ކުވެއިތު އެއާޕޯޓު އީރާނުގެ ހަމަލާތަކާ ގުޅިގެން ބަންދުކޮށްފި

އީރާނުން ދެމުންދާ ހަމަލާތަކާ ގުޅިގެން، ކުވެއިތު އިންޓަނޭޝަނަލް އެއާޕޯޓަށް ފްލައިޓްތައް ޖެއްސުމާއި ފުރުން ވަގުތީ ގޮތުން މެދުކަނޑާލާފައިވާ ކަމަށް އެ ގައުމުގެ ގައުމީ އެއާލައިން، ކުވެއިތު އެއާވޭސްއިން ފަސިންޖަރުންނަށް އަންގައިފި އެވެ.

ސޯޝަލް މީޑިއާގައި އާންމުވެފައިވާ ފުޓޭޖަކުން ފެންނަ ގޮތުގައި ކުވެއިތުގެ ވައިގެ ބަނދަރަށް ހަމަލާއެއް ވަނީ އަމާޒުވެފަ އެވެ. އެހެން ނަމަވެސް ރަސްމީ އެއްވެސް ފަރާތަކުން މިކަން ކަށަވަރުކޮށްދީފައެއް ނުވެ އެވެ.

އީރާނުގެ ހަމަލާތަކާ ގުޅިގެން ކުވެއިތުގެ ވައިގެ ސަރަހައްދު ބަންދުކުރުމާ ގުޅިގެން، އެ އެއާލައިންގެ ގިނަ ފްލައިޓްތަކެއްގެ ގަޑިތަކަށް ބަދަލު ގެނެސްފައިވާ ކަމަށް އެކްސްގައި ކުރި ޕޯސްޓެއްގައި މީގެ ކުރިން ވަނީ ހާމަކޮށްފަ އެވެ.

ކުވެއިތު އެއާވޭސްގެ ބަޔާނުގައި އިތުރަށް ބުނެފައިވަނީ، ފްލައިޓްތަކަށް އަންނަ ބަދަލުތަކާ ގުޅޭ މައުލޫމާތު ބުކިން ހަދާއިރު ރަޖިސްޓްރީކޮށްފައިވާ ފޯނު ނަންބަރުތަކަށް މެސެޖުގެ ޒަރީއާއިން ފޮނުވަމުންދާނެ ކަމަށެވެ. އެހެންކަމުން ހުރިހާ ފަސިންޖަރުންވެސް ފްލައިޓްތަކުގެ އެންމެ ފަހުގެ މައުލޫމާތު ހޯދަމުން ގެންދިއުމަށް އެ ކުންފުނިން ވަނީ އިލްތިމާސްކޮށްފަ އެވެ.

ކުވެއިތުގައި ހުންނަ އަލްޖަޒީރާގެ ރިޕޯޓަރު ބުނާ ގޮތުގައި، އީރާނުން ފޮނުވާލާފައިވާ މިސައިލްތައް ވައިގެ ތެރޭގައި ހުއްޓުވުމަށް ކުރަމުންދާ މަސައްކަތްތަކާއެކު، ހަތަރުވަނަ ފަހަރަށް އެ ގައުމުގައި މިހާރު ވަނީ ނުރައްކަލުގެ ސައިރަންގެ އަޑު އިވިފަ އެވެ.

ކުވެއިތުގެ އަސްކަރިއްޔާއިން ނެރުނު ބަޔާނެއްގައި ބުނެފައިވަނީ، އީރާނުން ދެމުންދާ ނުރައްކާތެރި ހަމަލާތަކާ ގުޅިގެން، އެ ގައުމަށް އަމާޒުވަމުންދާ މިސައިލްތަކާއި ޑްރޯންތަކަށް ކުވެއިތުގެ އެއާ ޑިފެންސް ސިސްޓަމްތަކުން މިހާރު ރައްދު ހަމަލާދެމުންދާ ކަމަށެވެ.

މީގެ އިތުރުން، ބާރުގަދަ ގޮވުންތަކުގެ އަޑު އިވެމުންދަނީ އެއާ ޑިފެންސް ސިސްޓަމްތަކުން ހަމަލާތައް ހުއްޓުވުމުގެ ސަބަބުން ކަމަށްވެސް އަސްކަރިއްޔާގެ ޖެނެރަލް ސްޓާފުން ނެރުނު ބަޔާނުގައި ފާހަގަކޮށްފައިވެ އެވެ.