މުއިއްޒުގެ އުރައްޕަތެއް ނެތް އިންޒާރަށް ނަޝީދުގެ ރައްދު
5 ޖުލައި 2026 | އާދީއްތަ 11:58އިދިކޮޅު ސިޔާސީ ލީޑަރުން މުޒާހަރާތަކުގައި ބައިވެރިވެވަޑައިގަންނަވާނަމަ ސެކިއުރިޓީ ކަނޑާލާނެ ކަމަށް ބުނެ ސަރުކާރުން ދޭ އިންޒާރުތަކަށް ކުރީގެ ރައީސް މުހައްމަދު ނަޝީދު ވަނީ ވަރުގަދަ ރައްދެއް ދެއްވާފައި. ރައީސް ނަޝީދު ވިދާޅުވީ ސެކިއުރިޓީ ކަނޑާލި ނަމަވެސް ބިރުދައްކައިގެން މުޒާހަރާއަށް ނުކުތުން ނުހުއްޓުވޭނެ ކަމަށާއި، އެމަނިކުފާނު މަގުމައްޗަށް ނުކުންނަވާނެ ކަމަށް.
ކުރީގެ ރައީސް އަދި އެމްޑީޕީގެ ޗެއަރޕާސަން މުހައްމަދު ނަޝީދާއި ޕާޓީގެ އިސްވެރިން "ވަޒީފާ ބުރާސްފަތި" އިހުތިޖާޖުގައި. | އެމްޑީޕީ
ސިޔާސީ ކަންކަމުގައި އޮބިއެޅުމަކީ މިހާރު ފަސޭހަ ކަމެއް ނޫނެވެ. ސިޔާސީ ބިރު ދައްކައިގެން މީހުން މީހުން ހަންމަތަ ކުރުވި ޒަމާން، ރާއްޖޭގައިވެސް އޮބި ދިޔަތާވެސް ލައްކަ ދުވަސް ވެއްޖެއެވެ. ކަމެއް މަތިކޮށް ނުވަތަ ވަކިގޮތެއް ހަދާފާނޭ ކަމަށް ބުނެ ވެރިކަން ތަކުން އެއްވުން ތަކަށާއި މުޒާހަރާތަކަށް މީހުން ނުކުތުން މަނާކުރުވަން އުޅުންވެސް މިހާރު މާޒީވެ ހިނގައްޖެއެވެ.
އެކަމަކު އެކަން ރަނގަޅަށް އެނގިވަޑައިގަންނަވާނެ އެއްބޭފުޅާ ކަމުގައި މުއިއްޒު ކުޅުއްވަން އެއުޅުއްވީ އެކުޅިއެވެ. ދައުރުގައި އަދި ދުވަސްގަނޑެއް އޮއްވާމެ މާ އަވަހަށް އެޖެއްސެވީ އެހިސާބެވެ. އިދިކޮޅު މީހުން މުޒާހަރާ ކުރިއަ ނުދިނުމުގެ މަންތަރެކެވެ. މުޒާހަރާގައި ލީޑަރުން ބައިވެރިވުމަށް ކުރިމަތިކުރައްވަން އުޅުއްވީ ހުރަހެކެވެ.
މުއިއްޒު އަޅުވަން އުޅުއްވި ހުރަހަކީ "ވެރިކަން ކޮށްފައި ތިބި ބޭފުޅުން މުޒާހަރާގައި ބައިވެރިވާ ވަގުތުތަކުގައި، އެބޭފުޅުންނަށް ސެކިއުރިޓީ ކަނޑާލުމެވެ" ހިތުން މޮޅު އުކުޅެކެވެ. ޔާމީނާއި، އިބޫ އަދި އަންނި މުޒާހަރާގައި ބައިވެރިވުމަށް ބިރު ދެއްކުމުގެ މޮޅު އުކުޅެކެވެ.
މުއިއްޒުގެ މި މޮޅު ހިންތާގައި ނުހިމެނުނު ކަމެއް އެބައޮތެވެ. މުއިއްޒުގެ މި ވެރިކަމުގައި އިދިކޮޅުން ބޭއްވި ބޮޑެތި އެއްވުންތައް ބައި ހެޔޮ ވެދާނެތީ އެންމެ އަޑައިގެ މީހާއަށްވެސް ޖެހި "މަޅި" ފެއިލްވި ކަމެވެ. ކުންފުނިތަކުން އެބަގުތުތަކުގައި ބޭއްވި މަސްދަތުރުތަކެވެ. ސްޓޭޖް ޝޯވތަކާއި ކުޅިވަރު ހަރަކާތްތަކެވެ. އޯޓީ ދީފައި އެވަގުތައް އޮފީހަށްނެރި ހާޒިރީ ބެލެހެއްޓުމެވެ. މިއިން ކަމަކުން އެވެރިންނަށް ދެއްކުނު ބިރެއް އެއްވުންތަކާއި ޖަލްސާތަކުގެ އަދަށް އައި ކުޑަކަމެއް ނެތެވެ.
