މި ސަރުކާރާއެކު ކަސްޓަމްސްގައި ވައްކަން އިންތިހާއަށް އިތުރު، އެތައް ކޮންޓެއިނަރއެއް ބޭރުވެެގެން ގޮސްފައިވޭ: މެންބަރު ޣަފޫރު
ކަސްޓަމްސްގެ ތެރެއިން ވަގަށް ކޮންޓެއިނަރުތައް ބޭރުކުރާ ކަމަށް ތުހުމަތުކުރައްވައި، އެއީ ސަރުކާރާ ގުޅިގެން ހިންގާ ބޮޑެތި ޖަރީމާތަކެއްގެ ގޮތުގައި ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލް ޣަފޫރު މޫސާ ވަނީ ސިފަކުރައްވާފައި. ސިނގިރޭޓާއި ވޭޕް ފަދަ ތަކެތި ވަގަށް އެތެރެކުރުން އިތުރުވެ، ދައުލަތަށް ލިބެންޖެހޭ ދެ ބިލިއަނެއްހާ ރުފިޔާގެ އާމްދަނީ އުނިވެފައިވާކަން ފާހަގަކުރައްވައި، އޭނާ ވަނީ މިފަދަ މައްސަލަތައް ތަހުގީގު ނުކުރެވޭތީ ކަންބޮޑުވުން ފާޅުކުރައްވާފައި. އަދި ވޭޕް މަނާކުރުމުގެ ސަބަބުން ވަގު މާކެޓެއް އުފެދި، ދައުލަތުގެ ނިޒާމުން ބޭރުން ބަޔަކަށް ބޮޑު ފައިދާއެއް ލިބެމުންދާ ކަމަށްވެސް އޭނާ ވިދާޅުވި.
ކަސްޓަމްސް ބިލްޑިންގެ ބޭރުން ނަގާފައިވާ ފޮޓޯ އެއް. މަދު ހާލަތެއްގައި އަތުލައިގަނެވޭ ކޮންޓެއިނަރުތަކުގެ މައްސަލަތައް ކުރިއަށް ނުދާ މައްސަލަ ބޮޑު. | ރާއްޖެއެމްވީ
ރައީސް ޑރ.މުހައްމަދު މުއިއްޒުގެ ސަރުކާރާއެކު މޯލްޑިވްސް ކަސްޓަމްސް ސަރވިސްގައި ވެސް ވައްކަން އިންތިހާއަށް އިތުރު ކަމަށާއި، ވަގަށް އެތައް ކޮންޓެއިނަރއެއް ބޭރުވެެގެން ގޮސްފައިވާ ކަމަށް ރައްޔިތުން މަޖިލީހުގެ ހަނިމާދޫ ދާއިރާގެ މެންބަރު އަބްދުލް ޣަފޫރު މޫސާ (ގަޕޯ) ވިދާޅުވެއްޖެ އެވެ.
ރާއްޖެޓީވީގެ ޓީވީޓޯކް ޕްރޮގްރާމްގައި މެންބަރު ޣަފޫރު ވިދާޅުވީ ރައީސް މުއިއްޒުގެ ސަރުކާރު އައިފަހުން މިއިން ދުވަހަކު ވައްކަން ނުހިނގާ މިންވަރަށް ކަސްޓަމްސްގައި ވައްކަން ހިނގާ ކަމަށާއި، ވަގަށް ކޮންޓެއިނަރުތައް ބޭރު ކުރާ ކަމަށެވެ. އަދި މަދު ހާލަތެއްގައި އަތުލައިގަނެވޭ ކޮންޓެއިނަރުތަކުގެ މައްސަލަތައް ވެސް ކުރިއަށް ނުދާ ކަމަށާއި، ވާނުވާ ނޭނގޭ ކަމަށް އޭނާ ވިދާޅުވި އެވެ.
ކަސްޓަމްސްއަށް ބޮޑެތި ތުހުމަތުތައް ކުރެވޭއިރު، މިކަންކަމަކީ ސަރުކާރާ ގުޅިގެން ހިންގާ ބޮޑެތި ޖަރީމާ ކަމަށް އޭނާ ތުހުމަތު ކުރެއްވި އެވެ.
