ސްޕެއިން އާއި ފްރާންސް: އެމްބާޕޭ އާއި ޔަމާލްގެ ކުރިމަތިލުން، ނަތީޖާ ބުރަވަނީ ސްޕެއިން ކޮޅަށް!

ފީފާ ވޯލްޑް ކަޕްގެ ސެމީ ފައިނަލްގައި ސްޕެއިން އާއި ފްރާންސް ބައްދަލު ކުރާ މެޗަކީ މިފަހަރުގެ މުބާރާތުގެ އެންމެ ފޯރި ގަދަ އެއް މެޗަށް ވާނެ އެވެ. ގިނަ ބަޔަކު ދެކޭ ގޮތުގައި އެ މެޗުން މޮޅުވާ ޓީމަކަށް، މިފަހަރުގެ މުބާރާތުގެ ޗެމްޕިއަންކަން ލިބުމުގެ ފުރުސަތު ވެސް ވަރަށް ބޮޑެވެ. 

ޚާއްސަކޮށް ފްރާންސް އާއި ސްޕެއިން އަކީ ބައިނަލްއަޤުވާމީ ފުޓުބޯޅައިގައި އެންމެ ހޫނު ވާދަވެރި ކަމެއް އޮންނަ ދެ ޤައުމު ކަމަށްވާތީ، މިއީ މިފަހަރުގެ ވޯލްޑް ކަޕްގެ އެންމެ ބޮޑު މެޗަށް ވެސް ވާނެ އެވެ. 

އަންގާރަ ދުވަހުގެ ރޭ ޓެކްސަސްގެ ޑަލަސްގައި ކުޅޭ މި މެޗަކީ ފްރާންސްގެ ކެޕްޓަން ކީލިއަން އެމްބާޕޭ އާއި، ސްޕެއިންގެ ޒުވާން ކުޅުންތެރިޔާ ލަމީން ޔަމާލްގެ ވާދަވެރި ކުރިމަތިލުމަކަށް ވާނެ އެވެ. އެމްބާޕޭ އާއި ޔަމާލް ވަނީ މީގެ ކުރިން ސްޕެނިޝް ލީގުގައި ވެސް ވާދަވެރިކަން ދައްކައިފަ އެވެ. ބާސެލޯނާ އާއި ރެއާލް މެޑްރިޑު ކުޅޭ މެޗު ތަކުގައި އޮންނަނީ މި ދެ ކުޅުންތެރިންގެ ވާދަވެރި ކަމެވެ. މިފަހަރު ދެ ކުޅުންތެރިން ވެސް ނިކުންނަނީ ވޯލްޑް ކަޕްގެ ފައިނަލްގެ އުންމީދު ހަގީގަތަކަށް ހެދުމަށެވެ. 

ބާސެލޯނާ އަށް ކުޅެމުން އަންނަ ޔަމާލް އާއި ރެއާލް އަށް ކުޅެމުން އަންނަ އެމްބާޕޭ. | ރޮއިޓާސް

އޮޕްޓާގެ ސުޕަކޮމްޕިއުޓަރުން އަންދާޒާ ކޮށްފައިވާ ގޮތުގައި، މެޗުގެ ފުރިހަމަ ވަގުތުގައި ފްރާންސް އިން މެޗު ކާމިޔާބު ކުރާނެ ކަމަށް ބެލެވެނީ 42.1 އިންސައްތަ އެވެ. ސްޕެއިން އިން ކާމިޔާބު ކުރާނެ ކަމަށް ބެލެވެނީ 31.8 އިންސައްތަ އިންނެވެ. އަދި 26.1 އިންސައްތަ ދައްކަނީ މި މެޗު އިތުރު ވަގުތަށް ދާނެ ކަމަށެވެ. 

ސްޕެއިން އާއި ފްރާންސް އަކީ ވާދަވެރި ދެ ޤައުމު ކަމަށްވާއިރު، މީގެ ކުރިން 38 ފަހަރެއްގެ މަތިން މި ދެ ޤައުމު ވަނީ ބައްދަލު ކޮށްފައި އެވެ. އޭގެ ތެރެއިން 18 މެޗު ސްޕެއިން އިން ކާމިޔާބު ކޮށްފައިވާއިރު، ފްރާންސް އިން ކާމިޔާބު ކޮށްފައި ވަނީ 13 މެޗެވެ. އަދި ހަތް މެޗެއް ނިމިފައި ވަނީ އެއްވަރު ވެގެންނެވެ. 

