އީރާން، އިރާގު، ލުބުނާނުގެ ވައިގެ ސަރަހައްދުން ދުރުހެލިވުމަށް ވިލާތުގެ އިއްތިހާދުގެ އޭވިއޭޝަން ސޭފްޓީ އެޖެންސީ އިން އިރުޝާދު ދީފި
މަސްރަހު ކުއްލިއަކަށް ގޯސްވެދާނެ ފަދަ ފުރުސަތެއް އޮތުމުން، އީރާނާއި އިރާގު އަދި ލުބުނާނުގެ ވައިގެ ސަރަހައްދު ބޭނުންކުރުމުގައި އެއާލައިންތަކުން ސަމާލުވުމަށް ވިލާތުގެ އިއްތިހާދުގެ އޭވިއޭޝަން ސޭފްޓީ އެޖެންސީން ވަނީ އިރުޝާދު ދީފައި. މި ސަރަހައްދުތަކުގެ ވައިގެ މަގު ބޭނުންނުކުރުމަށް ނެރުނު އިންޒާރުގެ މުއްދަތު ޖުލައި މަހުގެ 8 ވަނަ ދުވަހުގެ ނިޔަލަށް މިހާރު ވަނީ އިތުރުކޮށްފައި.
ފްލައިޓްރޭޑާ24 ޑޮޓް ކޮމް (flightradar24.com) އިން އާންމުކޮށްފައިވާ ޗާޓަކުން ފެންނަ ގޮތުގައި، އީރާނުގެ މަތިން ދަތުރުކުރުމުގެ ބަދަލުގައި، ގިނަ އަދަދެއްގެ މަތިންދާބޯޓުތައް އެ ސަރަހައްދުން ނެއްޓިގެން ދަތުރުކުރަމުންދާކަން ރީނދޫ ކުލައިގެ އައިކަންތަކުން ހާމަވޭ. | ގެޓީ އިމޭޖަސް
އީރާނާއި، އިރާގު އަދި ލުބުނާނުގެ ވައިގެ ސަރަހައްދު ބޭނުންކުރުމުން އެއާލައިންތަކުން އަދިވެސް ދުރުހެލިވާންޖެހޭ ކަމަށް ވިލާތުގެ އިއްތިހާދުގެ އޭވިއޭޝަން ސޭފްޓީ އެޖެންސީ (އީ.އޭ.އެސް.އޭ) އިން ބުނެފިއެވެ.
ބުދަ ދުވަހު އެ އެޖެންސީން ނެރުނު ބަޔާނެއްގައި ބުނެފައިވަނީ، ހަމަލާ ބަދަލުކުރުން ހުއްޓާލުމަށް އެއްބަސްވެފައިވީ ނަމަވެސް، އެ އެއްބަސްވުން ދެމިއޮންނާނެ ކަމުގެ ޔަގީންކަމެއް ނެތުމާއި، މަސްރަހު ކުއްލިއަކަށް ގޯސްވެދާނެ ފަދަ ފުރުސަތެއް އޮތުމުން، އެ ސަރަހައްދުގެ ވައިގެ މަގު ބޭނުންކުރުމުގައި އެއާލައިންތަކުން ސަމާލުވާންޖެހޭ ކަމަށެވެ. އެހެންކަމުން އީރާނާއި، އިރާގު އަދި ލުބުނާނުގެ ވައިގެ ސަރަހައްދު ބޭނުންނުކުރުމަށް ވަނީ އިރުޝާދު ދީފަ އެވެ.
މީގެ ކުރިން ޖުލައި މަހުގެ 1 ވަނަ ދުވަހުގެ ނިޔަލަށް އަމަލުކުރުމަށް ނެރުނު މި އެޑްވައިޒަރީ ނުވަތަ އިންޒާރުގެ މުއްދަތު، ޖުލައި މަހުގެ 8 ވަނަ ދުވަހުގެ ނިޔަލަށް އިތުރުކޮށްފައިވާ ކަމަށްވެސް އީ.އޭ.އެސް.އޭ އިން ވަނީ ހާމަކޮށްފަ އެވެ.
އެމެރިކާއާއި އީރާނާ ދެމެދު އެއްބަސްވުމެއްގައި ސޮއިކުރި ފަހުންވެސް، ދެ ފަރާތުގެ މެދުގައި ދޭތެރެ ދޭތެރެއިން ހަމަލާތައް ބަދަލުކުރަމުންދާކަން ފާހަގަކުރެވެ އެވެ.
މަސްދަރު: ރޮއިޓާސް
