ބިންހެލުމުގައި ލިބުނު ގެއްލުން ތަކުން އަރައިގަތުމަށް ވެނެޒުއެލާ އިން 200 މިލިއަން ޑޮލަރުގެ ފަންޑެއް އެކުލަވާލަނީ
3 ޖުލައި 2026 | ހުކުރު 06:19މި ފަންޑުގެ މައިގަނޑު މަޤުސަދަކީ ބިންހެލުމުގައި ގެއްލުންވި އާންމުންގެ ގެދޮރު އަލުން ބިނާ ކުރުމާއި، ހަލާކުވެފައިވާ އިމާރާތްތައް މަރާމާތު ކުރުމުގެ މަސައްކަތްތައް ކުރިއަށް ގެންދިޔުމަށް މާލީ އެހީތެރިކަން ފޯރުކޮށްދިނުން.
ވެނެޒުއެލާގެ ވަގުތީ ރައީސާ ޑެލްސީ ރޮޑްރިގޭޒް. | ގެޓީ އިމޭޖަސް
ވެނެޒުއެލާ އަށް އައި ބާރު ގަދަ ބިންހެލުން ތަކުގައި ސުންނާފަތިވެފައިވާ ސަރަހައްދުތައް އަލުން އާރާސްތު ކުރުމުގެ މަސައްކަތަށް، 200 މިލިއަން އެމެރިކާ ޑޮލަރުގެ ފަންޑެއް އެކުލަވާލުމަށް އެ ޤައުމުގެ ސަރުކާރުން ނިންމައިފި އެވެ.
މިކަން ހާމަ ކުރައްވާފައި ވަނީ ވެނެޒުއެލާގެ ވަގުތީ ރައީސާ ޑެލްސީ ރޮޑްރިގޭޒް އެވެ. އެގޮތުން ރޮޑްރިގޭޒް ވިދާޅުވީ، މި ފަންޑަކީ އިންޓަނޭޝަނަލް މަނިޓަރީ ފަންޑު (އައިއެމްއެފް)ގެ އެހީތެރިކަމާ އެކު ޤާއިމު ކުރާ ފަންޑެއް ކަމަށެވެ.
މި ފަންޑުގެ މައިގަނޑު މަޤުސަދަކީ ބިންހެލުމުގައި ގެއްލުންވި އާންމުންގެ ގެދޮރު އަލުން ބިނާ ކުރުމާއި، ހަލާކުވެފައިވާ އިމާރާތްތައް މަރާމާތު ކުރުމުގެ މަސައްކަތްތައް ކުރިއަށް ގެންދިޔުމަށް މާލީ އެހީތެރިކަން ފޯރުކޮށްދިނުމެވެ.
ޑެލްސީ ވިދާޅުވި ގޮތުގައި، މި ފަންޑުގެ ދަށުން ކުރިއަށް ގެންދާ މަޝްރޫއުތައް ހަވާލު ކުރާނީ ޚާއްސަ އޮޑިޓަކަށް ފަހު، ކަނޑަ އެޅޭ ކޮންޓްރެކްޓަރުންނާ އެވެ. މިއީ މަސައްކަތުގެ ފެންވަރު ހިފެހެއްޓުމާއި، ފައިސާގެ މުއާމަލާތްތައް ދެފުށް ފެންނަ ގޮތަކަށް ކުރިއަށް ގެންދިޔުމަށް ނިންމި ނިންމުމެއް ކަމަށް ވެސް ސަރުކާރުން ވަނީ ހާމަ ކޮށްފައި އެވެ.
ބިންހެލުމުގެ ސަބަބުން ލިބުނު ގެއްލުން ތަކުގެ ތަފުސީލު ހިއްސާ ކުރައްވަމުން ޑެލްސީ ވިދާޅުވީ، މި ހާދިސާގައި މިހާތަނަށް 189 އިމާރާތެއް މުޅިން ސުންނާފަތި ވެފައިވާ ކަމަށެވެ. މީގެ ތެރޭގައި ގިނަ އަދަދެއްގެ އާންމު ރައްޔިތުންގެ ގެދޮރު ހިމެނޭތީ، އެ ފަރާތް ތަކަށް ބޯހިޔާވަހިކަން ފޯރު ކޮށްދިނުމަކީ ސަރުކާރުގެ އެންމެ އިސް އަމާޒު ކަމުގައި އެކަމަނާ ފާހަގަ ކުރެއްވި އެވެ.
މި ފަންޑު ގާއިމު ކުރުމާ އެކު، ބިންހެލުމުގެ އަސަރު ކޮށްފައިވާ ސަރަހައްދު ތަކުގެ އާންމު ހާލަތު އިއާދަ ކުރުމުގެ މަސައްކަތްތައް އަވަސް ވެގެންދާނެ ކަމަށް ވެނެޒުއޭލާގެ ސަރުކާރުން އުންމީދު ކުރެ އެވެ. އަދި އައިއެމްއެފް ފަދަ ބައިނަލްއަގުވާމީ އިދާރާ ތަކުގެ އެހީތެރިކަން މި ދަނޑިވަޅުގައި ލިބުމަކީ، ޤައުމުގެ އިޤްތިސާދީ އަދި އިޖުތިމާއީ ހާލަތު ރަނގަޅު ކުރުމަށް ލިބޭ ބޮޑު ބާރެއް ކަމަށް ވެސް ޑެލްސީ ވަނީ ވިދާޅުވެފައި އެވެ.
މަސްދަރު: އަލް ޖަޒީރާ
