ރައީސްގެ ޕޯޑިއަމްގައި ޕީއެންސީގެ ވާހަކަ ނުދެއްކޭ، އެކަމަކު ޕީއެންސީގެ ޕޯޑިއަމްގައި ސަރުކާރުގެ ވާހަކަ ދެއްކޭ؟

ރައީސުލްޖުމްހޫރިއްޔާގެ އޮފީހުގައި އޮތް ނޫސްވެރިންގެ ބައްދަލުވުމެއްގައި، ރައްޔިތުންގެ މަޖިލީހުގެ ކުރީގެ ނައިބު ރައީސް އަޙުމަދު ނާޒިމްއާ މެދު ކަންތައް ވެގެން ދިޔަ ގޮތުގެ ސުވާލު ނޫސްވެރިޔަކު ކުރި އެވެ. ނާޒިމްގެ އިތުބާރު ނެތް ކަމަށް ޕީއެންސީ އިން ހުށަހަޅަން ނިންމީ، ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އަށް، ނާޒިމް އަށް އިތިބާރު ނެތިގެން ތޯ ނޫސްވެރިޔާ ސުވާލު ކުރި އެވެ. އެ ސުވާލުގެ ޖަވާބުގައި ރައީސް މުޢިއްޒު ވިދާޅުވީ، އެއީ ޕީއެންސީގެ ޕޯޑިއަމްގައި ޖަވާބު ދޭން ޖެހޭ ސުވާލެއް ކަމަށެވެ. އެ ވަގުތު އެމަނިކުފާނު ހުންނެވީ ރައީސް އޮފީހުގެ ޕޯޑިއަމްގައި ކަމަށްވާތީ، ޕީއެންސީގެ ވާހަކަ އެ ތަނުގައި ނުދެއްކޭނެ ކަމަށް ރައީސް ވިދާޅުވި އެވެ. 

އެކަމަކު، ދ.މީދޫގައި އާދީއްތަ ދުވަހުގެ ރޭ ޕީއެންސީ އިން ބޭއްވި ޖަލްސާއެއްގައި ރައީސް މުޢިއްޒު އެހަރަ ދައްކަވާލީ ދައުލަތުގެ ވާހަކަ ތަކެވެ. އަޅުގަނޑު ހީ ކުރީ، ޕީއެންސީގެ ޕޯޑިއަމްގައި ރައީސް މުޢިއްޒު ދައްކަވާނީ ހައްތަހާ ވެސް ޕީއެންސީގެ ވާހަކަ ކަމަށެވެ. އެ ޕޯޑިއަމްގައި ދައުލަތާއި ސަރުކާރުގެ ވާހަކަ ތަކާއި، ސަރުކާރުން ކުރާ މަސައްކަތްތަކާއި، ސަރުކާރާ ގުޅުން ހުރި އެއްވެސް ވާހަކައެއް ނުދައްކަވާނެ ކަމަށް ހީ ކުރީމެވެ. އެއީ ރައީސްގެ ޕޯޑިއަމްގައި ޕީއެންސީގެ ވާހަކަ ނުދެއްކޭ ބީދައިން، ޕީއެންސީގެ ޕޯޑިއަމްގައި ސަރުކާރުގެ ވާހަކަ ނުދެއްކޭނެތީ އެވެ. އެއީ އަޅުގަނޑު ނުވަތަ އެހެން މީހަކު ބުނި ބުނުމެެއް ނޫނެވެ. ސީދާ ރައީސް މުޢިއްޒު އަމިއްލަފުޅަށް ވިދާޅުވެފައިވާ ވިދާޅުވުމެކެވެ.

އެކަމަކު، ޕީއެންސީ އިން ބޭއްވި ސިޔާސީ ޖަލްސާއެއްގައި، ޕްރެޒެންޓޭޝަން ހައްދަވައިގެން، އަދަދު ތަކެއް ޖައްސަވައިގެން އަރުއްވައި، ރައީސް މުޢިއްޒު އެ ކިޔާލެއްވީ ދައުލަތުގެ ދަރަނީގެ ވާހަކަ އެވެ. ކުރީ ސަރުކާރު ތަކުން ނަގާފައިޥާ ދަރަނި ތަކާއި، އެ އަދަދު ތަކެވެ. މި ސަރުކާރުން ދަރަނި ދެއްކި އަދަދު ރައީސް މުޢިއްޒު ވިދާޅުވީ، "ބ" އަށް ނިކަން ބާރުލައްވައިފަ އެވެ. ބިލިއަނުން ދަރަނި މި ސަރުކާާރުން ދެއްކި ވާހަކަ އާއި އަދަދުތައް ރައީސް މުޢިއްޒު ވިދާޅުވަމުން ގެންދެވިއިރު، އެމަނިކުފާނު ހުންނެވީ ޕީއެންސީގެ ޕޯޑިއަމެއްގައި އެވެ. އެއް ފަހަރު ވިދާޅުވާ ވާހަކަ އަކާއި، ދެން ވިދާޅުވާ ވާހަކަ އަދި ކުރައްވާ ކަންތައް ދިމާވާ އެއް ކަމެއް ވެސް ނެތީ އެވެ.