އެންމެ ފަހުން މި ދެ ޓީމު ބައްދަލު ކޮށްފައި ވަނީ ވެސް ސެމީ ފައިނަލްގެ ދެ މެޗުގައި އެވެ. އެގޮތުން 2024 ވަނަ އަހަރުގެ ޔޫރޯ މުބާރާތުގެ ސެމީ ފައިނަލްގައި މި ދެ ޓީމު ބައްދަލު ކުރިއިރު، 2-1 އިން އެ މެޗު ކާމިޔާބު ކޮށްފައި ވަނީ ސްޕެއިން އިންނެވެ. އެ ފަހަރުގެ ޔޫރޯގެ ފައިނަލްގައި އިންގްލެންޑު ބަލިކޮށް، ސްޕެއިން އިން މުބާރާތް ކާމިޔާބު ކުރި އެވެ. 

އޭގެ ފަހުން 2025 ވަަނަ އަހަރުގެ ޔުއެފާ ނޭޝަންސް ލީގުގެ ސެމީ ފައިނަލްގައި ވެސް މި ދެ ޓީމު ބައްދަލު ކުރި އެވެ. ވާދަވެރި ކުޅުމެއް ފެނުނު ސެމީ ފައިނަލްގެ އެ މެޗު ސްޕެއިން އިން ކާމިޔާބު ކޮށްފައި ވަނީ 5-4 އިންނެވެ. ނަމަވެސް، އެ ފަހަރުގެ ނޭޝަންސް ލީގުގެ ފައިނަލްގައި ސްޕެއިން ވަނީ ޕެނަލްޓީގައި ޕޯޗުގަލް އަތުން ބަލިވެފައި އެވެ. 

2024 ވަނަ އަހަރުގެ ޔޫރޯ ސެމީ ފައިނަލްގައި ފްރާންސް އާއި ސްޕެއިން ބައްދަލު ކުރި މެޗުގައި އެމްބާޕޭ އާއި ޔަމާލް. | ރޮއިޓާސް

މި ދެ ޓީމު އެންމެ ފަހުން ބައްދަލު ކުރި ފަސް މެޗަށް ބަލާއިރު، ސްޕެއިން އިން ވަނީ ތިން މެޗު ކާމިޔާބު ކޮށްފައި އެވެ. އެއީ 2017 ވަނަ އަހަރު ކުޅުނު ބައިނަލްއަޤުވާމީ ރަޙުމަތްތެރި ކަމުގެ މެޗަކާއި، 2024 ވަނަ އަހަރުގެ ޔޫރޯ ސެމީ ފައިނަލް އަދި 2025 ވަަނަ އަހަރުގެ ނޭޝަންސް ލީގުގެ ސެމީ ފައިނަލް އެވެ. 

ފްރާންސް އިން ވަނީ ދެ މެޗު ކާމިޔާބު ކޮށްފައި އެވެ. އެއީ 2014 ވަނަ އަހަރު ކުޅުނު ބައިނަލްއަޤުވާމީ ރަޙުމަތްތެރި ކަމުގެ މެޗަކާއި އަދި، 2021 ވަނަ އަހަރުގެ ނޭޝަންްސް ލީގުގެ ފައިނަލް އެވެ. 

ފީފާ ވޯލްޑް ކަޕްގައި މި ދެ ޓީމު މިހާތަނަށް ބައްދަލު ކޮށްފައި ވަނީ އެންމެ ފަހަރަކު އެވެ. އެއީ 2006 ވަނަ އަހަރުގެ ވޯލްޑް ކަޕްގެ ގަދަ 16 ގައި އެވެ. އެ ފަހަރު ފްރާންސް އިން ވަނީ 3-1 އިން ސްޕެއިން ބަލިކޮށްފައި އެވެ. އެ މެޗުގައި ފްރާންސްގެ ލަނޑުތައް ޖެހީ ފްރޭންކް ރިބެރީ އާއި، ޕެޓްރިކް ވިއޭރާ އަދި ޒިނެދިން ޒިދާން އެވެ.