އެމެރިކާގެ ހަމަލާތައް ތަހައްމަލުކުރުމުގެ ގާބިލުކަން ސާބިތުކޮށްދިނުމާއެކު ރައްދު ހަމަލާތައް ދިނުމުގެ ގާބިލުކަން އީރާނަށް ލިބިފައިވާކަން ވެސް މިހާރު ދަނީ ހާމަކޮށްދެމުން

އެމެރިކާއާއި އީރާނާ ދެމެދު ވައިގެ މަގުންނާއި މިސައިލުން ހަމަލާ ބަދަލުކުރާތާ ވިދިވިދިގެން ނުވަ ވަނަ ރެޔަށް ދާއިރު، ވޮޝިންޓަނުން ދެމުންދާ ވަރުގަދަ ހަމަލާތައް ތަހައްމަލުކުރެވިދާނެކަން ތެހެރާނުން ދަނީ ސާބިތުކޮށްދެމުންނެވެ. އަދި ހަމައެއާއެކު، ހަނގުރާމައިގެ ކުރީކޮޅާ ޚިލާފަށް އެމެރިކާގެ އަސްކަރިއްޔާއަށް ކުރިމަތިނުވާ ފަދަ ނުރައްކާތެރި ރައްދު ހަމަލާތަކެއް ދިނުމުގެ ގާބިލުކަން އީރާނަށް ލިބިފައިވާކަން ވެސް މިހާރު ދަނީ ފެންނަމުންނެވެ.

އުރުދުންއާއި އިރާގުގައި ތިބި އެމެރިކާގެ ސިފައިންނަށް އަމާޒުކޮށް އީރާނުން ދިން މިސައިލް އަދި ޑްރޯން ހަމަލާތަކުގައި އެމެރިކާގެ މަދުވެގެން ތިން ސިފައިން މަރުވެ، އެކަކު ގެއްލިފައިވާއިރު، އިތުރު ބަޔަކު ވަނީ ޒަޚަމްވެފަ އެވެ.

މި ހަމަލާތަކުގައި އެމެރިކާގެ އަސްކަރީ ސާމާނަށް ލިބުނު ގެއްލުންތަކުގެ ތަފުސީލު ޕެންޓަގަންއިން ހާމަނުކުރި ނަމަވެސް، އީރާނުން ދިން ހަމަލާތަކުގައި އެމެރިކާގެ ގިނަ އަދަދެއްގެ ބްލެކް ހޯކް ހެލިކޮޕްޓަރުތައް ސުންނާފަތިކޮށް، މަތިންދާބޯޓު ބާއްވާ ހޭންގަރުތައް ފަދަ އަސްކަރީ މަރުކަޒުތަކުގެ އިންފްރާސްޓްރަކްޗަރަށް ބޮޑެތި ގެއްލުންތަކެއް ދީފައިވާ ކަމަށް ތެހެރާނުން ދަނީ ބުނަމުންނެވެ.

އަދި އީރާނުގެ ފާލަންތަކާއި، ބަނދަރުތަކާއި، އިންޖީނުގެތައް ފަދަ މުހިންމު ތަންތަނަށް އެމެރިކާއިން ހަމަލާދެމުންދާއިރު، އެމެރިކާގެ އަސްކަރީ މަރުކަޒުތައް ހުންނަ ކުވެއިތާއި ބަހްރޭން ފަދަ ގަލްފުގެ ގައުމުތަކުގެ އިންފްރާސްޓްރަކްޗަރަށް ވެސް އީރާނުގެ ޑްރޯންތަކާއި މިސައިލްތަކުގެ ސަބަބުން ދަނީ ގެއްލުންވަމުންނެވެ.

