ޞިއްޙީ ގޮތުން ދިވެހިން ދުޅަހެޔޮ ބަޔަކަށް ވެއްޖެ!

ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ސަރުކާރުން، ދުންފަތުން ނަގާ ޑިއުޓީ ބޮޑު ކުރީ ވަރަށް މާތް މަޤުސަދެއްގައި އެވެ. އެއީ ދިވެހި ރައްޔިތުންގެ ޞިއްޙަތަށް އިސްކަން ދިނުމުގެ ގޮތުންނެވެ. ދިވެހި ރައްޔިތުންނަކީ ޞިއްޙީ ގޮތުން ދުޅެހެޔޮ އަދި ޞިއްޙަތު ރަނގަޅު ބަޔަކަށް ހެދުމުގެ މަޤުސަދުގަ އެވެ. ދިވެހި ރައްޔިތުން ދުންފަތާ ދުރު ކުރުމުގެ އިޚުލާސްތެރި ނިޔަތުގައި އެވެ.

ރައީސް މުޢިއްޒު އާއި، ސަރުކާރުގެ ވަޒީރުންނާއި، މަޖިލިސް މެމްބަރުން އަދި ސަރުކާރުގެ އެކި އެކި އިސް ބޭފުޅުން ގެންދެވީ އެކަމުގެ މުހިންމު ކަމުގެ ވާހަކަ ދައްކަވަމުންނެވެ. އެއީ ރައްޔިތުންގެ ޞިއްޙަތަށްޓަަކައި ރައީސް މުޢިއްޒު ވެވަޑައިގެންނެވި ވަރަށް ބޮޑު ޤުރުބާނީ އެކެވެ. ކޮންމެ އަކަސް، ސަރުކާރުން ދުންފަތުގެ ޑިއުޓީ ބޮޑު ކުރުމުގެ މަޤުސަދު ޙާސިލު ވެއްޖެ އެވެ. 

ބަލިވެގެން އަޅުގަނޑުމެން ޑޮކްޓަރަށް ދެއްކީމާ، ޑޮކްޓަރު ދެނީ ބޭހެވެ. ފަސް ދުވަސް ވަންދެން، ތިން އިރު އިރަކު ބޭސް ކާން ބުނެ އެވެ. ފަސް ދުވަސް ފަހުން ދެއްކީމާ، ބަލި ޙާލަތު ރަނގަޅު ވަމުން އަންނަ ކަމަށް ބުނެ، ބޭސް ކާން ޖެހޭ މިންވަރު މަދު ކުރެ އެވެ. އެހެން ދަމުން ދަމުން ގޮސް، މުޅިން ފަސޭހަ ވުމުން ބޭސް ބޭނުން ކުރުން ހުއްޓާލަން ޖެހެ އެވެ. މިފަހަރު މިވީ މިކަހަލަ ގޮތެެކެވެ.

ރައީސް މުޢިއްޒުގެ ސަރުކާރުން ދުންފަތުގެ ޑިއުޓީ ބޮޑު ކުރީ ދިވެހި ރައްޔިތުން ފުރިހަމަ ޞިއްޙަތެއްގައި ބޭތިއްބުމަށެވެ. ބޮޑެތި ބަލި ތަކުން ސަލާމަތް ކޮށްދިނުމަށެވެ. 2023 ވަނަ އަަހަރުގެ ނޮވެމްބަރު މަހުގެ 17 ވަނަ ދުވަހު ރައީސް މުޢިއްޒު ވެރިކަމާ ހަވާލުވެ ވަޑައިގެންނެވިއިރު، ދިވެހި ރައްޔިތުން ތިބީ ބޮޑި ބަލި މަޑު ކަމެއްގެ ތެރޭގައި އެވެ. ރައްޔިތުން ތިބީ އިންތިހާ އަށް ބަލިވެފައި އެވެ. ސަރުކާރަށް ފިޔަވަޅު އަޅަން ވެސް މަޖުބޫރުވާ ޙާލަތުގައި އެވެ.

ރައްޔިތުންގެ ޞިއްޙަތު ސަލާމަތްކޮށް، ފުރިހަމަ ޞިއްޙަތެއްގައި ބޭތިއްބުމަށްޓަަކައި ސަރުކާރުން އެޅި ފިޔަވަޅަކީ ދުންފަތުގެ ޑިއުޓީ ބޮޑު ކުރުމެވެ. ރައްޔިތުން ދުންފަތާ ދުރުކޮށް، ފުޅަހެޔޮ ޞިއްޙަތެއް ހޯދައި ދިނުމަށެވެ. 2024 ވަނަ އަހަރުގެ ނޮވެމްބަރު މަހުގެ އެއް ވަނަ ދުވަހު ސަރުކާރުން އެޅި ފިޔަވަޅާ އެކު، މިއަދާ ހަމައަށް އައިއިރު ދިވެހި ރައްޔިތުން ބަލި ތަކުން ސަލާމަތް ވެއްޖެ އެވެ. ޞިއްޙަތު ރަނގަޅުވެ، ދުޅަ ހެޔޮ ވެސް ވެއްޖެ އެވެ. މުޅިން ހަމަ ފުރާ ފުރިހަމަ ވެއްޖެ އެވެ. 

ދިވެހި ރައްޔިތުން ބަލިން ރަނގަޅުވުމާ އެކު، ހޯމަ ދުވަހު ސަރުކާރުން އެ ހުށަހެޅީ ދުންފަތުން ނަގާ ޑިއުޓީ 50 އިންސައްތަ އިން ކުޑަ ކުރުމަށެވެ. ބަލިން ރަނގަޅުވީމާ، ބޭހުގެ ޑޯޒް ދަށް ކުރާ ބީދައިންނެވެ. ގާތް ގަނޑަަކަށް އެއް އަހަރާއި ހަތް މަސް ދުވަހުގެ ތެރޭގައި ދިވެހި ރައްޔިތުންގެ ޞިއްޙަތު ސަރުކާރުން ސަލާމަތް ކޮށްފި އެވެ. އެކަމުގެ ނަތީޖާއެއްގެ ގޮތުން، ބޭހުގެ ޑޯޒް ޑޮކްޓަރުން ދަށް ކުރާ ބީދައިން، ސަރުކާރުން ކުޑަ ކުރީ ދުންތުން ނަގާ ޑިއުޓީ އެވެ.