ކުރިއާލައި ބިންހެލުން ދެނެގަނެވޭނެ ގޮތެއް ނޯވޭ: މެޓް
ރާއްޖެ ހިމެނޭ ސަރަހައްދަށް ބާރުގަދަ ބިންހެލުމެއް އަތުވެދާނެ ކަމަށް ބުނެ ފެތުރެމުންދާ ޚަބަރުތަކާ ގުޅިގެން، ބިންހެލުން ކުރިއާލައި ދެނެގަނެވޭނެ އެއްވެސް ސައިންޓިފިކް ގޮތެއް އަދި ހޯދިފައި ނުވާ ކަމަށް މެޓް އޮފީހުން ބުނެފި.
މެޓް އޮފީސް: މެޓް އޮފީހުން އަބަދުވެސް ދަނީ ރާއްޖެއާ ކައިރި ސަރަހައްދުތަކަށް އަންނަ ބިންހެލުންތަކުގެ މައުލޫމާތު ހިއްސާކުރަމުން | ރާއްޖެއެމްވީ
ބިންހެލުންތައް ސައިންޓިފިކް ގޮތުން ކުރިއާލައި، ދެނެގަނެވޭނެ އެއްވެސް ގޮތެއް އަދި ހޯދިފައި ނުވާ ކަމަށާ ރާއްޖެއާ ގުޅޭ މައުލޫމާތުތައް މޫސުމާ ބެހޭ ގައުމީ އިދާރާ އިން އަބަދުވެސް ހާމަ ކުރަމުން ދާނެ ކަމަށް އެ އިދާރާ އިން ބުނެފި އެވެ.
ކުރިއަށް އޮތް ދުވަސްތަކުގައި ރާއްޖެ ހިމެނޭ ސަރަހައްދަށް 5.2 މެގްނިޓިއުޑްގެ ބާރުމިނުގައި ބިންހެލުމެއް އަތުވެދާނެ ކަމަށް ބުނެ ސޯޝަލް މީޑީއާގެ އިތުރުން ބައެއް ޕޭޖުތަކުން ވެސް އެކަން ވަނީ ރިޕޯޓު ކޮށްފަ އެވެ. އެކަމާ ގުޅިގެން މައުލޫމާތު ސާފު ކޮށްދީ މެޓް އޮފީހުން ވަނީ ބަޔާނެއް ނެރެފަ އެވެ.
އެ ބަޔާނުގައި އެ އިދާރާ އިން ބުނީ ދިގު މުއްދަތަކަށް ބަލާއިރު ބިންހެލުންތައް އައުން ގާތް ސަރަހައްދުތައް ސައިންސްވެރިންނަށް ކަނޑައެޅިދާނެ ކަމަށެެވެ. ނަމަވެސް ބިންހެލުމެއް އަންނާނެ ސީދާ ވަގުތެއް، ތާރީޚެއް ނުވަތަ އަންނާނެ ސީދާ ތަނެއް ދެނެގަނެވޭނެ އެއްވެސް ސައިންޓިފިކް ގޮތްތަކެއް ނެތް ކަމަށެވެ.
މޫސުމާ ބެހޭ ގައުމީ އިދާރާ އިން ބުނީ އެ އިދާރާ އިން ދަނީ ބިންހެލުންތަކުގެ މައުލޫމާތުތައް މެދުކެނޑުމެއް ނެތި ބަލަމުން ކަމަށެވެ. އެގޮތުން ދިވެހިރާއްޖެ އަށް އަސަރެއް ކޮށްފާނެ ފަދަ ބިންހެލުމެއް އަތުވެއްޖެ ނަމަ މޫސުމާ ބެހޭ ގައުމީ އިދާރާ އިން އެ މައުލޫމާތު ލަސްނުކޮށް އާންމުންނާ ހިއްސާ ކުރަމުންދާނެ ކަމަށް ވެސް އެ އިދާރާ އިން ވަނީ ބުނެފަ އެވެ.
ފާހަގަކުރެވޭ ގޮތުގައި މެޓް އޮފީހުން ދަނީ ރާއްޖެއާ ކައިރި ސަރަހައްދުތަކަށް އަންނަ ބިންހެލުންތަކުގެ މައުލޫމާތު ހިއްސާކުރަމުންނެވެ. އަދި އެ ބިންހެލުންތަކުން ރާއްޖެ އަށް އަސަރު ކޮށްފާނެ ކަމަށް ބެލޭތޯ ނުވަތަ ނޫންތޯ ފަދަ މުހިއްމު މައުލޫމާތު ވެސް އެ އިދާރާ އިން ހާމަ ކުރެ އެވެ.
