ރައީސް މުޢިއްޒު ކުރެއްވި ޕޯސްޓުގައި، ދެ ނަގޫ ލީ ކަންނެލި ތަކެއް!

ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އަކީ، ވަރަށް ބޮޑު ޕީއާރު ޓީމެއް ގެންގުޅުއްވާ ބޭފުޅެކެވެ. ރައީސް އޮފީހުގެ ޕީއާރު ޓީމުގައި 50 އަށް ވުރެ ގިނަ މުވައްޒަފުން މަސައްކަތް ކުރަމުން އަންނައިރު، އޭގެ ތެރޭގައި މީޑިއާގެ ތަޖުރިބާ ހުންނެވި ބޭފުޅުން ވެސް ހިމެނެ އެވެ. ކޮމިއުނިކޭޝަން މިނިސްޓަރުގެ މަގާމުގައި އެ ހުންނެވީ، އިތުރު ތައާރަފަކަށް ވެސް ބޭނުން ނުވާ ބޭފުޅެކެވެ. އެކަމަކު، މިހާ ބޮޑު ޕީއާރު ޓީމެއް އޮންނައިރު ވެސް، ރައީސް ކުރައްވާ ޕޯސްޓު ތަކުގެ ސަބަބުން އެތައް ބައެއްގެ މަލާމާތާއި، ފުރައްސާރަ ކުރިމަތިވެ އެވެ.

ވެރި ކަމަށް ވަޑައިގެންނެވިތާ ކުރީ ކޮޅުގައި ކުރެއްވި ޕޯސްޓެއް ވެސް ވަރަށް ބޮޑަށް ވައިރަލް ވެގެން ދިޔަ އެވެ. ޤައުމީ ދިދައިގައި އިންނަ ހަނދު ފަޅި އޮތީ އަނެއް ކޮޅަށް ޖައްސަވައިފަ އެވެ. ޤައުމީ ދިދައިގެ ހަނދު ފަޅި މުޅިން ރޯ ނުބައި ކޮޅަކަށް ބައިންދައިގެން ރައީސް މުޢިއްޒު ކުރެއްވި ޕޯސްޓާ އެކު، މުޅި ޤައުމުގެ ފާޑު ކިޔުން އަމާޒުވެގެން ދިޔަ އެވެ. ޚާއްސަކޮށް މިހާ ޤައުމީ އަދި ވަޠަނީ ރައީސް އަކު ކުރެއްވި ޕޯސްޓެއްގައި އެވަރުގެ ގޯހެއް އޮތުމަކީ ކާކު ބަލައި ގަންނާނެ ކަމެއް ހެއްޔެވެ؟

އޭގެ ފަހުން ހޯމަ ދުވަހު ރައީސް މުޢިއްޒު ކުރެއްވި ޕޯސްޓުގައި ވެސް އޮތީ އެފަދަ ބޮޑު މިސްޓޭކެކެވެ. 99 އިންސައްތަ ކަނޑު އޮންނަ، އަދި އެންމެ އިންސައްތައެއް ބިމަށް އޮންނަ މި ރާއްޖޭގެ ރައީސް ކުރެއްވި އެ ޕޯސްޓަކީ ލަދުވެތި ޕޯސްޓެކެވެ. ދިވެހި ކަނޑުގައި އުޅޭ މަސް ފަރިއްކުޅުއްވައިގެން، ދިވެހިންގެ އާދަ ކާދައިގެ ތެރޭގައި އުޅުއްވާ ރައީސް އަކު ކުރެއްވި ޕޯސްޓެއްގައި މިވަރުގެ މިސްޓޭކެއް ވެސް އޮވެގެން ނުވާނެ އެވެ. ޕޯސްޓުތައް ކުރެއްވުމުގެ ކުރިން، މީޑިއާ ޓީމު ލައްވައި ރަނގަޅަށް ބައްލަވާލަން ޖެހޭނެ ނޫން ހެއްޔެވެ؟

ދުނިޔޭގެ ކަނޑުގެ ދުވަހާ ގުޅިގެން ރައީސް މުޢިއްޒު ކުރެއްވި ޕޯސްޓުގައި، ވެލައެއް ފެންނަން އޮވެ އެވެ. ނަމަވެސް، އެ ވެލާގައި ފަސް ފިޔަ ހުރިއިރު، އެކަމަށް އެތައް ބަޔަކު ފާޑު ކިޔަން ފެށި އެވެ. ވެލަ އަކީ ހަތަރު ފިޔަ ހުންނަ އެއްޗަކަށް ވާއިރު، ރާއްޖޭގެ ރައީސް ކުރެއްވި ޕޯސްޓުގައި ވެލާގައި ފަސް ފިޔަ ހިމަނާފައި ހުރުމުން އެތައް ބަޔަކަށް އެކަން ކަމު ނުދިޔަ އެވެ. ފާޑު ކިޔުންތައް އަމާޒުވާން ފެށި އެވެ. 

ހަމަ އެ ޕޯސްޓުގައި ކަންނެލި ތަކެއް ފެންނަން ހުރިއިރު، އެކަން ވީ މާ ބޮޑު ޖޯކަކަށެވެ. އެ ޕޯސްޓުގައި ދައްކާފައިވާ ކަންނެލި ތަކުގައި ދެ ނަގު ހުއްޓެވެ. ކަންނެލި ތަކުގެ ބޯ ކޮޅުގައި ވެސް ނަގުލެވެ. ނަގޫ ކޮޅުގައި ވެސް ނަގުލެވެ. ރާއްޖޭގެ ރައީސް ކުރެއްވި ޕޯސްޓެއްގައި މިވަރުގެ ބޮޑު މިސްޓޭކެއް އޮތުމުން، އެތައް ބަޔަކަށް އެކަން ކަމު ނުދިޔަ އެވެ. ރައީސް ކުރައްވާ ޕޯސްޓުތައް މިއަށްވުރެ ރަނގަޅަށް ބެލެން ޖެހޭނެ ކަމަށާއި، ރާއްޖޭގެ ރައީސް އަކު ކުރި ޕޯސްޓެއްގައި ދެ ނަގު ލީ ކަންނެލި ތަކެއް ހުރުމަކީ ރައީސް އަށް ވެސް ލަދުވެތި ކަމެއް ކަމަށް ގިނަ ބަޔަކު ބުނެފައިވެ އެވެ.

މީޑިއާ ޓީމުގައި މިހާ ގިނަ އަދަދެއްގެ މުވައްޒަފުން ގެންގުޅޭއިރު، މިވަރުގެ ކަންކަން ރަނގަޅު ކޮށްލެވެން ވާނެ އެވެ. ޕޯސްޓެއް ކުރެއްވުމުގެ ކުރިން، ރަނގަޅަށް ބަލާލަން ވާނެ އެވެ. މައްސަލައެއް އޮތްތޯ، ރަނގަޅު ކޮށްލަން ޖެހޭ ކަމެއް އޮތްތޯ ވެސް ބަލާލަން ޖެހޭނެ އެވެ. އެ ދުވަހު ދިދައިގެ ހަނދު ފަޅި އޮތީ ނުބައިކޮށެވެ. މިއަދު ކަންނެލި ތަކުގައި ދެ ނަގޫ ޖަހައިފި އެވެ. ސަމާލުކަން ނުދޭ ނަމަ، މާދަން މިއަށްވުރެ ބޮޑު ލަދެއްގައި ބެދޭނެ އެވެ.