އެއަށްވުރެ ބޮޑަށް މުއިއްޒަށް އެނގިވަޑައި ނުގަތް އެހެން ހަގީގަތެއްވެސް އެބައޮތެވެ. ނޫންނަމަ އާރާއި ބާރު އަތުގައި އޮތަތީވެ އެކަން ހަނދުމަފުޅަށް ގެންނާން ބޭނުން ނުވިކަމެއް އެބަވެއެވެ. އެމްޑީޕީން ބޭއްވި ފުރަތަމަ މުޒާހަރާއެވެ. އާޓިފިޝަލް ބީޗުގައި ބާއްވަން އުޅުނު ފުރަތަމަ އެއްވުމެވެ. ރަށްރަށުން މީހުން އައުމަށް އޭރޫ އެޅި ހުރަހެވެ. ކަނޑު ފަތާފައި މީހުން މާލެއިން އެތެރެވި އެތެރެވުމެވެ. އެމްޑީޕީގެ ޖަނާޒާ ބޯމައްޗަށް ލައިގެންވެސް ނުކުމެ އާޓިފިޝަލް ބީޗް ފުރާލި ގޮތެވެ. އޭގެ ފަހުން ދެން ފެނުނު ބޮޑެތި މުޒާހަރާތަކެވެ. ކަރުނަގޭސް ބޮއެ ބޮއެގެންވެސް ގެއަށް ވަންނަ ޚިޔާލް ނުކުރުމެވެ. އަސޭމިރުސް ދުމަށް ގުޑުމުގެ ބަދަލުގައި އެދުމުން ރައްކާތެރިކަން ހޯދިގޮތްތަކެވެ. އަންހެންވެރިން ގަޔަށް ޕްރެޝަރުގައި ޖެހި ފެނަށްވެސް ގުޑުމެއް ނައުމެވެ. މިހެންގޮސް މިހާރު މިކުރާ މުޒާހަރާތަކަށް މީހުން ބިރު ކެނޑި އެހާހިސާބަށް ގެންނަން އެހިނގި ކަންކަމުގެ ކޯރެއްގެ ކޯވަރެއްވެސް ދެނެއް ނުހިނގާނެއެވެ. ޚުދު ވެރިކަމަށް ވަޑައިގަންނަވަން މުއިއްޒުވެސް އިސްކޮށް ހުންނަވައިގެން އޭރުގެ އިދިކޮޅުން ކުރި މުޒާހަރާތަކަކީވެސް އެކަންކަމުން ހިތްވަރު ލިބިގެން ކުރި މުޒާހަރާތަކެކެވެ.
ކޮންމެއަކަސް މުޒާހަރާތަކުގެ ފޯރި ކަނޑުވާލަން ނޫންނަމަ އޭގައި އިދިކޮޅު ލީޑަރުން ބައިވެރިވިޔަ ނުދިނުމަށް މުއިއްޒު ތިޔަ ޖެއްސެވީ އާދައިގެ ދެކޮޅު ޖެހޭ ހިސާބެއް ހެނެއް ހީއެއް ނުވެއެވެ. އޭގެ އެއް ހެއްކަކީ އޭރު މުޒާހަރާ ކުރުމުގެ ހައްގު ހޯދައިދިނުމަށް މަސައްކަތް ކުރެއްވި އެއް ލީޑަރު އަދި މުއިއްޒުގެ އިންޒާރު ރައްދުވާ ރައީސް ނަޝީދުގެ ބަސްފުޅެވެ. އެމްޑީޕީގެ ޗެއަރޕާސަން އެދެއްވި ވަރުގަދަ ރައްދެވެ.
ނަޝީދު އެވިދާޅުވީ ފާޅުގައި "ސެކިއުރިޓީ ކަނޑާލިއަސް މުޒާހަރާއަށް ނުކުންނަވާނެ ކަމަށެވެ"
"އަޅުގަނޑުގެ ހިތެއް ނުބުނޭ އެއްވެސް ބޭފުޅަކު ރާއްޖޭގައި ހިތަށް އަރާފާނެ ކަމަށް އެގޮތަށް ބިރެއް ދައްކައިގެން އަޅުގަނޑު މަގުމައްޗަށް ނުނުކުމެ ހުރެދާނެ ކަމަށް. އެއީ އިރާދަކުރެއްވިއްޔާ އެކަން ހިނގާނެ ގޮތެއް ނޫން. އަޅުގަނޑު ނުކުންނާނަން،" ނަޝީދު ވިދާޅުވި އެވެ.
ރީތިކޮށް ނަލަކޮށް ނަޝީދު އެޖެއްސެވީ މުއިއްޒަށް ގޮމެވެ. އެވިދާޅުވީ "އާނދޮގޭއެވެ. މަށަކު ތިޔަގޮތަކަށް ނުހުއްޓުވޭނެ" ކަމަށެވެ. މުއިއްޒުގެ އިންޒާރަށް ދެއްވި އެ ރައްދުން އެފެނުނީ އޭގެ އުރައްޕަތެއް ނޯންނާނެ ކަމެވެ. އިންޒާރު ދެއްވިއިރުވެސް އެއިންޒާރު ފެއިލްވެއްޖެ ކަމެވެ.
