އިންޑޮނޭޝިއާގެ އިރުމަތީ ސަރަހައްދަށް 6.2 ގެ ބިންހެލުމެއް

އިންޑޮނޭޝިއާގެ އިރުމަތީ ސަރަހައްދަކަށް ހުކުރު ދުވަހު ރިކްޓަރ މިންގަނޑުން 6.2 ގެ ބާރުމިނުގައި ބިންހެލުމެއް އަތުވެއްޖެ ކަމަށް އެމެރިކާގެ ޖިއޮލޮޖިކަލް ސާވޭ (ޔޫއެސްޖީއެސް) އިން ބުނެފި އެވެ. މި ބިންހެލުމުގެ ސަބަބުން މީހަކަށް އަނިޔާއެއްވިކަމުގެ ނުވަތަ އެއްވެސް މުދަލަކަށް ގެއްލުމެއް ލިބުނުކަމުގެ ރިޕޯޓެއް މިހާތަނަށް ލިބިފައެއް ނުވެ އެވެ.

މި ބިންހެލުން އައިސްފައިވަނީ އެ ގައުމުގެ ގަޑިން ހެނދުނު 11:31 (ޖީއެމްޓީން 02:31) ހާއިރު، އުތުރު މަލުކޫ ޕްރޮވިންސްގެ ޓޮބެލޯގެ ހުޅަނގުން ގާތްގަނޑަކަށް 58 ކިލޯމީޓަރު ދުރަށް، 120 ކިލޯމީޓަރު އަޑިއަށެވެ.

ބިންހެލުން އައި ސަރަހައްދާ ގާތްގަނޑަކަށް 114 ކިލޯމީޓަރު ދުރުގައި އޮންނަ ޓެރްނޭޓްގެ ރަށެއްގެ ރައްޔިތެއް ކަމަށްވާ އުމަރު އައްބާސް އޭއެފްޕީ ނިއުސް އެޖެންސީއަށް މައުލޫމާތު ދެމުން ބުނީ، ބިންހެލުން އައި ވަގުތު އޭނާ އިނީ މަގުމަތީގައި ހުރި ކޮފީ ހަޓެއްގައި ކޮފީ ބޯން ކަމަށާއި، ކުއްލިއަކަށް އޭނާ އިން ގޮނޑި ތެޅެންފެށި ކަމަށެވެ. އަދި މީގެ ކުރިން ކުރިމަތިވި ބިންހެލުންތަކުގެ ބިރުވެރި ހަނދާންތަކުގެ ސަބަބުން އެވަގުތު ވަރަށް ބޮޑަށް ބިރުގަތް ކަމަށްވެސް އޭނާ ބުންޏެވެ.

އިންޑޮނޭޝިއާގެ މީޓިއޮރޮލޮޖީ، ކްލައިމެޓޮލޮޖީ އެންޑް ޖިއޯފިޒިކްސް އެޖެންސީ (ބީއެމްކޭޖީ) އިން ބުނި ގޮތުގައި މި ބިންހެލުމާ ގުޅިގެން ސުނާމީގެ ނުރައްކަލެއް ނެތެވެ.

އިންޑޮނޭޝިއާ އާއި އެ ގައުމާ އަވަށްޓެރި ގައުމުތަކަކީ ޕެސިފިކް "ރިންގް އޮފް ފަޔަރ" ސަރަހައްދުގައި އޮންނަ ގައުމުތަކަކަށް ވުމުން، އެ ސަރަހައްދުތަކަށް އާންމުކޮށް ބިންހެލުންތައް އާދެއެވެ. މިއީ ޖަޕާނުން ފެށިގެން ދެކުނު އިރުމަތީ އޭޝިއާ އަދި ޕެސިފިކް ކަނޑުގެ ތެރެއިން ދެމިގެން ގޮސްފައިވާ، ބިންހެލުންތަކާއި އަލިފާން ފަރުބަދަތަކުގެ ހަރަކާތްތައް ވަރުގަދަ ސަރަހައްދެކެވެ.