ވެނެޒުއޭލާގެ އުތުރު އައްސޭރިފަށަށް އިތުރު ދެ ބިންހެލުން އަތުވެއްޖެ

ވެނެޒުއޭލާގެ އުތުރު އައްސޭރިފަށަށް އިތުރު ދެ ބިންހެލުން އަތުވެއްޖެ އެވެ.

ވެނެޒުއޭލާގެ އުތުރު އައްސޭރިފަށަށް އިތުރު ދެ ބިންހެލުން އައިސްފައި މިވަނީ، މިދިޔަ ބުދަ ދުވަހު އެ ގައުމަށް އައި ބާރުގަދަ ދެ ބިންހެލުމުގެ ސަބަބުން ލިބުނު ބޮޑެތި ގެއްލުންތަކުން އަރައިގަތުމަށް ދެކުނު އެމެރިކާގެ މި ގައުމުން މަސައްކަތް ކުރަމުންދާ ދަނޑިވަޅެއްގަ އެވެ.

ޔޫއެސް ޖިއޮލޮޖިކަލް ސާވޭ (ޔޫއެސްޖީއެސް) އިން ހާމަކޮށްފައިވާ ގޮތުގައި، ހޮނިހިރު ދުވަހު 24 ގަޑިއިރު ނުވަނީސް އައި މި ދެ ބިންހެލުން ހުރީ މެގްނިޓިއުޑް 4.7 އަދި 4.8 ގައެވެ. މީގެ ތެރެއިން ފުރަތަމަ ބިންހެލުން އައިސްފައިވަނީ އުތުރުގެ އަރަގުއާ ސްޓޭޓްގެ އެލް ލިމޯން ސިޓީއާ 54 ކިލޯމީޓަރު ދުރަށެވެ. އަދި އޭގެ ފަހުން އައި ދެވަނަ ބިންހެލުން އައިސްފައިވަނީ އެ ސިޓީއާ 35 ކިލޯމީޓަރު ދުރަށެވެ. މި ފަހުން އައި ދެ ބިންހެލުމުގެ ސަބަބުން ލިބުނު ގެއްލުންތަކުގެ ތަފްސީލެއް އަދި ސާފެއް ނުވެ އެވެ.

ވެނެޒުއޭލާގެ ކަމާބެހޭ އިދާރާތަކުން ބުނާ ގޮތުގައި، މިދިޔަ ބުދަ ދުވަހު ފުލުފުލުގައި އައި މެގްނިޓިއުޑް 7.2 އަދި 7.5 ގެ ބާރުގަދަ ދެ ބިންހެލުމުގައި މަރުވި މީހުންގެ އަދަދު މިހާރު ވަނީ 1،430 އަށް އަރާފަ އެވެ. މިއީ އެ ގައުމުގެ ފަހުގެ ތާރީޚުގައި ކުރިމަތިވި އެންމެ ނުރައްކާތެރި ބިންހެލުމުގެ ހާދިސާ އެވެ. މި ހާދިސާގައި އެންމެ ބޮޑު ގެއްލުމެއް ލިބިފައިވަނީ ގައުމުގެ ވެރިރަށް ކަރަކަސް އަދި ލާ ގުއައިރާ އަށެވެ. މި ބިންހެލުންތަކުގައި 3،200 އަށްވުރެ ގިނަ މީހުން ޒަޚަމްވެފައިވާ ކަމަށް ރިޕޯޓްތައް ބުނެ އެވެ.

މި ހާދިސާގައި ގެއްލިފައިވާ ކަމަށް ބެލެވޭ 50،000 އަށްވުރެ ގިނަ މީހުން ހޯދުމުގެ މަސައްކަތް ރެސްކިއު ޓީމުތަކުން އަދިވެސް ދަނީ ކުރަމުންނެވެ. ސަރުކާރުން ހާމަކޮށްފައިވާ ގޮތުގައި، މީހުން ސަލާމަތްކުރުމުގެ މި މަސައްކަތުގައި ބޭރު ގައުމުތަކުގެ 1،600 އަށްވުރެ ގިނަ މާހިރުން ދަނީ ބައިވެރިވަމުންނެވެ.

ވެނެޒުއޭލާގެ ފަހުގެ ތާރީޚެއްގައި މީގެ ކުރިން އައި އެންމެ ނުރައްކާތެރި ބިންހެލުން އައީ 1967 ވަނަ އަހަރު އެވެ. އެ ފަހަރު ކަރަކަސް އިން 300 އެއްހާ މީހުން މަރުވެ، 1،600 އެއްހާ މީހުން ޒަޚަމްވި އެވެ. މީގެ އިތުރުން 1997 ވަނަ އަހަރު އެ ގައުމުގެ އިރުއުތުރު ސަރަހައްދަށް އައި ބިންހެލުމެއްގައި މަދުވެގެން 81 މީހުން މަރުވެފައިވެ އެވެ.