ނަމޫނާ ނަގަންވީ ޕީއެންސީގެ ބޮޑު މާރާމާރީންތަ؟

އެހެން ބައެއްގެ ކަމެއްނަމަ މިހާރު ހީވީހީ އުޑު ބޮލަށް ވެއްޓިގެން އުޅޭ ހެންނެވެ. ގޮވާނީ އާދައިގެ ވާހަކަތަކެއް ނޫނެވެ. ނުކިޔާކަ އެއްޗެއް ނާނބުރާނެ ވާހަކައެއް ނޯންނާނެ އެވެ. ދީނީ ތާކިހާ އަޅައިގެން އުޅޭ ސިޔާސީ މީހުންގެ ރައުޔުތައްވެސް މަތިމައްޗަށް އޮހުނީހެވެ.

މިދައްކަނީ ޕީއެންސީގެ އެތެރޭގެ ހަމަނުޖެހުމެގެ ވާހަކައެވެ. އިންތިޚާބު ތެރޭގައި ކަރުމާރު ހިފައި ތަޅައިގެން ވާހަކައެވެ. ޓިކެޓް ދިނުމުގެ ޖަލްސާވެސް ފުލުހުން ވަންނަން ޖެހުނު ވެރިކަން ކުރާ ޕީއެންސީން ބޭއްވި އެތެރޭގެ އިންތިޚާބުގައި މާރާމާރީ ހިންގައި ދައުލަތުގެ މުދަލަށް ގެއްލުންދިން ވާހަކަ އެވެ.

މާރާމާރީ ހިންގައި ހަމަނުޖެހުން ހިނގީ ހުޅުމާލޭ ދެވަނަ ފިޔަވަހީގައި ހުންނަ ކާމިލުދީދީ ސްކޫލުގައި ހުރި ހުޅުމާލެ އުތުރު ދާއިރާ ވޯޓު ފޮށި ކައިރީގަ އެވެ. އެ ހަމަނުޖެހުމުގެ ވީޑިއޯތަކުން ފެންނަ ގޮތުގައި ދެ ގްރޫޕެއްގެ މެދުގައި ބަހުގަ ހަމަލާ ބަދަލުކޮށް އެކަކު އަނެކަކަށް ހަމަލާ ދީފައިވެ އެވެ. އަދި އެ ސްކޫލުގެ ބައެއް ގޮނޑި އާއި މޭޒަށް ވެސް ގެއްލުން ދީފައިވެ އެވެ. އަދި އެސްކޫލުގެ ހޯލަށް ވަންނަން ބޭނުންކުރާ ދޮރުގެ ބިއްލޫރިތަކެއް ތަޅާލައި އެ ދޮރު ބޭނުންނުކުރެވޭ ވަރަށް ވަނީ ހަލާކުވެފަ އެވެ. ހަމަނުޖެހުން ކޮންޓްރޯލް ކުރުމަށް ފުލުހުން މަސައްކަތް ކުރާ މަންޒަރު ވެސް ވީޑިއޯއިން ފެނެ އެވެ.

ނަމޫނާ ބައެއް ކަމަށް ދެކި އެހެން ޕާޓީތަކަށް ބަހުގެ ހަމަލާތައް ރައްދުކުރަމުންދާ ޕީއެންސީ ހިންގި މާރާމާރީގައި ސަރުކާރުގެ ސިޔާސީ މަގާމުތަކުގައި ތިބި ބައެއް މުވައްޒަފުންވެސް ވަނީ ބައިވެރިވެފަ އެވެ. އެގޮތުން މި ސަރުކާރުގެ ސިޔާސީ މަގާމުތަކުގައި ތިބި ބައެއް މުވައްޒަފުން ވެސް މާރާމާރީ ހިންގާ މަންޒަރު އާންމުވެފައިވާ ވީޑިއޯތަކުން ފެނެ އެވެ. އޭގެތެރޭގައި ރައީސް އޮފީހުގެ ޕަބްލިކް ރިލޭޝަންސް ވަޒީފާއެއްގައި ހުންނަ އިސްމާއިލް އަޒުމީ އާއި ސަރުކާރުގެ ސީނިއާ ޕޮލިޓިކަލް ޑިރެކްޓަރެއްގެ މަގާމުގައި ހުންނަ މުހައްމަދު ޔައިޝް އެ ވީޑިއޯތަކުން ފެނިގެން ދެއެވެ.

