"ޖުރަސިކް ޕާކް" އެކްޓަރު ސޭމް ނީލް ކުއްލިި ގޮތަކަށް މަރުވެއްޖެ

"ޖުރަސިކް ޕާކް" އަދި "ދަ ޕިއާނޯ" ފަދަ މަޝްހޫރު ފިލްމުތަކުން ފެނިގެންގޮސްފައިވާ ނިއުޒީލެންޑުގެ އެކްޓަރު ސޭމް ނީލް، އުމުރުން 78 އަހަރުގައި މަރުވެއްޖެ ކަމަށް އޭނާގެ އާއިލާއިން ބުނެފި އެވެ.

އެކްޓަރުގެ ސޯޝަލް މީޑިއާ ޕޭޖުގައި ހޯމަ ދުވަހު އާންމުކުރި ބަޔާނެއްގައި ބުނެފައިވަނީ، ސިޑްނީގައި އޭނާ މަރުވީ "ކުއްލި ގޮތަކަށް އަދި ހީނުކުރާ ފަދަ ދަނޑިވަޅެއްގައި" ކަމަށެވެ. 2023 ވަނަ އަހަރު ނީލް ވަނީ އޭނާއަށް "އެންޖިއޯއިމިއުނޯބްލާސްޓިކް ޓީ-ސެލް ލިމްފޯމާ" ކިޔާ ނޮން-ހޮޖްކިން ލިމްފޯމާގެ ނާދިރު ކެންސަރެއް ޖެހިފައިވާކަން ހާމަކޮށްފަ އެވެ.

އާއިލާގެ ބަޔާނުގައި ބުނެފައިވަނީ އޭނާ މަރުވިއިރު ހުރީ "ކެންސަރު ބަލިން ފަސޭހަވެފައި" ކަމަށެވެ. ނަމަވެސް އޭނާ މަރުވާން ދިމާވި ސީދާ ސަބަބެއް އެ ބަޔާނުގައި ހާމަކޮށްފައެއް ނުވެ އެވެ.

ނީލް އަކީ ފިލްމުތަކުން ފެށިގެން ބޮޑެތި "ބްލޮކްބަސްޓާ" ފިލްމުތަކާ ހަމައަށް ތަފާތު އެކި ރޯލުތައް ކުޅެފައިވާ، ހުނަރުވެރި އަދި މޮޅު އެކްޓަރެކެވެ. އޭނާ ވަނީ "ޖުރަސިކް ޕާކް" ގައި ޑައިނަސޯތަކުން ސަލާމަތްވާން މަސައްކަތްކުރާ މީހެއްގެ ރޯލުގެ އިތުރުން، "ދަ ޕިއާނޯ" ގައި ހޮލީ ހަންޓާގެ ފިރިމީހާގެ ރޯލުވެސް ކުޅެފަ އެވެ.

އޭނާއަކީ 1970 ގެ އަހަރުތަކުގެ ފަހުކޮޅު އޮސްޓްރޭލިއާގެ ފިލްމީ ސިނާއަތަށް އައި ބޮޑު ކުރިއެރުމާއެކު ބައިނަލްއަގުވާމީ މަގުބޫލުކަން ހޯދި ފަންނާނުންގެ ތެރޭގައި ހިމެނޭ މީހެކެވެ. މި ލިސްޓުގައި ޕޯލް ހޯގަން، މެލް ގިބްސަން، ޖެފްރީ ރަޝް، ރަސަލް ކްރޯ، ޖޭން ކެމްޕިއަން، ޕީޓާ ވެއާ އަދި ގިލިއަން އާމްސްޓްރޯންގް ފަދަ މަޝްހޫރު އެކްޓަރުންނާއި ޑައިރެކްޓަރުން ހިމެނެ އެވެ.

ނީލްގެ އެކްޓިން ކެރިއަރުގައި ޓީވީ އާއި ފިލްމުތަކުގެ އެތައް ރޯލެއް ކުޅެފައިވެއެވެ. އޭގެ ތެރޭގައި "ޕީކީ ބްލައިންޑާސް"، "ދަ ހަންޓް ފޯ ރެޑް އޮކްޓޯބާ" އަދި "އޯމެން III: ދަ ފައިނަލް ކޮންފްލިކްޓް" ފާހަގަކޮށްލެވެ އެވެ.

ލަކްސަންގެ ތައުޒިޔާ

ނީލްގެ ވަކިވުމާ ގުޅިގެން ނިއުޒީލެންޑުގެ ބޮޑުވަޒީރު ކްރިސްޓޮފާ ލަކްސަން ވަނީ އޭނާއަކީ "އެންމެ މޮޅު އެއް ފަންނާނު" ގެ ގޮތުގައި ސިފަކުރައްވައި ތައުރީފު ކުރައްވާފަ އެވެ.

