ނިއުޒީލެންޑަށް 5.9 ގެ ބާރުގަދަ ބިންހެލުމެއް އަތުވެއްޖެ

ނިއުޒީލެންޑުގެ ސައުތު އައިލެންޑަށް ބުރާސްފަތި ދުވަހު ރިކްޓަރ މިންގަނޑުން 5.9 ގެ ބާރުމިނުގައި އައި ބާރުގަދަ ބިންހެލުމަކާ ގުޅިގެން، އެ ގައުމުގެ ކަމާބެހޭ އިދާރާތަކުން ކުޑަ ވަގުތުކޮޅަކަށް ސުނާމީގެ އިންޒާރު ނެރެފި އެވެ.

މި ބިންހެލުމުގެ ސަބަބުން އެ ސަރަހައްދުގެ އިމާރާތްތަކަށް ލޮޅުން އަރައި، ގިނަ އަދަދެއްގެ ރައްޔިތުން ބިރުން މަގުމައްޗަށް ނުކުމެފައިވީ ނަމަވެސް، މި ހާދިސާގައި އެއްވެސް މީހަކަށް އަނިޔާވިކަމުގެ ނުވަތަ ބޮޑު ގެއްލުމެއް ލިބުނުކަމުގެ ރިޕޯޓެއް މިހާތަނަށް ލިބިފައިނުވާކަމަށް ކަމާބެހޭ ފަރާތްތަކުން ބުނެ އެވެ.

ނިއުޒީލެންޑުގެ ނޭޝަނަލް އިމަޖެންސީ މެނޭޖްމަންޓް އެޖެންސީ (ނެމާ) އިން މައުލޫމާތުދޭ ގޮތުގައި، މި ބިންހެލުން އައިސްފައިވަނީ ފިއޯޑްލޭންޑްގެ ފަތުރުވެރިކަމުގެ މައި ދޮރާށި ކަމަށްވާ ޓީ އަނާއުއާ ގާތްގަނޑަކަށް 40 ކިލޯމީޓަރު (25 މޭލު) އުތުރަށެވެ.

އެ ގައުމުގެ ގަޑިން ރޭގަނޑު 9:14 (ޖީއެމްޓީން 09:14) ހާއިރު އައި މި ބިންހެލުމުގެ ބާރުމިން ފުރަތަމަ ރިކްޓަރ މިންގަނޑުން 6.3 ގައި ހުރިކަމަށް ނެމާ އިން އަންދާޒާ ކުރި ނަމަވެސް، ފަހުން ވަނީ އެއީ 5.9 ގެ ބާރުމިނުގެ ބިންހެލުމެއް ކަމަށް އިސްލާހުކޮށްފަ އެވެ.

ބިންހެލުމާ ގުޅިގެން ނެރުނު ސުނާމީގެ އިންޒާރު މިހާރު އަނބުރާ ގެންގޮސްފައިވީ ނަމަވެސް، އައްސޭރިފަށުގެ ސަރަހައްދުތަކަށް ބާރުގަދަ އަދި އާދަޔާ ހިލާފު އޮއިވަރެއް ދެމުމާއެކު، ލަފާނުކުރެވޭ ފަދަ ބޮޑެތި ރާޅުތަކެއް އެރުމުގެ ފުރުސަތު އޮތް ކަމަށް އެ އެޖެންސީން ވަނީ ބުނެފަ އެވެ.