އުރުދުން އަށް އީރާނުން ދިން ހަމަލާ އެއްގައި އެމެރިކާގެ ދެ ސިފައިންގެ މީހުން މަރުވެފައިވާ ކަމަށް އެމެރިކާގެ ސެންޓްރަލް ކޮމާންޑުން ބުނެފި

އުރުދުން އަށް އީރާނުން ދިން ހަމަލާ އެއްގައި އެމެރިކާގެ ދެ ސިފައިންގެ މީހުން މަރުވެފައިވާ ކަމަށް އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުނެފި އެވެ.

މީގެ އިތުރުން އެކަކު ގެއްލިފައިވާ ކަމަށް ވެސް ސެންޓްކޮމް އިން ސޯޝަލް މީޑިއާގައި ކޮށްފައިވާ ޕޯސްޓެއްގައި ހޮނިހިރު ދުވަހު ވަނީ ބުނެފަ އެވެ.

ސެންޓްކޮމް އިން ހާމަކޮށްފައިވާ މައުލޫމާތުގައި ބުނެފައިވަނީ ޖުލައި 17 ވަނަ ދުވަހު އެމީހުން މަރުވެފައިވަނީ އީރާނުން ދިން ބެލިސްޓިކް މިސައިލް އާއި ޑްރޯން ހަމަލާތަކުން ދިފާއުކުރަން އުޅުމުގެ ތެރޭގައި ކަމަށެވެ.

އިތުރަށް ބުނެފައިވަނީ އިތުރު ހަތަރު ސިފައިންނަށް އުރުދުންގެ ހޮސްޕިޓަލެއްގައި ފަރުވާ ދޭން ޖެހުނު ކަމަށެވެ.

ސެންޓްކޮމް އިން ބުނީ، މަރުވި މީހުންގެ އައިޑެންޓިޓީ ހާމަކުރާނީ އެމީހުންގެ އާއިލާ އަށް އެމީހުންނާ ބެހޭ މައުލޫމާތު ހިއްސާ ކުރުމަށްފަހު 24 ގަޑިއިރު ފަހުން ކަމުގަ އެވެ.

މިއާ އެކު އީރާނު ހަނގުރާމަ ފެށުނު ފަހުން މަރުވި އެމެރިކާގެ ސިފައިންގެ އަދަދު މަދުވެގެން 16ށް އަރާފައިވާ ކަމަށް ރިޕޯޓުތައް ބުނެ އެވެ.

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް އިން ވަނީ އެމެރިކާ ސިފައިން ބޭނުންކުރާ އުރުދުންގެ އަލް-އަޒްރާގް ބޭސް އަށް ހޮނިހިރު ދުވަހު ވަރުގަދަ ހަމަލާތަކެއް ދިން ކަމަށް ބުނެފަ އެވެ.

އީރާނުގެ ހެލްތު މިނިސްޓްރީން ހޮނިހިރު ދުވަހު އާންމު ކުރި މައުލޫމާތުގައިވާ ގޮތުން ޖޫން 27 ގެ ފަހުން އެމެރިކާގެ ހަމަލާތަކުގައި އެ ގައުމުން މަރުވި މީހުންގެ އަދަދު ވަނީ 50ށް އަރާފަ އެވެ. އޭގެ އިތުރުން 500 މީހުން ޒަޚަމްވެފައިވާ ކަމަށް ވެސް ވަނީ ބުނެފަ އެވެ. މަރުވި މީހުންގެ ތެރޭގައި އަންހެނުންނާއި ކުޑަކުދިންވެސް ހިމެނޭ ކަމަށް ބުނެފައިވެ އެވެ.