ވެނެޒުއެލާގެ ބިންހެލުން: އިމާާރާތެއްގެ ދަށުގައި ހަ ދުވަސް ވަންދެން ތާށިވެފައި އޮތް ތުއްތު ކުއްޖަކު ސަލާމަތް ކޮށްފި
1 ޖުލައި 2026 | ބުދަ 06:50އިމާރާތުގެ ކުނި ތަކުގެ ދަށުގައި ތާށިވެފައި އޮތް މި ތުއްތު ކުއްޖާ ފެނިފައި ވަނީ، ޖޯޑަންގެ ސަލާމަތީ ބާރު ތަކުން ބޭނުން ކުރި ތާމަލް އިމޭޖިން ކެމެރާ ތަކުގެ އެހީގައި. މި ޓެކްނޮލޮޖީގެ އެހީގައި ކުނި ތަކުގެ އަޑީގައި އެ ކުއްޖާ އޮތްއިރު، ފުރާނަ ހުރިކަން ވަނީ ދެނެގަނެވިފައި. އެއާ އެކު ރެސްކިއު ޓީމު ތަކުން ވަގުތުން ވަނީ އެ ސަރަހައްދު ކޮނެ، އެ ކުއްޖާ ސަލާމަތް ކުރުމުގެ މަސައްކަތް ފަށާފައި.
ވެއްޓިފައިވާ އިމާރާތުގެ ދަށުގައި ތާށިވެފައި އޮއްވާ ސަަލާމަތް ކުރި ތުއްތު ކުއްޖާ. | ރޮއިޓާސް
ވެނެޒުއެލާގެ ވެރި ރަށް ކަރަކަސް އަށް ޖެހި ޖެހިގެން އައި ބާރުގަދަ ދެ ބިންހެލުމާ ގުޅިގެން ބިމާ ހަމަވި އިމާރާތެއްގެ ދަށުގައި ތާށިވެފައި އޮތް ތުއްތު ކުއްޖަކު ސަލާމަތް ކޮށްފި އެވެ.
ޖޯޑަން އަށް ނިސްބަތްވާ ރެސްކިޔު ޓީމު ތަކުން ސަލާމަތް ކޮށްފައިވާ ތުއްތު ކުއްޖާ އެ އިމާރާތުގެ ދަށުގައި ތާށިވެފައި އޮންނަތާ ހަ ދުވަސް ވެއްޖެ އެވެ. ހަ ދުވަސް ފަހުން އެ ކުއްޖާ ސަލާމަތް ކުރުމަށް ޖޯޑަންގެ ރެސްކިޔު ޓީމުން ވަނީ ބުރަ އަދި ވަރުގަދަ މަސައްކަތް ތަކެއް ކޮށްފައި އެވެ.
އިމާރާތުގެ ކުނި ތަކުގެ ދަށުގައި ތާށިވެފައި އޮތް މި ތުއްތު ކުއްޖާ ފެނިފައި ވަނީ، ޖޯޑަންގެ ސަލާމަތީ ބާރު ތަކުން ބޭނުން ކުރި ތާމަލް އިމޭޖިން ކެމެރާ ތަކުގެ އެހީގައި އެވެ. މި ޓެކްނޮލޮޖީގެ އެހީގައި ކުނި ތަކުގެ އަޑީގައި އެ ކުއްޖާ އޮތްއިރު، ފުރާނަ ހުރިކަން ވަނީ ދެނެގަނެވިފައި އެވެ. އެއާ އެކު ރެސްކިއު ޓީމު ތަކުން ވަގުތުން ވަނީ އެ ސަރަހައްދު ކޮނެ، އެ ކުއްޖާ ސަލާމަތް ކުރުމުގެ މަސައްކަތް ފަށައިފަ އެވެ.
މި ހާދިސާއާ ގުޅޭ ގޮތުން ރެސްކިއު ޓީމުން ބުނީ، ހަ ދުވަސް ވަންދެން އެއްވެސް ކާނާއެއް އަދި ފެނެއް ނެތި އިމާރާތެއްގެ ދަށުގައި އޮތުމަށް ފަހު އެ ކުއްޖާ ސަލާމަތް ވުމަކީ ލިބުނު ވަރަށް ބޮޑު އުންމީދެއް ކަމަށެވެ. ކުއްޖާ ސަލާމަތް ކުރުމަށް ފަހު އިތުރު ފަރުވާއަށް ހާރު ވަނީ ހޮސްޕިޓަލަށް ގެންގޮސްފައި އެވެ.
ވެނެޒުއެލާ އަށް އައި މި ބާރުގަދަ ބިންހެލުން ތަކުގައި މިހާތަނަށް މަރުވި މީހުންގެ އަދަދު ވަނީ 1،700 އަށްވުރެ މައްޗަށް އަރާފައި އެވެ. އަދިވެސް އެތައް ހާސް ބަޔަކު ވީނުވީއެއް ނޭނގި ގެއްލިފައި ވާތީ، މަރުވި މީހުންގެ އަދަދު މިއަށް ވުރެ އިތުރުވުން އެކަށީގެންވާ ކަމަށް ކަމާ ބެހޭ ފަރާތް ތަކުން ލަފާ ކުރެ އެވެ.
ބިންހެލުމުގެ ސަބަބުން ވެނެޒުއެލާގެ ގިނަ އިމާރާތް ތަކެއް ބިމާ ހަމަވެފައިވާއިރު، ވެއްޓިފައިވާ އިމާރާތް ތަކުގެ ދަށުގައި ތާށިވެފައި ތިބި މީހުން ހޯދުމުގެ މަސައްކަތް ބައިނަލްއަގުވާމީ އެހީތެރިކަމާ އެކު ހުއްޓުމެއް ނެތި ދަނީ ކުރަމުންނެވެ. މިގޮތުން ގެއްލިފައިވާ މީހުން ހޯދުމަށް އެކި ގައުމު ތަކުގެ މާހިރުންނާއި، ޒަމާނީ ވަސީލަތްތައް މިހާރު ދަނީ ބޭނުން ކުރަމުންނެވެ.
މަސްދަރު: އަލް ޖަޒީރާ
