ހޮސްޓެޖް އެފެކްޓް: ސިޔާސީ މަޅިއެއްގެ ތެރޭގައި ދިވެހި މުޖުތަމައު ފެތެނީތަ؟

ނަފްސާނީ އިލްމުގެ ތެރޭގައި 'ހޮސްޓެޖް އެފެކްޓް' ނުވަތަ 'ސްޓޮކްހޯމް ސިންޑްރޯމް' އަކީ އިންސާނާގެ ވިސްނުމާއި އިހުސާސްތަކާ ކުޅެލާ ނުރައްކާތެރި އުކުޅެކެވެ. މިއީ މީހަކު ނުވަތަ ބަޔަކު އަނިޔާވެރިކަމެއްގެ ތެރޭގައި ބަންދުކޮށް، އެމީހުންގެ އަސާސީ ހައްގުތަކުން މަހުރޫމްކުރުމަށްފަހު، ކުޑަކުޑަ އޯގާތެރިކަމެއް ދެއްކުމުން އެ އަނިޔާވެރިޔާއަށް ވަފާތެރިވާ ހާލަތެވެ. ދުނިޔޭގެ ސިޔާސީ މަސްރަހުގައި ޑިކްޓޭޓަރުންނާއި ބާރުވެރިން މި އުކުޅު ބޭނުންކުރަނީ ރައްޔިތުންގެ ކިޔަމަންތެރިކަން ހޯދުމަށެވެ.

ދިރާސާކުރާ ފަރާތްތަކުން މިކަން ސިފަކޮށްދިނުމަށް ބާޒެއްގެ މިސާލު ޖަހަ އެވެ. ނުރައްކާތެރި ބާޒެއް ހިފައި ކޮއްޓަކަށްލައި، ހަތް ދުވަސް ވަންދެން ކާނާ އާއި ފެނުން މަހުރޫމް ކުރުމުން އެ ސޫފި މަރުގެ ތުންފަތްމައްޗަށް ދެ އެވެ. އެ ހިސާބުން އެ ބާޒު ހައްޔަރުކުރި މީހާ އައިސް ކުޑަ ފެންފޮދަކާއި މަސްކޮޅެއް ދިނުމުން، ބާޒުގެ ހިތުގައި އެމީހާއަށް އޮންނަ ބިރުވެރިކަން ވަފާތެރި ކަމަށް ބަދަލުވެ އެވެ. ކޮށިން ނެރުމަށްފަހު ވެސް އެ ބާޒު އުޅެނީ އޭނާ ހައްޔަރުކުރި މީހާގެ ފައިބުޑުގަ އެވެ. މިއީ މިއަދުގެ ސިޔާސީ ދާއިރާގައި ވެސް ބައެއް ވެރިން ރައްޔިތުން ކޮންޓްރޯލްކުރަން ބޭނުންކުރާ އުކުޅެކެވެ.

އެގޮތުން ރާއްޖޭގެ އިގްތިސާދީ ހާލަތާއި، ރައްޔިތުންނަށް މިކުރާ ދަތި ކުރުންތަކުން މި މަންޒަރު ފެނިގެންދެ އެވެ. 

މިހާރުގެ ސަރުކާރުގެ ސިޔާސަތުތަކަށް ބަލާއިރު، ރައްޔިތުންނަށް ދިމާވެފައިވާ ދަތިތަކަކީ މި ދެންނެވި ހޮސްޓެޖް އެފެކްޓްގެ ބައެއް ކަމަށް ބުނެވިދާނެ އެވެ. ތަކެތީގެ އަގު އިންތިހާއަށް އުފުލި، ޑޮލަރުގެ ތަދިކަން ކުރިމަތިވެ، އާސަންދައާއި އެންސްޕާގެ އެހީތައް ހަނިކުރެވެމުންދާ ދިއުމަކީ ރައްޔިތުން 'ބަލިކަށި' ކޮށްލުމުގެ ފެށުމެއްގެ ގޮތުގައި ފެނެ އެވެ. ސަރުކާރު މުވައްޒަފުންގެ އިތުރުގަޑީގެ ފައިސާ ކަނޑާލުމާއި ކަރަންޓު ބިލުތައް ބޮޑުވުމުން އާންމު މީހާގެ ދިރިއުޅުން ދަތިވެގެންދާއިރު، އެ ދަތިކަމުގެ ތެރެއިން ކަރަންޓު ބިލުން ދޭ ކުޑަ ޑިސްކައުންޓެއް ނުވަތަ ރޯދަ މަހު ދޭ މަސްދަޅު ކޭހެއްގެ ސަބަބުން ސަރުކާރަށް ވަރަށް ބޮޑަށް ތައުރީފުކުރާ މަންޒަރު ފެނެ އެވެ. މިއީ ހަމަ ބާޒަށް ދިން ފެންފޮދުގެ މިސާލެއްނޫންތޯ އެވެ.

މީގެ އިތުރުން ސިޔާސީ މަގާމުތަކާއި ކުންފުނިތަކުގެ ވަޒީފާތަކުގައި ތިބޭ ފަރާތްތަކާމެދު އަމަލުކުރާ ގޮތުންވެސް މިކަން ފާހަގަވެ އެވެ. ބޮޑެތި ތުހުމަތުތަކާއެކު ވަޒީފާއިން ވަކިކޮށް، އެމީހާގެ ދިރިއުޅުން ބަނގުރޫޓުވާ ހިސާބަށް ގެންދިއުމަށްފަހު، ކުރިން ހުރި މަގާމަށްވުރެ ދަށް މަގާމެއް ދިނުމުން އެމީހާ ވެރިމީހާ އަށް ސަނާކިޔައި ވަފާތެރިވާ މަންޒަރު ވެސް މިދަނީ ފެންނަމުންނެވެ. މިއީ އިންސާނާގެ ކަރާމާތް ނަގާލައި، އޭނާ ގެ ނަފްސާނީ ކޮންޓްރޯލް ވެރިޔާގެ އަތްމައްޗަށް ގެންދިއުމެއްނުންތޯ އެވެ. 

ކޮންމެ ސަރުކާރަކުންވެސް ރައްޔިތުންގެ ލާބައަށް މަސައްކަތްކުރާ ކަމަށް ބުނާއިރު، ހަގީގީ ތަރައްގީއަކީ ރައްޔިތުން ނިކަމެތިކޮށްފައި ދޭ 'ސަދަގާތެއް' ނޫނެވެ. ރައްޔިތުންގެ އަތުން ހުރިހާ ބާރަކާއި ވަސީލަތެއް އަތުލުމަށްފަހު، އޭގެ ތެރެއިން ކުޑަ މިންވަރެއް ދިނުމުން އެއީ ބޮޑު ހެޔޮކަމެއް ކަމަށް ދެކުމަކީ ހޮސްޓެޖް އެފެކްޓްގެ އަސަރެވެ. މިފަދަ ނަފްސާނީ މަޅިތަކުން ސަލާމަތްވެ، ހައްގު މިންވަރަކީ ކޮބައިކަން ދެނެގަތުމަކީ ދިވެހި މުޖުތަމައަށް މިއަދު މަޖުބޫރު ކަމެއްކަމެއްކަން ޔަގީނެވެ.