އެމެރިކާ އަށް ހަނދާން ނުނެތޭވަރުގެ ފިލާވަޅެއް ދޭނަން: އައިއާރުޖީސީ ހައިކޮމާންޑް

އެމެރިކާއަށް ދުވަހަކުވެސް ހަނދާން ނުނެތޭނެ ފަދަ ވަރުގަދަ ފިލާވަޅެއް ދަސްކޮށްދޭނެ ކަމަށާއި، އެއީ އީރާނާ ދެކޮޅަށް އުދުވާނީ ހަމަލާއެއް ދޭން ބޭނުންވާ ކޮންމެ ފަރާތަކަށް އޮތް އިންޒާރެއް ކަމަށް އީރާނުގެ އިސްލާމިކް ރިވެލޫޝަނަރީ ގާޑް ކޯޕްސް (އައި.އާރު.ޖީ.ސީ) އިން ބުނެފި އެވެ.

ހޯމަ ދުވަހު އައި.އާރު.ޖީ.ސީގެ ހައި ކޮމާންޑުން ނެރުނު ބަޔާނެއްގައި ބުނެފައިވަނީ، އީރާނުގެ މިނިވަންކަމާއި އިސްތިގުލާލު ދިފާއުކުރުމުގައި، އިސްލާމީ އިންގިލާބުގެ ލީޑަރު އާޔަތުﷲ ސައްޔިދު މުޖުތަބާ ޚާމަނާއީ ދެއްވާ އިރުޝާދުތަކާއި އަމުރުފުޅުތަކަށް އެ ފައުޖުން ފުރިހަމައަށް ކިޔަމަންތެރިކަން އަދާކުރަމުންދާނެ ކަމަށެވެ.

މި ބަޔާނަކީ، އެމެރިކާއިން އީރާނާ ދެކޮޅަށް އަލުން ފަށާފައިވާ އުދުވާނާ ކުރިމަތިލުމުގައި ގައުމީ އެއްބައިވަންތަކަން އިސްކުރުމަށް ގޮވާލައްވައި، އާޔަތުﷲ ޚާމަނާއީ ދާދި ފަހުން ދެއްވި މެސެޖަކާ ގުޅިގެން ނެރުނު ބަޔާނެކެވެ.

އެމެރިކާއިން އީރާނުގެ ދެކުނުގެ ސަރަހައްދުތަކަށް ވައިގެ މަގުން ބޮން އެޅުމާ ގުޅިގެން ޚާމަނާއީ މި މެސެޖު ދެއްވާފައިވާއިރު، އެމެރިކާގެ މި އަމަލަކީ އިސްރާއީލާ ގުޅިގެން އީރާނަށް ދެމުންދާ ހަމަލާތައް ދާއިމީކޮށް ހުއްޓާލުމަށް މިދިޔަ މަހު އީރާނާއެކު ވެފައިވާ ވަގުތީ އެއްބަސްވުމާ ޚިލާފަށް ހިންގި އަމަލެކެވެ.

"ކުށްވެރި އެމެރިކާއިން އަނެއްކާވެސް ގޯސް މަގު އިޚްތިޔާރުކޮށް، އުދުވާނީ އަދި ނުރައްކާތެރި ފިޔަވަޅުތަކެއް އަޅާފައިވާތީ، އަޅުގަނޑުމެން މިތިބީ ވެފައިވާ އަހުދުގައި ސާބިތުވެއެވެ. އެއީ 'ހަނދާން ނުނެތޭނެ ފިލާވަޅެއް' އެމެރިކާއަށް ދަސްކޮށްދިނުމެވެ. އެއީ އެއްވެސް އަދުއްވަަކު އެފަދަ ނުބައި އަމަލެއް ތަކުރާރުކުރުމަށް ޖެހިލުންވާނެ ފަދަ ފިލާވަޅެކެވެ،" އައި.އާރު.ޖީ.ސީގެ ބަޔާނުގައި ބުނެފައިވެ އެވެ.

މީގެ އިތުރުން، ވާހަކަދައްކައިގެން މައްސަލަ ހައްލުކުރުމަށް އެމެރިކާއިންވާ ވައުދުތަކަށް އައި.އާރު.ޖީ.ސީން ދުވަހަކުވެސް އިތުބާރު ނުކުރާނެ ކަމަށް އެ ބަޔާނުގައި ބުނެފައިވެ އެވެ.

"އަޅުގަނޑުމެން ވައުދުވަނީ، ކުޑަކުދިން މަރާ، އަދި އީރާނުގެ ރައްޔިތުންނާ މެދު ބަދަލުހިފުމުގެ ރޫހާއި، މަކަރާއި، ހީލަތާއި، ވައުދާ ޚިލާފުވުމުގެ ތާރީޚެއް އޮތް ދުޝްމަނެއްގެ ވައުދުތަކާ މި ގައުމުގެ މުސްތަގުބަލު ދުވަހަކުވެސް ގުޅުވައިނުލާނެ ކަމަށެވެ."

އީރާނުގެ އަބުރާއި އިއްޒަތް ކަށަވަރުކުރެވޭނީ ހަމައެކަނި ސާބިތުކަމާއި، ހޭލުންތެރިކަމާއި، އަދި ބާރުގެ ބޭނުންކޮށްގެން ކަމަށް ބަޔާނުގައި ބުނެފައިވެ އެވެ. އަދި ވޭތުވެދިޔަ އަހަރުތަކުގެ ތަޖުރިބާއަށް ބަލާއިރު، ދުޝްމަނުންނަށް އެއްވެސް މިންވަރަކަށް އިތުބާރު ނުކުރެވޭނެކަން ސާބިތުވެފައިވާ ކަމަށްވެސް ބަޔާނުގައިވެ އެވެ.

އާޔަތުﷲ ޚާމަނާއީ ދެއްވި މެސެޖުގައި ވިދާޅުވީ، އެމެރިކާއިން އަލުން އީރާނަށް ހަމަލާދޭން ފެށުމުން، އެމެރިކާގެ ރައީސަކު ކުރައްވާ ސޮއިގެ އެއްވެސް އަގެއް ނެތްކަން ހާމަވެއްޖެ ކަމަށެވެ.

އަދި އެމެރިކާއިން އަލުން ފެށި އުދުވާނާ ގުޅިގެން، އީރާނާއި އެ ސަރަހައްދުގައިވާ އީރާނަށް ތާއީދުކުރާ ހަނގުރާމަވެރި ޖަމާއަތްތަކުން ގުޅިގެން އެމެރިކާއަށް "ހަނދާން ނުނެތޭނެ ފަދަ ފިލާވަޅެއް" ދަސްކޮށްދޭނެ ކަމަށް ޚާމަނާއީ ވަނީ ވައުދުވެވަޑައިގެންފަ އެވެ.