ރައްޔިތުންގެ މަޖިލީހަކީ ޕްރީ ސްކޫލެއްތަ؟

ދައުލަތުގެ ތިން ބާރުގެ ތެރެއިން އެއް ބާރަކީ ރައްޔިތުންގެ މަޖިލިސް ކަމަށްވާއިރު، އެއީ ވަރަށް ގިނަ މަސްއޫލިއްޔަތުތަކާއި، ބުރަ މަސައްކަތްތަކެއް ހަވާލުވެފައި އޮންނަ ތަނެކެވެ. އެއީ ޤާނޫނު ހެދުމާއި، ބަހުސް ކުރުމާއި، ސަރުކާރު ޒިންމާދާރު ކުރުވަން އޮތް މުއައްސަސާ އެވެ. އެއީ ރައްޔިތުންގެ ޓެކްސް ފައިސާ އިން ކޮންމެ ދުވަހަކު އެތައް ބައިވަރު ފައިސާއެއް ޚަރަދު ކުރަމުން ވެސް އަންނަ މުއައްސަސާ އެކެވެ.

އެހެން ނަމަވެސް، މިހާރު ރައްޔިތުންގެ މަޖިލިސް ފެންނަނީ އެހެން ގޮތަކަށެވެ. ތަންކޮޅެއް ހުތުރު ގޮތަކަށެވެ. މަޖިލީހުގެ ޤަވާއިދު ބުނާ ގޮތުން، ކޮންމެ ހަފުތާއެއްގެ ހޯމަ، އަންގާރަ އަދި ބުދަ ދުވަހު މަޖިލީހުގެ ޖަލްސާތައް ބާއްވަން ޖެހެ އެވެ. އޭގެ އިތުރުން، މަޖިލީހުގެ ކޮމެޓީތަކުގެ މަސައްކަތްތައް ވެސް ކުރިއަށް ގެންދަން ޖެހެ އެވެ. ރައްޔިތުންގެ މަޖިލީހުގެ މެމްބަރެއްގެ މުސާރަ އަކީ 80،000 އަށް ވުރެ ގިނަ ރުފިޔާ އެވެ.

ރައްޔިތުންގެ މަޖިލީހުގެ ޖަލްސާތައް މިހާރު ކެންސަލް ކުރަމުން މި ދަނީ ހަމައެއް، ލަމައެއް ނެތި އެވެ. ހިތަށް އެރީމާ މަޖިލީހުގެ ޖަލްސާ ބާއްވާފައި، ހިތަށް އެރީމާ ޖަލްސާތައް ނުބާއްވަނީ އެވެ. ސަރުކާރު ހިންގާ ޕީއެންސީގެ ސުޕަ މެޖޯރިޓީ އޮތް މަޖިލިސް ފެންނަނީ، ވަރަށް ބޮޑަށް ފަހަތު ފަޔަށް ބުރަވެފައިވާ މަންޒަރެވެ. މިއީ ވަރަށް ކަންނެތް މަޖިލީހެކެވެ. ކުރާނެ މަސައްކަތެއް ނެތި، މުސާރަ ނަގާލައިގެން ތިބުން ނޫން ކަމެއް ނޯވެ އެވެ.

ސްކޫލުތައް ބަންދުވާހެން ނުވަތަ ޗުއްޓީ އަށް ދާހެން މަޖިލިސް ޗުއްޓީ ހަދާލަނީ އެވެ. މި ދުވަސްވަރަކީ ސްކޫލު ޗުއްޓީ ކަމަށް ވުމުން، މަޖިލިސް ވެސް އެ އޮތީ ހެޔޮ ވަރެއްގެ ޗުއްޓީގައި އެވެ. އެހެންޏާ ފަހެ، ހޯމަ ދުވަހާއި، އަންގާރަ ދުވަހުގެ ޖަލްސާތައް އެޖެންޑާ ވެސް ނުކުރަނީ އެވެ. ރަށު ތެރޭގައި ކިޔާ ގޮތުން، މި ހަފުތާގައި ވެސް ދެން މަޖިލީހުގެ ޖަލްސާއެއް ނޯންނާނެ އެވެ. ޖަލްސާ ނުބާއްވާ ސަބަބެއް، ރަސްމީކޮށް މެމްބަރުންނަށް އަންގަނީއެއް ވެސް ނޫނެވެ.

ހަނދާން ހުންނަ ގޮތުން ޕްރީ ސްކޫލުގައި ކިޔަވާއިރު، ބަންދުވާ ދުވަސްތައް ކުރިން އެނގޭނެ އެވެ. ފުރަތަމަ ޓާމުގެ ޗުއްޓީ އާއި، ދެ ވަނަ ޓާމުގެ ޗުއްޓީ އަދި އޭގެ ދޭތެރެއިން އަންނަ މިޑް ޓާމްގެ ޗުއްޓީތައް ވެސް ކުރީ ބައިގައި އެނގެ އެވެ. އެކަމަކު، މަޖިލިސް ޗުއްޓީ އަށް މިދާ ގޮތާާއި، ޖަލްސާތައް ކެންސަލް ކުރާ ގޮތާއި، ޗުއްޓީ ހަދާލާ ގޮތެއް ރައްޔިތުންނަށް ސާފެއް ނުވެ އެވެ. ރައްޔިތުންގެ މަޖިލިސް ހިނގަމުން އަންނަ ގޮތާއި، އެ މަޖިލީހަށް ވާ ގޮތް ރައްޔިތުންނަށް ނޭނގުނީމާ، އެއީ ދެން ވަރަށް ހުތުރު ކަމެއް ނޫން ހެއްޔެވެ؟ 

ޤައުމުގައި މައްސަލަތަކެއް ނެތީއެއް ނޫނެވެ. ސަރުކާރުން ޖަވާބުދާރީ ކުރުވަން ޖެހޭ ކަންކަން އިންތިހާ އަށް ގިނަ އެެވެ. ތަރައްޤީގެ މަޝްރޫއުތައް ރަށް ރަށުގައި ނުފެށި، ސަރުކާރުން ވެފައިވާ ވައުދުތައް ފުއްދުމުގައި އިންތިހާ އަށް ލަސްވެ، ރައްޔިތުންނަށް އެތައް ތަކުލީފުތަކެއް ޖެހެމުންދާއިރު ވެސް، ޖަވާބުދާރީ ކުރުވަން އޮތް މަޖިލިސް ކުރު އަތް މައްޗަށް އޮށޯވެލައިގެން އޮންނަން ވީ ހެއްޔެވެ؟ ޖަލްސާތައް ނުބާއްވަނީ ކުރާނެ މަސައްކަތެއް ނެތިގެނެއް ނޫނެވެ. ސަރުކާރުގެ ގޮނޑި ކޮއްކު ހެދިގެން، ހިސާބަށް ވުރެ ކަންނެތީ އެވެ.