ރައްޔިތުންގެ ޝަކުވާ އިންތިހާ، ނަމަވެސް މެންބަރު ސުޖާއުގެ ކަންބޮޑުވުމެއް ނެތް؟

ރައީސް ޑޮކްޓަރު މުޙައްމަދު މުޢިއްޒު ރައްޔިތުންގެ މަޖިލީހުގެ މެމްބަރުންގެ އަންގަ ބަންދު ކުރުމަށް ގާނޫނެއް ހަދައި، ރައްޔިތުންގެ ޝަކުވާތައް ނުވަތަ ކަންބޮޑުވުންތައް މަޖިލީހުގައި އިއްވުމުގެ ފުރުސަތު ވެރިކަން ކުރާ ޕާޓީ ޕީއެންސީގެ މެންބަރުންނަށް ގެއްލުވާލާފައިވާ ކަމީ އެންމެން ދަންނަ ހަގީގަތެކެވެ.

މީގެ އިތުރުން ސަރުކާރުގަ ނުފޫޒު ގަދަ މެންބަރުން ލައްވާ ފެންނަން ހުންނަ ކަންކަން އޮޅުވާލަން ކުރާ މަސައްކަތް ވެސް ކުޑައެއް ނޫނެވެ. ދައްކަން މިއުޅެނީ ބުދަ ދުވަހުގެ މަޖިލީހުގެ ޖަލްސާގައި ބާރުށު ދާއިރާގެ މެމްބަރު އިބްރާހީމް ޝުޖާއު ދައްކައިގެން އުޅޭ މޮޅު ވާހަކަ އެވެ.

ޝުޖާއު ވިދާޅުވާ ގޮތުން ނަމަ ރައްޔިތުން ހާސްވާން ޖެހޭ ހަމަ އެންމެ ސަބަބެއް ވެސް ނެތެވެ. ބޭހާއި ކާޑުގެ ބާވަތްތައް ލިބުމުގައި ވެސް ހަމަ އެއްވެސް ދަތި ކަމެއް ނެތެވެ. އަދި ޑޮލަރު ލިބުމުގައި ވެސް އެއްވެސް ދަތި ކަމެއް ނެތެވެ. މިއީ މެމްބަރު ޝުޖާއު މިމޭރުމުން ވާހަކަ ދައްކާ ރައްޔިތުންނަށް އޮޅުވާލަން މަސައްކަތް ކުރި ފުރަތަމަ ފަހަރެއް ނޫނެވެ. މީގެ ކުރިން ވެސް ސްކޫލް ތަކަށް އިންޓަނެޓް ލިބެން ފެށީ ވެސް ރައީސް މުއިއްޒު ވެރިކަމަށް ވަޑައިގެން ފަހުން ކަމަށް ވިދާޅުވެ އޮޅުވާލަން މަސައްކަތް ކޮށްފައިވެ އެވެ.

އެހެން ނަމަވެސް ސޯޝަލު މީޑިއާ ނުވަތަ މަގު މައްޗައް ނުކެމެ ކޮންމެ މީހެއް ކައިރި އަހާލިޔަސް ބުނަނީ ބޭސް ނުލިބޭ ވާހަކަ އާއި ތަކެތީގެ އަގު އިންތިހާ އަށް ބޮޑު ވަމުންދާ ވާހަކަ އެވެ. މެމްބަރަށް އަތްފޯރާ ހަމައިގައި ތަކެތި ހުންނާތީ އާންމު ރައްޔިތުންގެ ކަންބޮޑުވުންތައް ފަހުމް ނުވަނީ ކަމަށް ވެސް ވެދާނެ އެވެ. ނޫނީ މެމްބަރަށް ބޭސް ކުރަން ބެންކޮކް ނުވަތަ ދުބާއީ ފަދަ ތަންތަނައް ދެވޭތީ ފަހުމް ނުވަނީ ކަމަށް ވެސް ވެދާނެ އެވެ.

މެމްބަރު ޝުޖާއު މިފަދައިން ވާހަކަ ދައްކާފައިވާއިރު އާސަންދަ ކުންފުނީގެ މެނޭޖިން ޑިރެކްޓަރ އާމިނަތު ޒީނިޔާ ވަނީ ރައްޔިތުން ބޭނުންވާ ބޭސް ނުލިބޭ ކަމަށް އެއްބަސްވެފައި އެވެ. އަދި 2026 މެއި 24 ގައި ރައީސުލްޖުމްހުރިއްޔާ "ނޭޝަން ޗެޓް" ޕްރޮގުރާމުގައި ބޭސް ލިބުމުގެ ދަތި ތަކަށް ހައްލެއް ހޯދުމަށް 2 މަސް ދުވަހުގެ ޑެޑްލައިނެއް ވެސް ވަނީ ދެއްވައި ފައެވެ. 

ޕީއެންސީގެ މެންބަރުން ކިތަންމެ ވަރަކަށް ހަގީގަތް އޮޅުވާލަން މަސައްކަތް ކުރިޔަސް އެ ވާހަކަތައް ގަބޫލު ކުރާނެ ދިވެއްސަކު ނެތެވެ. އެއަށް ވުރެ ދިވެހިން މާ ބޮޑަށް ހޭލުންތެރި ވެއްޖެކަން، އެންމެ ފަހުން ނެގި ރެފެރަންޑަމް އިން ވަނީ ރައީސް މުއިއްޒު އާއި ޝުޖާއުމެން ފަދަ މެންބަރުންނަށް ދައްކައިދީފައި އެވެ. މުޅި ދައުލަތާ ދެކޮޅައް ރައްޔިތުން ނިކުމެ %70 އިން ބޮޑުތަނުން ބަލިކޮށްލީ އެވެ. ނަމަވެސް ދެރައީ އަދިވެސް މިކަމުން ފިލާވަޅު ނުނަގައި، ރައްޔިތުންނަށް އޮޅުވާލަން މަސައްކަތް ކުރާތީ އެވެ.