ޑޮަލަރުގެ އަގު ތިރިކުރަން އަމިއްލަ އަށް ވީ ވައުދުގައި ސައީދު ތާށިވެފައި!

2024 ވަނަ އަހަރު އޮތް ރައްޔިތުންގެ މަޖިލީހުގެ ކެމްޕެއިންގެ ތެރޭގައި އިކޮނޮމިކް މިނިސްޓަރު މުޙައްމަދު ސައީދު ވިދާޅުވި އެވެ. ސަރުކާރަށް މަޖިލީހުގެ މެޖޯރިޓީ ދީފި ނަމަ، ޑޮލަރުގެ އަގު ތިރި ކުރާނެ ވާހަކަ އެވެ. ހަމައެކަނި ސަރުކާރަށް މަޖިލީހުގެ މެޖޯރިޓީ ލިބިގެން ވިޔަސް، ދިވެހި ރުފިޔާ ޑޮލަރުގެ ކުރިމަތީގައި 30 އާއި 40 އިންސައްތަ ވަރުގަދަ ވާނެ ކަމަށް ވިދާޅުވި އެވެ. 

އެކަމުގެ ނަތީޖާ އަކީ 15.42 އަށް ވުރެ ވެސް ޑޮލަރުގެ ރޭޓް ދަށަށް ދިޔުން ކަމަށް ސައީދު ވިދާޅުވި އެވެ. އެ ދުވަހު، އެމްޑީޕީ އިން ފައިސާ ޗާޕު ކުރި ވާހަކަ އާއި، އެކަމުގެ ސަބަބުން ޑޮލަރުގެ އަގު ތިރި ނުވާނެ ކަމުގެ ވާހަކައެއް ނުދައްކަވަ އެވެ. ސައީދުގެ އެ އަވާ މެންދުރުގައި ޖެހި، ދިވެހި ރައްޔިތުން ސަރުކާރަށް މަޖިލީހުގެ މެޖޯރިޓީ ދިނީ ތިޔަހެނަކުން ނޫނެވެ. އެކަމަކު، މިއަދު ޑޮލަރުގެ އަގު ހުރީ 20 ރުފިޔާ އަށް ވުރެ ވެސް މަތީގައި އެވެ.

ސަރުކާރަށް މަޖިލީހުގެ މެޖޯރިޓީ ދިންތާ ދެ އަހަރަށް ވުރެ ގިނަ ދުވަަސް ވެގެންދާއިރު ވެސް، ޑޮލަރުގެ އަގު ތިރި ވެގެން ނުދެ އެވެ. ވެގެން އުޅެނީ ކޮން ގޮތެއް ކަމެއް ސާފެއް ނުވެ އެވެ. އެކަމުގެ ސުވާލު އަމާޒު ވާނީ ވެސް ސައީދު ނޫން ދެން ކާކާ ހެއްޔެވެ؟ ހޯމަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި މެމްބަރަކު ސުވާލު ކުރި އެވެ. ސައީދު އަމިއްލަ އަށް ވައުދުވީ ގޮތަށް ޑޮލަރުގެ އަގު ތިރި ނުވެގެން އުޅޭ މައްސަލައިގަ އެވެ. 

މެމްބަރު ވިދާޅުވީ އެމްޑީޕީ އިން ފައިސާ ޗާޕު ކުރި ވާހަކަ އާއި، އެކަމުގެ ސަބަބުން ޑޮލަރުގެ އަގު މައްޗަށް އަރައިގެން ދިޔަ ކަމަށް މިއަދު ސައީދު ތަކުރާރުކޮށް ވިދާޅުވާއިރު، 2024 ވަނަ އަހަރުގެ މަޖިލިސް ކެމްޕެއިންގައި ޑޮލަރުގެ ވައުދުވީ އެކަން ނޭނގިތޯ އެވެ. ނުވަތަ އެކަމާ ގުޅޭ އެއްވެސް ދިރާސާއެއް ނުކޮށް ތޯ އެވެ. އެ ސުވާލަށް ދެއްވާނެ ޖަވާބެއް ސައީދުގެ އަތުގައި ނެތެވެ. ޖަވާބެއް ނުދެއްވި އެވެ. ނުވެސް ދެއްވޭނެ އެވެ. 