"އޭނާ މަސައްކަތް ފެށީ މި ގައުމުގައި ފިލްމީ ސިނާއަތެއް އޮތް ކަމަށް ބުނެވޭ ވަރު ނުވާއިރު. ފަންސާހަށްވުރެ ގިނަ އަހަރު ވަންދެން އޭނާ ވަނީ ނިއުޒީލެންޑުގެ ވާހަކަތައް މުޅި ދުނިޔެއަށް ގެނެސްދީފައި. އޭނާގެ ހުނަރުގެ ސަބަބުން މިއަދު އަޅުގަނޑުމެންގެ ފިލްމީ ސިނާއަތް މިވަނީ ގައުމުގެ އެންމެ ބޮޑު އެއް ސަގާފީ ރައުސްމާލަށް ވެފައި،" ސޯޝަލް މީޑިއާގައި ކުރެއްވި ޕޯސްޓެއްގައި ލަކްސަން ލިޔުއްވާފައިވެ އެވެ.

އޮސްޓްރޭލިއާގެ ބޮޑުވަޒީރު އެންތަނީ އަލްބަނީޒް ވެސް ވަނީ ނީލްގެ ހަނދާންތައް އާކުރައްވައި ތައުޒިޔާ ފޮނުއްވާފަ އެވެ.

ނީލް އުފަންވީ 1947 ވަނަ އަހަރު ނޮދަން އަޔަލެންޑަށެވެ. ނަމަވެސް އޭނާ ކުޑައިރު އާއިލާއާއެކު ނިއުޒީލެންޑަށް ބަދަލުވިއެވެ.

އޭނާގެ އަސްލު ނަމަކީ "ނައިޖެލް ޖޯން ޑާމޮޓް" އެވެ. ނަމަވެސް ފަހުން އޭނާ ވަނީ އެ ނަން "ސޭމް" އަށް ބަދަލުކޮށްފަ އެވެ.

"އަހަރެން އެ ނަމަށް ބަދަލުކުރީ އެހެން މީހުންގެ ފުރައްސާރައާ ކުރިމަތިލާންޖެހޭ މިންވަރު ކުޑަވާނެ ކަމަށް ހީކޮށް،" ނިއުޒީލެންޑުގެ އޮޓާގޯ ޑެއިލީ ޓައިމްސްއަށް ދިން އިންޓަވިއުއެއްގައި އޭނާ ބުނެފައިވެ އެވެ.

އޭނާގެ އާއިލާ ވަޒަންވެރިވީ ސައުތު އައިލެންޑްގެ ޑުނެޑިންގައެވެ. އަދި އޭނާ ކިޔެވީ ކްރައިސްޓްޗާޗްގެ ބޯޑިން ސްކޫލެއްގައެވެ. ކޮލެޖް ނިންމުމަށްފަހު، 1977 ވަނަ އަހަރު އޭނާ ވަނީ "ސްލީޕިން ޑޯގްސް" ގެ މައި ރޯލު ކުޅެފަ އެވެ. މިއީ ދިހަ އަހަރަށްވުރެ ގިނަ ދުވަހުގެ މެދުކެނޑުމަކަށްފަހު ނިއުޒީލެންޑުގައި އުފެއްދި ފުރަތަމަ ފީޗާ ފިލްމެވެ.

ނީލް ކުޅެފައިވާ އެހެން ފާހަގަކޮށްލެވޭ ރޯލުތަކުގެ ތެރޭގައި "ދަ ހަންޓް ފޯ ރެޑް އޮކްޓޯބާ" ގައި ސޯވިއެޓް ސަބްމެރިން އޮފިސަރެއްގެ ރޯލާއި، ޑައިރެކްޓަރު ޖޯން ކާޕެންޓާގެ "އިން ދަ މައުތު އޮފް މެޑްނަސް" ގައި އިންވެސްޓިގޭޓަރެއްގެ ރޯލު ހިމެނެ އެވެ.

ނީލް އަކީ ނިއުޒީލެންޑުގައި މަޝްހޫރުކަމަށްވުރެ ބޮޑަށް، އާދައިގެ ދިރިއުޅުމަކަށް ލޯބިކުރާ މަޑުމައިތިރި މީހެއްގެ ގޮތުގައި ފާހަގަކުރެވުނު މީހެކެވެ.

އެކްޓިންގެ މަސައްކަތުގައި ނޫޅޭ ވަގުތުތަކުގައި، ނީލް ވަނީ ނިއުޒީލެންޑުގެ ސައުތު އައިލެންޑްގެ ހިތްގައިމު ސެންޓްރަލް އޮޓާގޯ ސަރަހައްދުގައި މޭބިސްކަދުރު ބަގީޗާތަކެއް ވެސް މެނޭޖްކޮށްފަ އެވެ.