އެ ޕްރެޒެންޓޭޝަން ދެއްވަމުން ރައީސް މުޢިއްޒު ވަނީ، ކުރީގެ ސަރުކާރު ތަކުން ދަރަނި ނަގާފައިވާ ވާހަކަ ވިދާޅުވެފައި އެވެ. ދަރަނީގެ ވާހަކަ ރައީސް މުޢިއްޒު ދައްކަވާއިރު، އެއީ ކުރީ ސަރުކާރު ތަކުން ކޮށްފައިވާ ފާފައެއްގެ ގޮތުގައި ސިފަވާ މިންވަރަށް އެ ވާާހަކަ ދައްކަވަ އެވެ. މިއީ ރައީސް މުޢިއްޒު ދަރަނީގެ ވާހަކަ ދެއްކެވި ފުރަތަމަ ފަހަރެއް ވެސް ނޫނެވެ. ކުރީ ސަރުކާރުން ދަރަނި ނަގާފައި އޮތީމާ، އެކަމާ އިންތިހާ އަށް ކޯފާވެ ހުންނަވައި ވާހަކަ ދައްކަވަމުން ދިޔައިރު، މި ސަރުކާރުން ނެގި ދަރަނި ތަކުގެ ވާާހަކަ ވެސް ރައީސް ދެއްކެވި އެވެ. އަޅުގަނޑު ހިތަށް އެރި އެވެ. ދަރަނި ނެގުމަކީ އެހާ ގޯސް ކަމަކަށް ވާ ނަމަ، ރައީސް މުޢިއްޒުގެ ސަރުކާރުން ދަރަނި ނަގަނީ ކީއްވެ ހެއްޔެވެ؟ 

އަނެއް ވާހަކަ އަކަށް ރައީސް މުޢިއްޒު ވިދާޅުވީ އެތެރޭގެ ދަރަނީގެ ވާާހަކަ އެވެ. ކުރީ ސަރުކާރު ތަކަށް ވުރެ، މި ސަރުކާރުގައި އެތެރެއިން ނަގާފައިވާ ދަރަނިތައް ބޮޑެވެ. އެ ވާހަކަ ރައީސް މުޢިއްޒު ވިދާޅުވީ، ކުރީ ސަރުކާރު ތަކަށް ވުރެ މި ސަރުކާރުގެ އެތެރޭގެ ދަރަނި ކޮންމެ ވެސް ވަރަކަށް މަތިވި ނަމަވެސް، ބޭރުގެ ދަރަނިތައް މަދުވާނެ ކަމަށެވެ. މިއީ ވެސް އަޖައިބެކެވެ. އެތެރެއިން ނެގިޔަސް، އަދި ބޭރުން ނެގިޔަސް ދަރަނި ވާނީ ދަރަންޏަށް ނޫން ހެއްޔެވެ؟ މި ވާހަކަ ދެކޮޅު ޖައްސާނެ ގޮތެއް އަޅުގަނޑަށް ނުވިސްނުނެެވެ. ފަހަރުގައި ރައީސް މުޢިއްޒު ކަހަލަ އިކޮނޮމިސްޓަކަށް ނުވީމާ ކަމަށް ވެސް ވެދާނެ އެވެ.

އެކަމަކު އެއް ކަމެއް ޔަޤީން ވެއްޖެ އެވެ. ރައީސްގެ ޕޯޑިއަމްގައި ހުންނެވި ނަމަވެސް، އަދި ޕީއެންސީގެ ޕޯޑިއަމްގައި ހުންނެވި ނަމަވެސް، ރައީސް މުޢިއްޒު ދައްކަވަން ބޭނުންފުޅުވާ ވާހަކައެއް ނަމަ ދައްކަވާނެ އެވެ. ހިތްޕުޅާ ނުވާ ސުވާލެއް ވެއްޖެ ނަމަ، ރައީސްގެ ޕޯޑިއަމްގައި ހުންނެވީތީ އެ ވާހަކައެއް ނުދެއްކެވޭނެ އެވެ. ހިތްޕުޅާ ވާ ކަމެއް ނަމަ، ޕީއެންސީގެ ޕޯޑިއަމްގައި ހުންނަވައި ސަރުކާރުގެ ވާހަކަ ވެސް ދައްކަވަންވީ އެވެ.