ކޭޕް ވާޑްގެ ވޯލްޑް ކަޕް ޓީމުގެ ކެޕްޓަންގެ މައްޗަށް ރޭޕްގެ ތުހުމަތުކޮށްފި

2026 ވަނަ އަހަރުގެ ފީފާ ވޯލްޑް ކަޕަށް ކޮލިފައިވެފައިވާ ކޭޕް ވާޑް ގައުމީ ޓީމުގެ ކެޕްޓަން، ނިއުޒީލޭންޑަށް ކުރި ދަތުރެއްގެ ތެރޭގައި އެ ޓީމުގެ ތަރުޖަމާނަށް ޖިންސީ ގޯނާކުރި ކަމުގެ ތުހުމަތު ފެންމަތިވެއްޖެ ކަމަށް ރިޕޯޓުތައް ބުނެފި އެވެ.

ބްރެޒިލްގެ "ގްލޯބޯ" ނިއުސް އައުޓްލެޓުން ރިޕޯޓުކޮށްފައިވާ ގޮތުގައި، އުމުރުން 36 އަހަރުގެ ރަޔަން މެންޑޭސް ޖިންސީ ގޯނާކޮށްފައިވަނީ މިދިޔަ މާރިޗު މަހު ކޭޕް ވާޑް ޓީމުން ނިއުޒީލޭންޑަށް ކުރި ދަތުރުގައި ތަރުޖަމާނެއްގެ ގޮތުގައި މަސައްކަތް ކުރުމަށް ހަމަޖެއްސި ބްރެޒިލްގެ އަންހެނަކަށެވެ.

އެ އަންހެން މީހާ ބްރެޒިލްގެ މީޑިއާތަކަށް މައުލޫމާތު ދެމުން ބުނެފައިވަނީ، މެންޑޭސް އޭނާ ހުރި ހޮޓެލުގެ ކޮޓަރިއަށް ވަދެ ހަމަލާދީފައިވާ ކަމަށެވެ. އަދި މި ހާދިސާގެ މައުލޫމާތު ކޭޕް ވާޑްގެ ފުޓްބޯޅަ އިދާރާގެ މަދުވެގެން ތިން އޮފިޝަލަކަށް ހިއްސާކުރި ނަމަވެސް، އެއްވެސް ޖަވާބެއް ލިބިފައިނުވާ ކަމަށް އޭނާ ބުންޏެވެ. ތަރުޖަމާނު ބުނި ގޮތުގައި މި ހާދިސާ ހިނގާފައިވަނީ ކޭޕް ވާޑް ޓީމު މަޑުކޮށްގެން ތިބި އޯކްލޭންޑްގެ ހޮޓަލެއްގަ އެވެ.

މި އަންހެން މީހާ ކުރި ތުހުމަތުތަކުގެ ސަބަބުން، 2026 ވަނަ އަހަރުގެ ވޯލްޑް ކަޕްގައި ކޭޕް ވާޑުން ހޯދަމުންދާ ކާމިޔާބީގެ އުފާވެރިކަމަށް ވަނީ ހިޔަނި އެޅިފަ އެވެ. ކޭޕް ވާޑަކީ ވޯލްޑް ކަޕްގެ ފުރަތަމަ މެޗުގައި ވަރުގަދަ ސްޕެއިންއާ ވާދަކޮށް 0-0 އިން އެއްވަރުކޮށް، ވޯލްޑް ކަޕްގެ ނޮކްއައުޓް ބުރަށް ކޮލިފައިވި އެންމެ ކުޑަ ގައުމުގެ ޝަރަފު ހޯދާފައިވާ ގައުމެވެ. ގްލޯބޯ ނޫހަށް މައުލޫމާތު ދެމުން އެ އަންހެން މީހާ ބުނީ، އޭނާ ވަޒީފާއަށް ނެރުނީ މިއަހަރު ނިއުޒީލޭންޑުގައި ބޭއްވި ފީފާ ސީރީޒްގެ ތެރޭގައި ކޭޕް ވާޑް ޓީމަށް އެހީތެރިވުމަށް ކަމަށެވެ. އަދި މާރިޗު 27 ވަނަ ދުވަހު ޗިލީއާ ދެކޮޅަށް ކުޅުނު މެޗަށްފަހު، ހޮޓެލުގެ ކޮޓަރިއެއްގައި އޮތް ބައްދަލުވުމަކަށް އޭނާއަށް ދައުވަތު ދިން ނަމަވެސް، އެތަނަށް ދިޔުމުން އެއީ ރަސްމީ ބައްދަލުވުމެއް ނޫންކަން އެނގުނު ކަމަށް އޭނާ ބުންޏެވެ.

