އާދިއްތަ ދުވަހު އީރާނުން ފޮނުވާލި ވައިގެ ހަމަލާތަކަކަށް ރައްދުދެމުންދާ ކަމަށް ކުވައިތުގެ އަސްކަރިއްޔާއިން ބުނެފި، ބަހްރައިންގައި އިންޒާރުގެ ސައިރަން އަޅައިފި

ކުވައިތުގެ އިންޖީނުގެއަކަށާއި ތެޔޮ ރައްކާކުރާ މަރުކަޒަކަށް އަމާޒުކޮށް އީރާނުން ވަރުގަދަ ހަމަލާތަކެއް ދިންތާ އެއްދުވަސް ފަހުން، އާދީއްތަ ދުވަހުވެސް އީރާނުން ފޮނުވާލި ވައިގެ ހަމަލާތަކަކަށް ރައްދުދެމުންދާ ކަމަށް ކުވައިތުގެ އަސްކަރިއްޔާއިން ބުނެފި އެވެ.އާދީއްތަ ދުވަހުވެސް އީރާނުން ފޮނުވާލި ވައިގެ ހަމަލާތަކަކަށް ރައްދުދެމުންދާ ކަމަށް ކުވައިތުގެ އަސްކަރިއްޔާއި

ކުވައިތުގެ އަސްކަރިއްޔާއިން ނެރުނު ބަޔާނެއްގައި ބުނެފައިވަނީ، އީރާނުން ދެމުންދާ ނޭދެވޭ އުދުވާނީ ހަމަލާތަކާ ގުޅިގެން، އެ ގައުމަށް އަމާޒުވަމުންދާ މިސައިލް އަދި ޑްރޯން ހަމަލާތަކުން ދިފާއުވުމުގެ މަސައްކަތް ކުވައިތުގެ އެއާ ޑިފެންސް ފޯސްއިން މިހާރު ކުރަމުންދާ ކަމަށެވެ.

މީގެ އިތުރުން، ކުވައިތުގެ ރަސްމީ ނިއުސް އެޖެންސީ "ކޫނާ" އިން އެކްސްގައި ކުރި ޕޯސްޓެއްގައި ބުނެފައިވަނީ، ހަމަލާތަކުގެ އިންޒާރު ދިނުމުގެ ގޮތުން ކުވައިތުގެ އެކި ސަރަހައްދުތަކުގައި ސައިރަންގެ އަޑު އިވެމުންދާ ކަމަށެވެ.

އީރާނުން އަވަށްޓެރި ގަލްފުގެ ގައުމުތަކަށް މިސައިލާއި ޑްރޯން ބޭނުންކޮށްގެން ހަމަލާދެމުންދާތީ، ބަހްރޭންގައި ވެސް ވަނީ ނުރައްކަލުގެ އިންޒާރު ދޭ ސައިރަން އަޅަން ފަށާފަ އެވެ.

ބަހްރައިންގެ އިންޓީރިއާ މިނިސްޓްރީން ނެރުނު ބަޔާނެއްގައި ބުނެފައިވަނީ، އިންޒާރުގެ ސައިރަން އަޅާފައިވާ ކަމަށާއި، އެހެންކަމުން ހުރިހާ ރައްޔިތުންނާއި އެ ގައުމުގައި ދިރިއުޅޭ މީހުން ކެތްތެރިކަން އިސްކޮށް، އެންމެ ގާތުގައި ހުރި ރައްކާތެރި ތަންތަނަށް ދިއުމަށް އިލްތިމާސްކުރާ ކަމަށެވެ.

މީގެ މަހެއްހާ ދުވަސް ކުރިން އެމެރިކާއާއި އީރާނާ ދެމެދު ވެވުނު ވަގުތީ ހަނގުރާމަ ހުއްޓާލުމުގެ އެއްބަސްވުން މިދިޔަ ހަފުތާގައި އުވާލުމާ ގުޅިގެން، ދެ ގައުމުގެ މެދުގައި ދެމުންދާ ހަމަލާތައް ވަނީ ވަރުގަދަވެފަ އެވެ. މީގެ ސަބަބުން ދެ ގައުމުގެ މެދުގައި ފުރިހަމަ ހަނގުރާމައެއް ފެށިދާނެކަމުގެ ބިރު ވަނީ ބޮޑުވެފަ އެވެ.

އީރާނުގެ ރިވޮލިއުޝަނަރީ ގާޑްސް (އައި.އާރް.ޖީ.ސީ) އިން ބުނި ގޮތުގައި، އިރާގާ ބޯޑަރު ހިއްސާކުރާ އީރާނުގެ އިރުމަތީ ހޫޒިސްތާން ސަރަހައްދުގެ އަހްވާޒް ސިޓީގެ މަތިން ދަތުރުކުރި އެމެރިކާގެ އެމް.ކިއު-9 (MQ9) މަރުކާގެ ޑްރޯނެއް ވަނީ ހިފަހައްޓައި ގޮވައްލާފަ އެވެ.

އެމެރިކާގެ އެއާ ފޯސްއިން މައުލޫމާތުދޭ ގޮތުގައި، އެމް.ކިއު-9 އަކީ މައިގަނޑު ގޮތެއްގައި ޖާސޫސީ މައުލޫމާތު އެއްކުރުމަށާއި، ސަރަހައްދުތައް ބެލެހެއްޓުމަށާއި، އަދި ވައިގެ މަގުން ހަމަލާދިނުމަށް ބޭނުންކުރާ، ދުރުން ކޮންޓްރޯލްކުރެވޭ ބޮޑު ޑްރޯނެކެވެ.