މިއީ ވޯލްޑް ކަޕްގެ ތާރީޚުގައި ވެސް، ފީފާ ރޭންކިންގެ ގަދަ ހަތަރު ޓީމު ސެމީ ފައިނަލް އަށް ދިޔަ ފުރަތަމަ ފަހަރު

ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ރޭންކިންގެ ގަދަ ހަތަރެއްގައި ހިމެނޭ ޤައުމުތައް ފުރަތަމަ ފަހަރަށް ވޯލްޑް ކަޕެއްގެ ސެމީ ފައިނަލް އަށް ދަތުރުކޮށްފައިވާއިރު، މިއީ ތާރީޚީ ކަމެކެވެ. 

މިފަހަރުގެ ވޯލްޑް ކަޕްގެ ސެމީ ފައިނަލް އިން ޖާގަ ހޯދާފައިާ ހަތަރު ޓީމަކީ އެންމެ ފަހުގެ ޗެމްޕިއަން އާޖެންޓީނާ އާއި، އެންމެ ފަހުގެ ރަނައަޕް ފްރާންސް އާއި ސްޕެއިން އަދި އިންގްލެންޑް އެވެ.

މީގެ ތެރެއިން ފީފާ ރޭންކިންގެ އެއް ވަނައިގައި މިވަގުތު އޮތީ ސްޕެއިން އެވެ. ދެ ވަނައިގައި އާޖެންޓީނާ އޮތްއިރު، ތިން ވަނައިގައި އޮތީ ފްރާންސް އެވެ. އަދި ހަތަރު ވަނައިގައި އޮތީ އިންގްލެންޑް އެވެ. މި ހަތަރު ޤައުމު މުބާރާތުގެ ސެމީ ފައިނަލްއާ ހަމައަށް ދަތުރު ކުރުމުގައި މިއަހަރުގެ މުބާރާތަށް ފީފާ އިން ގެނައި ގުރުއަތުލުމުގެ އައު އުސޫލު ވަނީ ބޮޑު އެހީތެރި ކަމަކަށް ވެފައި އެވެ. 

މި ބަދަލާ އެކު ފީފާ އިން ވަނީ ރޭންކިންގެ ގަދަ ހަތަރު ޓީމު، ގުރުގެ ތަފާތު ހަތަރު ފަޅި އަކަށް ބަހާލައިފަ އެވެ. އޭގެ ބޭނުމަކީ ސެމީ ފައިނަލްގެ ކުރިން މި ޤައުމުތައް، އެެއް ޤައުމު އަނެއް ޤައުމާ ވާދަ ކުރަން ނުޖެހޭ ގޮތް ހެދުމެވެ. ނަމަވެސް، މި އުސޫލުގެ ފައިދާ ކޮންމެ ޤައުމަކަށް ވެސް ލިބެން އޮތީ، އެ ޤައުމެއް ހިމެނޭ ގުރޫޕުގެ އެއް ވަނަ ހޯދައިގެންނެވެ. 

މިފަހަރުގެ މުބާރާތުގައި މި ހަތަރު ޤައުމުން ވެސް ވަނީ، އެ ޤައުމެއް ހިމެނުނު ގުރޫޕުގެ އެއް ވަަނަ ހޯދައިފަ އެވެ.

މިކަމުގެ ސަބަބުން، ސްޕެއިން އާއި އާޖެންޓީޏާ އަށް މުބާރާތުގެ ފައިނަލްގެ ކުރިން ބައްދަލު ކުރުމުގެ ފުރުސަތު ވަނީ ބަންދުވެފައި އެވެ. ހަމަ އެއާ އެކު، އިންގްލެންޑް އާއި ފްރާންސް ގުރުގެ ދެ ފަޅީގައި ހިމެނުމުން، މި ދެ ޤައުމަށް ސެމީ ފައިނަލްގައި ބައްދަލު ކުރަން ޖެހުނީ ސްޕެއިން ނުވަތަ އާޖެންޓީނާއާ އެވެ. 

ފީފާ އިން ބުނެފައި ވަނީ މި ބަދަލު ގެންނަން ނިންމީ "ވާދަވެރިކަމުގެ ހަމަހަމަކަން" ޤާއިމު ކުރުމަށާއި، ސެމީ ފައިނަލްއާ ހަމައަށް ދިޔުމަށް ތަފާތު ދެ މަގެއް ކަނޑަ އެޅުމުގެ ބަދަލެއްގެ ގޮތުގައި އެވެ. މިއާ އެކު، އަންގާރަ ދުވަހުގެ ރޭ ކުޅޭ ސެމީ ފައިނަލްގައި ފްރާންސް ނިކުންނާނީ ސްޕެއިންއާ ދެކޮޅަށެވެ. އަދި ބުދަ ދުވަހުގެ ރޭ ކުޅޭ ސެމީ ފައިނަލްގައި އިންގްލެންޑް ނިކުންނާނީ އާޖެންޓީނާއާ ދެކޮޅަށެވެ. 

ފީފާ އިން ރޭންކިން އާންމު ކޮށްފައި ވަނީ 1994 ވަނަ އަހަރު އެވެ. މީގެ ކުރީގެ މުބާރާތް ތަަކަށް ބަލާއިރު، ރޭންކިންގެ ގަދަ ހަތަރު ޤައުމުގެ ތެރޭގައި ހިމެނުނު ބެލްޖިއަމް (2022 ވަނަ އަހަރު)، ޖަރުމަނު (2018 ވަނަ އަހަރު)، ސްޕެއިން (2014) ވަނަ އަހަރު، އިޓަލީ (2010) ވަނަ އަހަރު އަދި ފްރާންސް (2002) ވަނަ އަހަރު ވަނީ ގުރޫޕް ސްޓޭޖް އިން ކަޓައިފަ އެވެ. 1998 ވަނަ އަހަރުން ފެށިގެން ބޭއްވި އެއްވެސް މުބާރާތެއްގައި ގަދަ ހަތަރު ޓީމު އެކުގައި ސެމީ ފައިނަލްއާ ހަމައަށް ގޮސްފައި ނުވެ އެވެ. 

ފީފާ އިން ވަނީ މިދިޔަ އަހަރުގެ ކުލަބު ވޯލްޑް ކަޕްގައި ވެސް މި އުސޫލު ބޭނުން ކޮށްފައި އެވެ. ނަމަވެސް، އެ މުބާރާާތުގެ ސެމީ ފައިނަލް އަށް ދެވުނީ ގަދަ ހަތަރު ސީޑުގެ ތެރެއިން ހަމައެކަނި ރެއާލް މެޑްރިޑަށެވެ. އެހެންކަމުން، މިފަހަރުގެ ވޯލްޑް ކަޕްގައި ފީފާގެ މި ރޭވުން އެންމެ ފުރިހަމަ އަަށް ކާމިޔާބުވެފައިވެ އެވެ.