އެމެރިކާގެ ސެންޓްރަލް ކޮމާންޑުން ކޮންމެ ދުވަހަކު ނެރޭ ބަޔާންތަކަކީ ކުރީ ދުވަހުގެ ބަޔާން ކޮޕީކޮށްފައިވާ ބަޔާންތަކެއް ފަދައެވެ. އެގޮތުން އާދީއްތަ ދުވަހުގެ ރޭ ނެރުނު ބަޔާނުގައި ބުނެފައިވަނީ، ހުރްމުޒް ކަނޑުއޮޅިން ދަތުރުކުރާ އާންމު އުޅަނދުފަހަރަށާއި ފަޅުވެރިންނަށް ހަމަލާދިނުމަށް އީރާނުން ބޭނުންކުރާ އަސްކަރީ ގާބިލުކަން ނައްތާލުމަށް ދޭ ހަމަލާތައް ކުރިއަށްދާނެ ކަމަށެވެ.

ނަމަވެސް، މިހާރު ކުރިއަށްދާ ކުރިމަތިލުންތަކަށް ނިމުމެއް އަތުވެދާނެ ފަދަ މިންވަރަކަށް އީރާނުގެ އަސްކަރީ ގާބިލުކަން އެމެރިކާއަށް ކުޑަކުރެވިފައިވާ ކަމުގެ އެއްވެސް ނިޝާނެއް އީރާނުގެ ފަރާތަކުން ނުފެނެ އެވެ.

މިދިޔަ މޭ މަހު ތަޖުރިބާކާރުން ސީއެންއެންއަށް މައުލޫމާތު ދިން ގޮތުގައި، ބިމުގެ އަޑީގައި ހުރި ގުދަންތަކުގައި އީރާނުގެ 1,000 މިސައިލާއި، އެތައް ހާސް ޑްރޯންއެއް އަދިވެސް އެބަހުއްޓެވެ.

އެމެރިކާގެ ނައިބު ރައީސް ޖޭޑީ ވޭންސް ވެސް ވަނީ، ހުރްމުޒް ކަނޑުއޮޅި ހުޅުވާފައި ބޭއްވުމަށް ޓްރަމްޕް ސަރުކާރުން ގެންގުޅޭ މުހިންމު ލަނޑުދަނޑި ހާސިލުކުރުމަށް ހަމައެކަނި ވައިގެ ހަމަލާތަކުން ފުދޭނެ ކަމަށް ގަބޫލުނުކުރައްވާ ކަމަށް އެއްބަސްވެވަޑައިގެންފަ އެވެ.

މިދިޔަ ހަފުތާގައި އާންމުކުރި "ދަ ޖޯ ރޯގަން އެކްސްޕީރިއަންސް" ޕޮޑްކާސްޓްގައި ވާހަކަދައްކަވަމުން ވޭންސް ވިދާޅުވީ، "އަހަރެމެންނަށް ބޮން އެޅިދާނެ، ރޭޑާ ސިސްޓަމްތައް ނައްތާލެވިދާނެ، އަދި ބައެއް ޑްރޯންތަކާއި މިސައިލްތައް ވެސް ހަލާކުކޮށްލެވިދާނެ. ނަމަވެސް ކަނޑުއޮޅިން ދަތުރުކުރާ އުޅަނދުފަހަރަށް ހަމަލާދިނުމަކީ އެމީހުންނަށް މާ ފަސޭހަ ކަމެއް" ކަމަށެވެ.

އަދި މިހާރު އީރާނުން މިވަނީ، މުޅި ސަރަހައްދުގައި ތިބި އެމެރިކާގެ ސިފައިންނަށް ވެސް އެފަދަ ނުރައްކާތަކާ ކުރިމަތިލާންޖެހިފައިވާކަން ސާބިތުކޮށްދީފައެވެ. މީގެ ނަތީޖާއަކީ އެމެރިކާ އިތުރު ސިފައިންގެ ފުރާނަ ގެއްލިގެން ދިއުމާއި ކޮޅެއް މެދެއް ނުފެންނަ ދިގުލީ ހަނގުރާމައެއްގައި އެމެރިކާ ބަނދެވުމެވެ.