ކުވޭތުގެ ވައިގެ ސަރަހައްދު ބަންދުކޮށް، ދަތުރުތައް ރީޝެޑިއުލް ކޮށްފި

އީރާނުން ދެމުންދާ ހަމަލާތަކާ ގުޅިގެން ވައިގެ ސަރަހައްދު ބަންދުކުރުމާ ގުޅިގެން، ކުވެއިތު އެއާވޭޒްގެ ގިނަ ފްލައިޓްތަކެއްގެ ގަޑިތަކަށް ބަދަލު ގެނެސްފިކަން އެ އެއާލައިނުން ހާމަކޮށްފިއެވެ. އެ ކުންފުނިން މިކަން އިއުލާންކޮށްފައިވަނީ އެކްސްގައި ކުރި ޕޯސްޓެއްގަ އެވެ.

ކުވެއިތު އެއާވޭޒްގެ ބަޔާނުގައި ބުނެފައިވަނީ، ފްލައިޓްތަކަށް އަންނަ ބަދަލުތައް ފަސިންޖަރުން ގާތުން ބެލުމަށް އެދޭ ކަމަށާއި، ބުކިން ހަދާއިރު ދީފައިވާ ފޯނު ނަންބަރުތަކަށް މެސެޖުގެ ޒަރީއާއިން އެންމެ ފަހުގެ މައުލޫމާތު ހިއްސާކުރަމުންދާނެ ކަމަށެވެ. ކުވެއިތުގައި ހުރި އަލްޖަޒީރާގެ ރިޕޯޓަރު ބުނި ގޮތުގައި، އެ ގައުމަށް އަމާޒުވަމުންދާ މިސައިލްތައް ވައްޓާލުމުގެ މަސައްކަތް ކުރަމުންދާއިރު، ހަތަރުވަނަ ފަހަރަށް މިހާރު ވަނީ ނުރައްކަލުގެ ސައިރަން އަޅާފަ އެވެ.

ކުވެއިތުގެ އަސްކަރިއްޔާއިން ނެރުނު ބަޔާނެއްގައި ބުނެފައިވަނީ، އީރާނުން ދެމުންދާ ނުރައްކާތެރި ހަމަލާތަކާ ގުޅިގެން، އެ ގައުމުގެ އެއާ ޑިފެންސް ސިސްޓަމްތަކުން މިހާރު ދަނީ ދުޝްމަނުންގެ މިސައިލްތަކާއި ޑްރޯންތަކަށް ހުރަސްއަޅަމުން ކަމަށެވެ.

އަސްކަރިއްޔާގެ ޖެނެރަލް ސްޓާފުން ފާހަގަކުރި ގޮތުގައި، ބާރުގަދަ ގޮވުންތަކުގެ އަޑު އިވެމުންދަނީ އެއާ ޑިފެންސް ސިސްޓަމްތަކުން ދުޝްމަނުންގެ ހަމަލާތައް ހުއްޓުވުމަށް ދޭ ރައްދު ހަމަލާތަކުގެ ސަބަބުންނެވެ.

އީރާނުގެ ސެމީ-އޮފިޝަލް ނިއުސް އެޖެންސީއެއް ކަމަށްވާ ތަސްނީމް އިން ރިޕޯޓްކޮށްފައިވާ ގޮތުގައި، އެމެރިކާގެ އަސްކަރީ ބާރުތައް ގާއިމުވެފައިވާ ގައުމުތަކުން އީރާނުގެ ވަރުގަދަ ރައްދު ހަމަލާތަކަށް ތައްޔާރުވުމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ވަނީ އިންޒާރު ދީފަ އެވެ.

އައި.އާރު.ޖީ.ސީ އިން ވަނީ އެ ގައުމުތަކުގެ ސިވިލް ޑިފެންސް ޔުނިޓްތައް ތައްޔާރުކޮށް، އާންމު ރައްޔިތުން އަސްކަރީ އަމާޒުފަތްތަކާ ދުރަށް ޖެއްސުމަށް ގޮވާލާފަ އެވެ. އީރާނުން ބުނާ ގޮތުގައި އެ ގައުމުތަކުގެ ބިންތައް ބޭނުންކުރެވެނީ އީރާނާ ދެކޮޅަށް ހަމަލާދޭ މަރުކަޒުތަކެއްގެ ގޮތުގަ އެވެ.

ތަސްނީމްގެ ރިޕޯޓުގައިވާ ގޮތުން، އައި.އާރު.ޖީ.ސީގެ އެއްގަމު ސިފައިން ވަނީ ޑްރޯން އާއި މިސައިލް ބޭނުންކޮށްގެން ކުވެއިތުގައި ހުންނަ އެމެރިކާގެ އަސްކަރީ ލޮޖިސްޓިކްސް މަރުކަޒެއް ކަމަށްވާ ކޭމްޕް އަރިފްޖާނަށް ހަމަލާދީފަ އެވެ. އަދި މި ހަމަލާގައި އެތަނުގައި ތިބި ބައެއް މީހުން މަރުވެ ނުވަތަ އަނިޔާވެފައިވާ ކަމަށްވެސް އެ ފަރާތުން ދައުވާކުރެ އެވެ.

މީގެ އިތުރުން، ކުވެއިތުގައި ހުންނަ އެމެރިކާގެ އަލީ އަލް ސާލިމް އެއާ ބޭސްއަށް ހަމަލާދީ، އެތަނުގެ ރާޑަރު ސިސްޓަމްތައް ހަލާކުކޮށްލާފައިވާ ކަމަށްވެސް އައި.އާރު.ޖީ.ސީ އިން ބުނެ އެވެ. މި އޮޕަރޭޝަނުގައި އެ ބޭސްގައި ހުރި ހަތިޔާރު މަރާމާތުކުރާ ހޭންގަރަކާއި ޑްރޯން ފެސިލިޓީއެއް ގޮއްވާލާފައިވާ ކަމަށްވެސް ރިޕޯޓްތައް ބުނެ އެވެ.

ކުވެއިތުގެ އަސްކަރިއްޔާއިން ބުނީ އީރާނުން ފޮނުވާލާފައިވާ މިސައިލްތަކާއި ޑްރޯންތަކަށް  ރައްދު ދެމުންދާ ކަމަށާއި، އާންމު ރައްޔިތުން ރައްކާތެރިކަމުގެ ފިޔަވަޅުތަކަށް ސަމާލުވުމަށް އިލްތިމާސްކުރާ ކަމަށެވެ.