ހެޔޮ ގޮތުގައި ހައްޖުގެ އަޅުކަން އަދާކުރުމަށް ހަލާލު ފައިސާ ބޭނުން ކުރުމަށާއި، ދެއްކުންތެރިކަމުން ދުރުވުމަށް ޚުތުބާގައި ގޮވާލައިފި

ހެޔޮ ގޮތުގައި ހައްޖުގެ އަޅުކަން އަދާކުރުމަށްޓަކައި ހަލާލު ފައިސާ ބޭނުން ކުރުމަށާއި، ދެއްކުންތެރިކަމުން ދުރުވުމަށް ހުކުރު ޚުތުބާގައި ގޮވާލައިފި އެވެ. 

''ހެޔޮ ގޮތުގައި ވެވޭ ހައްޖު'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ވަނީ ހައްޖު ވާޖިބުވުމަށް ފަހު ހައްޖު އަދާކުރުމަށް ކެރި ކުޅަދާނަވެއްޖެ މީހާ ހައްޖުވުމަށް އަވަސްވެގަތުމަކީ ކީރިތި ރަސޫލާ مُحَمَّدُ صَلَّى اللهُ عَلَيْهِ وَسَلَّمَ އިރުޝާދުދެއްވައިފައިވާ ކަމެއްކަން ފާހަގަކޮށްފަ އެވެ. 

ޚުތުބާގައި ބުނީ، ހެޔޮ ގޮތުގައި ވެވޭ ހައްޖަށް މާތް ﷲ ދެއްވާ ސަވާބަކީ، ސުވަރުގެކަން ޝަރުއީ ދަލީލުތަކުން ސާބިތުވާ ކަމަށެވެ.

މީގެ އިތުރުން، މާތް ﷲގެ ހަޒުރަތުގައި އަޅުކަމެއް މަގުބޫލުވަނީ، އެ އަޅުކަމެއްގައި ހުންނަ ޝަރުތުތައް ފުރިހަމަވެގެންކަން ފާހަގަކޮށް ޚުތުބާގައި ބުނީ، ހެޔޮ ގޮތުގައި ހައްޖުވުމަށްޓަކައި، ހައްޖަށް ދިޔުމުގެ ކުރިން ކުރަން ޖެހޭ ކަންތައްތަކެއްވާ ކަމަށެވެ. 

އެގޮތުން އިހުލާސްތެރި ރަނގަޅު ތައުބާއަކުން ތައުބާވާން ޖެހޭ ކަމަށާއި، އަދި ތިމާގެ ދަރަންޏާއި، ލިބެންހުރި ތަކެތި ލިޔެފައި ބެހެއްޓުމަކީ މުހިންމު ކަމެއް ކަމަށެވެ. ޚާއްސަކޮށް ހައްޖުވުމަށް ޓަކައި ކުރާންޖެހޭ ޚަރަދުތަކާއި، އާންމުކޮށް ދިރިއުޅުމުގެ ހުރިހައި މައިދާނެއްގައި ވެސް ކުރާ ޚަރަދުތަކަކީ ހަލާލު ގޮތުގައި ހޯދައިފައިވާ މުދަލާއި، ފައިސާއިން ކުރާ ޚަރަދު ތަކެއްކަމުގައި ވާންޖެހޭ ކަމަށް ޚުތުބާގައި ބުނެފައިވެ އެވެ. 

އަދި، ދެއްކުންތެރިކަމުން ދުރުވެ، އިޚުލާސްތެރިކަމާ އެއްކޮށް ކުރާ ކަމެއް ކަމުގައި ކޮންމެ އަމަލެއް ވުމަކީ ވާޖިބެއްކަން ޚުތުބާގައި ހަނދާން ކޮށްދީފައިވެ އެވެ.

ކީރިތި ރަސޫލާ مُحَمَّدُ صَلَّى اللهُ عَلَيْهِ وَسَلَّمَގެ އަރިހުން ވާރިދުވެފައިވާ حديثއެއްގައި ވެ އެވެ. (إِنَّ اللهَ طَيِّبٌ لَا يَقْبَلُ إِلَّا طَيِّبًا) މާނައީ: "ހަމަކަށަވަރުން މާތް ﷲއީ ހުރިހައި ޢައިބަކުން ހުސްދުރުވެވޮޑިގެންވާ ހުސްޠާހިރުވަންތަ ރަސްކަލާނގެއެވެ. ޠާހިރު އަދި حلال ތަކެއްޗާއި ކަންތައް މެނުވީ އެކަލާނގެ قبولއެއް ނުކުރައްވައެވެ." ދެއްކުންތެރިކަމުން ޠާހިރުވެ، މާތް اللهއަށް ޓަކައި إخلاصތެރިކަމާ އެކު ކުރާ ކަމެއްކަމުގައި، ތިމާގެ ކޮންމެ ޢަމަލެއް ވުމަކީ ވެސް واجبކަމެކެވެ. ޙައްޖަށްދާ މީހާ ނުވަތަ ޢުމްރާއަށްދާ މީހާ މި މަތިވެރި އަޅުކަން އަދާކުރާ ގޮތާއި، މި އަޅުކަމުގެ حُكُمތައް އުނގެނި ދަސްކުރުން ހުށްޓެވެ.

ހުކުރު ޚުތުބާ 

ޚުތުބާގައި ބުނީ، ހެޔޮ ގޮތުގައި ވެވުނު ހައްޖެއްކަމުގެ އަލާމާތަކީ ހައްޖުވުމަށް ފަހު ތިމާގެ ދިރިއުޅުން ހެއު މަގަށް ބަދަލުވެ، މާތް الله މަނާކުރެއްވި ކަންތައްތަކުން ދުރުވެ ރައްކާތެރިވެގެން ދިރިއުޅުން ވޭތުކުރަމުން ދިޔުމާއި، މާތް اللهގެ އަމުރުފުޅުތަކަށް ފުރިހަމައަށް ކިޔަމަންތެރިކަން އަދާކުރާ މީހެއްކަމުގައި ތިމާވުން ކަމަށެވެ. 

މީގެ އިތުރުން ހައްޖަކީ އަހަރަކު އެއް ފަހަރު އަދާކުރެވޭ އަޅުކަމެއް ކަމާއި އެ އަޅުކަމުގެ ރުކުނެއް އަޅައިފި މީހަކަށް އެ އަހަރުގެ ހައްޖު ނުލިބޭނެކަން ހަނދާން ކޮށްދީފައިވެ އެވެ.