އަޅުގަނޑު ހިސާބު ޖަހަގޮތުގައި އެތައް ކޮންޓެއިނަރ ވަގަށް ބޭރުވެގެން ހިނގައްޖެ. އަދި އަތުލެވުނު ދެ ކޮންޓެއިނަރގެ މައްސަލައަށް ކުރިއަކަށް ނުދޭ. 2 ކޮންޓެއިނަރ ސާޅީސް ފޫޓުގެ އޭގެ މައްސަލައެއް ނުދޭ. ވަގަށް ސިނގިރޭޓް އެތެރެކުރި މީހުންގެ މައްސަލައަށް ކުރިއަކަށް ނުދޭ. އެހެންވީމަ ހަމަ އަޅުގަނޑު ގަބޫލުކުރަނީ ހަމަ ބައި އެޅިގެން ހިނގާ ކަންކަންކަން މީ.ރައްޔިތުން މަޖިލީހުގެ ހަނިމާދޫ ދާއިރާގެ މެންބަރު އަބްދުލް ޣަފޫރު މޫސާ
ސިނގިރޭޓްގެ މައްސަލައަށް އިޝާރާތް ކުރައްވައި މެންބަރު ޣަފޫރު ވިދާޅުވީ ކަސްޓަމްސް އަށް ލިބޭނެ ކަމަށް އަންދާޒާ ކުރި އާމްދަނީ ގާތްގަނޑަކަށް ދެ ބިލިއަން ރުފިޔާ ނުލިބޭ ކަމަށާއި، ނަމަވެސް ރާއްޖެއަށް ސިނގިރޭޓް ބަރާބަރަށް އެތެރެކުރާ ކަމަށެވެ. އެހެންކަމުން މިފައިސާއަށް ވީގޮތް ބަލަން ޖެހޭ ކަމަށް އޭނާ ވިދާޅުވި އެވެ.
ދައުލަތަށް ވަންނަންޖެހޭ އާމްދަނީ ނުވަންނަނީ. ދެން މި ދެ ބިލިއަން ކޮންތާކަށް އެ ދިޔައީ. ރާއްޖޭގެ ހަމަގައިމުވެސް އާބާދީ ހަމަ އިތުރުވަމުން މިދަނީ. ކޮންމެވެސް އަދި ކުޑަ މިންވަރެއްގެ ނަމަވެސް. އަދި ހުއްޓާލައިގެން މީހުންނަށްވުރެ ބޯމީހުންނެއްވެސް މަދެއް ނުވާނެ ހަމަ ސިނގިރޭޓު ވެސް. އެހެންވެއްޖެއްޔާ ނޫނީ އަދި އެހެން އެއްޗެހި ވެސް. އެހެންވެއްޖެއްޔާ އަހަރުން އަހަރަށް އާމްދަނީއަށް ކުރާ އަންދާޒާ ތެރޭގައި އެވަރުގެ ބޮޑެތި ދެ ބިލިއަނުން، ތިން ބިލިއަނުން އެ އާމްދަނީ ނުލިބޭ ހާލަތެއް ނެތޭއެއިރަކު. މިހާރުތާ ތެޔޮ ވެސް އަގުބޮޑުވެގެން ހަނގުރާމަ ފެށިގެން އުޅެނީ. އެކަމަކު މިދިޔަ އަހަރު އެކަމެއް ނެތެއް ނޫންތޯ މި ގައުމުގައި. އެކަމަކު ހަމަ ކަނޑައެޅޭ ހިސާބުން އެ ދައްކާ ދެ ބިލިއަނެއްހާ ރުފިޔާ ކަސްޓަމްގެ އާމްދަނީ އުނިވެފައި އޮތްތަން.ރައްޔިތުން މަޖިލީހުގެ ހަނިމާދޫ ދާއިރާގެ މެންބަރު އަބްދުލް ޣަފޫރު މޫސާ
މީގެ އިތުރުން މެންބަރު ޣަފޫރު ވިދާޅުވީ މިސަރުކާރުން ވޭޕް ބޭން ކޮށްފައިވާއިރު، އެވެސް ރާއްޖެއަށް ވަގަށް އެތެރެކުރާ ކަމަށެވެ. މަދު ފަހަރެއްގައި ކަސްޓަމްސްއިން މިފަދަ ކޮންޓެއިނަރތައް އަތުލައިގަންނަ ކަމަށާއި، ރަނގަޅު ނިޒާމެއްގެ ތެރެއިން މޮނިޓަރ ކުރެވޭފަދަ ގާބިލްކަން ނެތް ކަމަށް އޭނާ ވިދާޅުވި އެވެ.
މެންބަރު ޣަފޫރު ވިދާޅުވީ ވޭޕް ބޭން ކުރުމުގެ ނަތީޖާއެއް ގޮތުން ވަގު މާކެޓެއް އުފެދިފައިވާ ކަމަށާއި، ދައުލަތުގެ ނިޒާމުގެ ބޭރުން ބޮޑު ފައިދާއެއް އެހެން ބަޔަކަށް ލިބޭ ކަމަށެވެ.
މެންބަރު ޣަފޫރު ވިދާޅުވީ މިސަރުކާރުން ފިޔަވަޅުތައް އަޅާއިރު، އެންމެ ފުރަތަމަ ކުރަން ޖެހޭ ކަންކަން ނުކުރާ ކަމަށާއި، ރަނގަޅު ޕްލޭންއަކާ ކަންކަން ކުރިއަށް ނުގެންދާ ކަމަށެވެ.
