ވެނެޒުއޭލާގެ ބިންހެލުމުން 58،000 އަށްވުރެ ގިނަ އިމާރާތަށް ބޮޑެތި ގެއްލުންތައް

އެމެރިކާގެ ޖައްވީ އިދާރާ، ނާސާއިން އާންމުކޮށްފައިވާ ސެޓެލައިޓް މައުލޫމާތުތަކުގެ ވަގުތީ ދިރާސާއަކުން ދައްކާ ގޮތުގައި، މިދިޔަ ހަފުތާގައި ވެނެޒުއޭލާއަށް އައި ބާރުގަދަ ދެ ބިންހެލުމާ ގުޅިގެން 58،000 އަށްވުރެ ގިނަ އިމާރާތަށް ވަނީ އެކިވަރުގެ ގެއްލުންތައް ލިބި ނުވަތަ ސުންނާފަތިވެފަ އެވެ.

ދެކުނު އެމެރިކާގެ މި ގައުމަށް ފާއިތުވި ގަރުނެއްހާ ދުވަހުގެ ތެރޭގައި އައި އެންމެ ބާރުގަދަ މި ބިންހެލުންތަކުގެ ބާރުމިނަކީ ރިކްޓަރ މިންގަނޑުން 7.2 އަދި 7.5 އެވެ. މި ހާދިސާގައި މިހާތަނަށް 1،700 އެއްހާ މީހުން މަރުވެފައިވާއިރު، އެތައް ހާސް ބަޔަކު އަދިވެސް ވަނީ ވީނުވީއެއް ނޭނގި ގެއްލިފަ އެވެ.

އޮރެގަން ސްޓޭޓް ޔުނިވާސިޓީގެ ދިރާސާވެރިން ކަމަށްވާ ކޯރީ ޝާރ އަދި ޖޭމަން ވެން ޑެން ހުކް ވިދާޅުވި ގޮތުގައި، ބިންހެލުން އައިތާ 24 ގަޑިއިރު ނުވަނީސް ޖޫން މަހުގެ 25 ވަނަ ދުވަހު ސެޓެލައިޓް ރޭޑާ މެދުވެރިކޮށް އެއްކުރި މައުލޫމާތަށް ބަލާއިރު، ބިންހެލުމުގެ އަސަރުކުރި ސަރަހައްދުތަކުން ގާތްގަނޑަކަށް 58،870 އިމާރާތަކަށް ވަނީ ގެއްލުން ލިބިފަ އެވެ.

މި ދިރާސާވެރިން މި މައުލޫމާތު ނަގާފައިވަނީ ޔޫރަޕިއަން ސްޕޭސް އެޖެންސީގެ "ސެންޓިނަލް-1" ސެޓެލައިޓުން ނަގާފައިވާ މަތީ ފެންވަރުގެ ރޭޑާ ފޮޓޯތަކުންނެވެ.

ދިރާސާވެރިން ލިޔުއްވާފައިވާ ގޮތުގައި މިއީ ކުއްލި ހާލަތުގައި ހަދާފައިވާ ވަގުތީ ދިރާސާއެކެވެ. އަދި މި އަދަދުތަކަކީ ބިމުގެ ސަތަހައަށް އައިސްފައިވާ ބަދަލުތަކަށް ބަލައި ލަފާކޮށްފައިވާ އަދަދުތަކެއް ކަމަށާއި، ބިމުގެ ފެންވަރުގައި މިކަން އަދި ކަށަވަރުކޮށްފައި ނުވާތީ މިއީ ހަމައެކަނި އިޝާރާތެއްގެ ގޮތުގައި ބެލުމަށް އެ ފަރާތްތަކުން ވަނީ އިލްތިމާސްކޮށްފަ އެވެ.

ވެނެޒުއޭލާގެ ނޭޝަނަލް އެސެމްބްލީގެ ރައީސް ހޯމަ ދުވަހު ވިދާޅުވީ، މިހާތަނަށް 855 އިމާރާތަކަށް ގެއްލުން ލިބިފައިވާކަން ރިޕޯޓުކޮށްފައިވާ ކަމަށެވެ. އޭގެ ތެރޭގައި މުޅިން ބިމާހަމަވެފައިވާ 189 އިމާރާތެއް ހިމެނޭ ކަމަށް އޭނާ ވިދާޅުވި އެވެ.

ނާސާއިން ބުނި ގޮތުގައި އެ އިދާރާގެ ސެޓެލައިޓްތަކުން ދަނީ ބިންހެލުމުގެ އަސަރު ދެނެގަތުމަށާއި އެހީތެރިކަން ފޯރުކޮށްދޭ ޓީމުތަކަށް މަގުދެއްކުމަށް ބޭނުންވާ މުހިންމު ފޮޓޯތަކާއި މައުލޫމާތު ފޯރުކޮށްދެމުންނެވެ.