ނަމޫނާއެއް ކަމަށާއި އެހެން ޕާޓީތަކުން މިސާލު ނެގުމަށް އަބަދުވެސް ހަނދާންކޮށްދެމުންދާ ޕީއެންސީން މި މާރާމާރީ ހިންގާފައި މިވަނީ އެހެން ޕާޓީތަކުން ނަމޫނާއަކަށް ޕީއެންސީ ބެލުމަށް ޕީއެންސީގެ ޗެއަރޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އެއިންތިޚާބުގެ ކުރިން ގޮވާލައްވާފައިވަނިކޮށެވެ. މާރާމާރީގެ ފަހުން އަބްދުއްރަހީމް އާއި އެޕާޓީގައި އެންމެ ގަދައަށް އެހެން ޕާޓީތަކަށް ގަޅި އުއްކަވާ ޕީއެންސީ ޕީޖީ ލީޑަރު ފަލާހުވެސް ވަނީ ވަޑައިގަންނަވާފަ އެވެ. އަބްދުއްރަހީމް އާއި ފަލާހު އެ ސްކޫލަށް ވަޑައިގަތީ އެ ތަނުގެ މަސްލަހަތު ގެއްލި މާރާމާރީ ހިންގުމާ ގުޅިގެން ވޯޓު ގުނުން ހުއްޓިފައި އޮއްވަ އެވެ. އެ ދާއިރާގެ ވޯޓު ފަހުން ގުނާފައި ވަނީ އެ ދެ ބޭފުޅުންގެ ހާޒިރުގަ އެވެ.

އެކަމަކު ހެއްވާ ކަމަކީ މިއިން އެއްވެސް ކަމަކަށް އެއްޗެއް ވިދާޅުވާން އެއިން ބޭފުޅަކަށް ކެރިވަޑައި ނުގަން ހަނު ތިއްބެވުމެވެ. އަމުދުން ހަމަނުޖެހުމުގައި ކާމިލް ދީދީ ޕްރީސްކޫލަށް ލިބުނު ގެއްލުމާ ގުޅޭގޮތުންވެސް ޕީއެންސީން މިހައިތަނަށް އެއްވެސް އެއްޗެއް ބުނެފައެއް ނުވެ އެވެ. އެ ގެއްލުމަށް ޕީއެންސީން ޒިންމާވާނެތޯ އާއި އެ ސްކޫލަށް ލިބުނު ގެއްލުން އެ ޕާޓީން މަރާމާތު ކުރާނެތޯ ސުވާލުކުރުމުންވެސް އަދުރޭއާ ފަލާހުވެސް ސުއްބުވެސް ވިދާޅުވާކަށް ކެރިވަޑައެއް ނުގެންނެވި އެވެ.

މާރާމާރީއަށްފަހު، ސަރުކާރަށާއި މުއިއްޒަށް ތާއީދުކޮށް ސޯޝަލް މީޑިޔާގައި ޕޯސްޓްތައް ކުރަމުންދާ ބައެއް މީހުން ވަނީ އެމާރާމާރީގެ ތުހުމަތު ހުޅުމާލެ އުތުރު ދާއިރާގެ މަޖިލިސް މެންބަރު ހުސައިން ޝަރީފް (ހުސެންބެ) ބޮލުގައި އަޅުވާފަ އެވެ. ހުސައިންބެ ގޭންގެއް ފޮނުވައިގެން ހިންގި މާރާމާރީއެއްކަމަށް އެފަރާތްތަކުން ވަނީ ސޯޝަލް މީޑިޔާގައި ފާޅުކަން ބޮޑު ގޮތެއްގައި ބުނެފަ އެވެ. އެކަމަކު ރައީސް މުއިއްޒުގެ ބަސްފުޅުން ނަމަ މިހާރު ރާއްޖޭގައި ގޭންގެއް ވެސް ނޫޅޭނެ އެވެ.  

ކޮންމެއަކަސް ޕާޓީތަކުގެ އެތެރޭގެ ވާދަވެރިކަމަކީވެސް އޮންނަ އެއްޗެކެވެ. އެކަމަކު މިހާވަރެއް އަރުވާލައި ދައުލަތާއި ރައްޔިތުންގެ މުދަލަށް ގެއްލުންވާވަރުގެ މާރާމާރީއެއް މީގެ ކުރިއަކުން ހިނގާފައެއް ނުވެއެވެ. ޕީއެންސީން އަނެއްކާވެސް މިހެދީ މޮޅު ރެކޯޑެކެވެ. އަދި މިކަމެއް މިހިނގީ ނަމުނާއާއި މިސާލު ޕީއެންސީގެ ފަރާތުން ނެގުމަށް ގޮވާލާފައި ވަނިކޮށެވެ. ސުވާލަކީ ނަމޫނާ ނުވަތަ މިސާލު ނަގަންވީ މި މާރާމާރީން ހެއްޔެވެ؟ ލިބުނު ގެއްލުމަށާއި މާރާމާރީ ކޮންޓްރޯލް ކުރަން އުޅުނު ފުލުހުންނަށް ލިބުނު ގެއްލުމަށްވެސް ބަހެއް ނުބުނެ ހަނު ހުރުމުން ހެއްޔެވެ؟ ބޮޑު ވަރިހަމައަށް ދޫކޮށްލައިގެން ނަގާ ނަމޫނާއެއްގެ ގޮތުގައި ހެއްޔެވެ؟