ސަރުކާރުގެ ކުރީ ކޮޅު ތަކުރާރުކޮށް ސައީދު ވިދާޅުވަމުން ގެންދެވީ ޑޮލަރުގެ މައްސަލަ ޙައްލު ކުރައްވާނެ ކަމަށެވެ. އަގު ތިރި ކުރައްވާނެ ކަމަށެވެ. ނަމަވެސް، ސަރުކާާރުގެ ތިން ވަނަ އަހަރު ހަމަވާން ދާއިރު އަދި ވެސް ޑޮލަރުގެ މައްސަލަ އޮތީ އޮތް ގޮތަށެވެ. އެއް ދުވަހުން އަނެއް ދުވަހަށް އެ މައްސަލަ ދަނީ ބޮޑު ވަމުންނެވެ. ހުރިހާ ތަކުލީފަކާއި، ނިކަމެތި ކަމެއް އޮތީ ރައްޔިތުން މީހާ އަށެވެ. މިއަދު ސައީދުގެ ދުލަށް އަންނަހާ ވެސް އެއްޗަކީ، ކުރީ ސަރުކާރެވެ. އެމްޑީޕީ ސަރުކާރެވެ. ފައިސާ ޗާޕު ކުރީ އެވެ. މިއީ ހައްތަހާ ވެސް ބަހަނާ އެވެ. 

އެހެނީ، އެ ވައުދުވީ ދުވަހު ސައީދު އެ ވާހަކަ ނުދައްކަވަ އެވެ. އެމްޑީޕީ އިން ފައިސާ ޗާޕު ކުރި ކަމާއި، އެކަމުގެ ސަބަބުން ޑޮލަރުގެ މައްސަލަ ޙައްލު ނުވާނެކަން އެ ދުވަހު ވެސް ސައީދު އަށް އެނގެން ވާނެ އެވެ. އެ ދުވަހު ޑޮލަރުގެ ވައުދު ވާން ޖެހޭނީ ވެސް، އެކަމަށް ރަނގަޅު ދިރާސާއެއް ކުރުމަށް ފަހު އެވެ. އެކަން އޮތް ގޮތް ރަނގަޅަށް ބައްލަވައިފަ އެވެ. އެއްވެސް ދިރާސާއެއް ކުރުމެއް ނެތި، ސަރުކާރަށް މަޖިލީހުގެ މެޖޯރިޓީ ދިނުމުން ޑޮލަރުގެ އަގު ތިރި ކުރައްވާނެ ކަމަށް ސައީދު ވިދާޅުވީ އަމިއްލަ އަށެވެ. މީހަކު ބުނެެގެނެއް ވެސް ނޫނެވެ.

މިއަދު ޑޮލަރުގެ ވައުދު ނުފުދި، ޑޮލަރުގެ އަގު ތިރި ނުވެ، މައްޗަށް އަރަމުން ދަނީ ސައީދުމެންގެ ދޯހަޅި ކަމުންނެވެ. ސަރުކާރުގެ ސިޔާސަތު ތަކުގެ ސަބަބުންނެވެ. ޕޯޑިއަމް ތަަކަށް އަރައި، މޮޅެތިހާ ވާހަކަ ދައްކަވައި، ސަޅި ބައިސާ ކަނޑުއްވައިގެން ވާނެ ފައިދާއެއް ނެތެވެ. ސައީދު ވިދާޅުވި ގޮތަށް ޑޮލަރުގެ ވައުދު ނުފުދުނީމާ، ރައްޔިތުން ޝަކުވާ ކުރާނެ އެވެ. އެކަމުން ރެކެން މިއަދު ދައްކާ ބަހަނާ އިން ބޭޒާރު ވާނީ ސައީދުމެންނެވެ. ރައްޔިތުންގެ ކުރިމަތީގައި ވެއްޓޭނީ ހަމަ ސައީދުމެންގެ އަގެވެ.