ ތެރެއަށް ވެއްޓޭނެ ކަމުގެ އިންޒާރު އޭނާ ދެއްވި އެވެ.

"ހިސާރު ނައްތާލުމަށްޓަކައި އެންމެ ބޮޑު އަގު ދައްކަންވެސް އަޅުގަނޑުމެން މިތިބީ ތައްޔާރަށް. މުޅި ސަރަހައްދު މިއޮތީ ގޮވުމެއްގެ ތުންފަތްމަތީގައި، ސައުދީ އަރަބިއްޔާއަށްވެސް މި ހަގީގަތް އެނގޭ،" އަލް-ނުއާމީ އަލް-މަޔާދީންއަށް ކިޔައިދެއްވި އެވެ.

ސައުދީ އަރަބިއްޔާއާއި އެ ގައުމުގެ އަރަބި ބައިވެރިން ޔަމަނާ ދެކޮޅަށް ފުރިހަމަ ހަނގުރާމައެއް ފަށައި، ބްލޮކޭޑް ކުރަން ފެށީ 2015 ވަނަ އަހަރުގެ މާރިޗު 26 ގައެވެ. މި ހަނގުރާމައިގައި އެމެރިކާއާއި ހުޅަނގުގެ އެހެން ގައުމުތަކުން ދިޔައީ އަސްކަރީ، ސިޔާސީ އަދި ލޮޖިސްޓިކް އެހީތެރިކަން ފޯރުކޮށްދެމުންނެވެ.

މި ހަނގުރާމައިގައި އެތައް ހާސް ޔަމަނު ރައްޔިތުންނެއް މަރުވެފައިވާއިރު، ސައުދީއާ ގާތް ގުޅުމެއް އޮތް ޔަމަނުގެ ކުރީގެ ސަރުކާރު އަލުން އިއާދަކުރުމަށް ކުރި މަސައްކަތް ވަނީ ނާކާމިޔާބުވެފަ އެވެ.

ޔަމަނުގެ ކުރީގެ ސަރުކާރުން ގައުމު ދޫކޮށް ފިލައިގެން ދިއުމާ ގުޅިގެން، ޔަމަނުގެ ރައްޔިތުންގެ ދިފާއީ ހަރަކާތް ކަމަށްވާ އަންސާރުﷲ އިން ވަނީ ދައުލަތުގެ ކަންކަން ހިންގުމާ ހަވާލުވެފަ އެވެ.

2022 ވަނަ އަހަރު އދ. މެދުވެރިވެގެން އެކުލަވާލި ނާޒުކު ހަނގުރާމަ ހުއްޓާލުމުގެ އެއްބަސްވުމަށްފަހުވެސް، އެމެރިކާއާއި، އިނގިރޭސިވިލާތާއި، އިސްރާއީލުން ވަނީ ޔަމަނަށް އެތައް ފަހަރަކު ވަރުގަދަ ހަމަލާތަކެއް ދީފަ އެވެ.

މި ހަމަލާތަކުގެ ބޭނުމަކީ، ޣައްޒާގައި އިސްރާއީލުން ހިންގަމުންދާ ގަތުލުއާންމާ ދެކޮޅަށް، އިސްރާއީލުގެ އަމާޒުތަކަށް ސަންޢާއިން ދެމުންދާ ހަމަލާތައް ހުއްޓުވައި، އެ ގައުމުގެ އަސްކަރީ ގާބިލުކަން ކުޑަކުރުމެވެ.