އޭނާ ބުނި ގޮތުގައި އެނބުރި އަމިއްލަ ކޮޓަރިއަށް ދިޔުމުން މެންޑޭސް އޭނާގެ ފަހަތުން ގޮސް ކޮޓަރީގެ ދޮރުގައި ޓަކިޖެހި އެވެ. އަދި ދޮރު ހުޅުވުމާއެކު މެންޑޭސް ގަދަކަމުން ކޮޓަރިއަށް ވަދެ، އޭނާގެ ކަރުގައި ހިފައި، ހަމަލާދީ، ދަތްއަޅައި، ރޭޕްކޮށްފައިވާ ކަމަށް ނިއުޒީލޭންޑް ފުލުހުންނަށް ދީފައިވާ ބަޔާނުގައި ބުނެފައިވާ ކަމަށް ގްލޯބޯއިން ރިޕޯޓުކުރެ އެވެ.

އެ އަންހެން މީހާ ވަނީ އޭނާގެ ކަރުގައި ހުރި ޒަޚަމްތަކުގެ ފޮޓޯތައް މީޑިއާއަށް ދައްކާފަ އެވެ. އޭނާ ބުނި ގޮތުގައި ޖިންސީ އަނިޔާ ލިބޭ މީހުންނަށް ފަރުވާދޭ ކްލިނިކަކުން އޭނާ ފަރުވާ ހޯދައި، ފޮރެންސިކް ތަހުލީލުތައް ކޮށްފައިވެ އެވެ. އެ ކްލިނިކުން ތައްޔާރުކުރި ރިޕޯޓުގައި ބުނެފައިވާ ގޮތުގައި، އޭނާގެ ކަރާއި، އުރަމައްޗާއި، ތުންފަތުގައި ނޫފައިގަނެފައި ހުރި ނިޝާންތައް ހުއްޓެވެ. މި ތަހުލީލުތަކުގެ ނަތީޖާ އޭޕްރިލް 10 ވަނަ ދުވަހު ވަނީ ނިއުޒީލޭންޑް ފުލުހުންނަށް ފޮނުވާފަ އެވެ.

މެއި މަހުގެ 10 ވަނަ ދުވަހު، އެ އަންހެން މީހާއާއި އޭނާގެ ފިރިމީހާ ވަނީ ކޭޕް ވާޑްގެ ފުޓްބޯޅަ ފެޑަރޭޝަނަށާއި ފީފާއަށް މެޑިކަލް ރިޕޯޓާއި ހެކިތަކާއެކު ޝަކުވާ ހުށަހަޅާފަ އެވެ. އަދި އަދަބެއްގެ ގޮތުން މެންޑޭސް ވޯލްޑް ކަޕްގައި ކުޅުން މަނާކުރުމަށް އެ ފަރާތްތަކުން ވަނީ އެދިފައެވެ.

އޭނާ ގްލޯބޯއަށް ބުނި ގޮތުގައި، މި މައްސަލައިގައި ފީފާގެ ފަރާތުން މިހާތަނަށް އެއްވެސް ޖަވާބެއް ލިބިފައެއް ނުވެ އެވެ.

ނިއުޒީލޭންޑް ހެރަލްޑުން މިދިޔަ މަހު ރިޕޯޓުކޮށްފައިވާ ގޮތުގައި، ކޭޕް ވާޑް ޓީމުގެ މެންބަރަކާ ގުޅޭ ޖިންސީ ގޯނާގެ މައްސަލައެއް ފުލުހުން ދަނީ ތަހުގީގު ކުރަމުންނެވެ. ނަމަވެސް އޭރުގެ ރިޕޯޓުތަކުގައި މެންޑޭސްގެ ނަން ހާމަކޮށްފައެއް ނުވެ އެވެ. ފީފާގެ ތަރުޖަމާނަކު "ދަ އިންޑިޕެންޑެންޓް" ނޫހަށް ކަށަވަރުކޮށްދިން ގޮތުގައި، އެ އިދާރާއިން ދަނީ ނިއުޒީލޭންޑްގެ ކަމާބެހޭ ފަރާތްތަކާ ގުޅިގެން މަސައްކަތް ކުރަމުންނެވެ. ނަމަވެސް މިވަގުތު އިތުރު ތަފްސީލެއް ދެވެން ނެތް ކަމަށް އޭނާ ބުންޏެވެ.

"ފީފާއިން މިފަދަ ކޮންމެ ތުހުމަތެއްވެސް ބަލަނީ ވަރަށް ސީރިއަސް މައްސަލައެއްގެ ގޮތުގައި. އަދި ފުޓްބޯޅައިގެ ތެރޭގައި ހިނގާ މިފަދަ ހާދިސާތައް ރިޕޯޓުކުރުމަށް ހަރުދަނާ ނިޒާމެއް ވަނީ ގާއިމުކުރެވިފައި،" މި ޝަކުވާ އާ ގުޅިގެން ފީފާގެ ތަރުޖަމާނު ވިދާޅުވި އެވެ.