ރައްޔިތުންގެ އެންމެ ބޮޑު ކަންބޮޑުވުމަކީ ރައީސް މުއިއްޒު، މިކަމުން ސަލާމަތްވުމަށް އެންމެން އަތުގުޅާލަން ޖެހޭ: މެންބަރު ޒިޔާދު

ދިވެހި ރައްޔިތުންގެ އެންމެ ބޮޑު ކަންބޮޑުވުމަކީ ރައީސް ޑރ.މުހައްމަދު މުއިއްޒު ކަމަށް ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެ އެވެ.

ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގައި ވާހަކަ ދައްކަވަމުން މެންބަރު ޒިޔާދު ވިދާޅުވީ، ދިވެހިންގެ ގިނަ ކަންބޮޑުވުންތަކެއް ހުރި ނަމަވެސް މިއަދު ދިވެހިންގެ އެންމެ ބޮޑު ކަންބޮޑުވުމަކީ ރައީސް މުއިއްޒު ކަމަށެވެ. އަދި މިކަމުން ސަލާމަތްވުމަށް ހުރިހާ ދިވެހި ރައްޔިތުން އަތުގުޅާލަން ޖެހޭ ކަމަށާއި، އެންމެން އެކުގައި މަސައްކަތް ކުރަން ޖެހޭ ކަމަށް މެންބަރު ޒިޔާދު ވިދާޅުވި އެވެ.

މެންބަރު ޒިޔާދު ވިދާޅުވި، ރައީސް މުއިއްޒުގެ ކިބައިން ރައްޔިތުންނާއި ގައުމު ސަލާމަތް ކުރުމަށް ހުރިހާ މެންބަރުންގެ ވެސް އެއްބާރުލުން ބޭނުންވާ ކަމަށެވެ.

ކިތަންމެ ދިގު ޕޯޑިއަމެއް ދިނަސް މި ނޫން ގޮތަކަށް މިވާހަކައެއް ނުދެއްކޭނެ. ޒުވާނުންނަށް މިހާލު ޖެއްސީ ވެސް ޕީއެންސީން. ދެން މިއަދު ގޮތް ހުސް ވެގެން ރަނގަޅު ކުރަން އުޅެނީ. ސިނގިރޭޓް ރަނގަޅު ކޮށްގެން މިކަން ވާކަށް ނެތް އިއްޒަތްތެރި ރައީސް. ދިވެހިންގެ އެންމެ ބޮޑު ކަންބޮޑުވުމަކީ މިއަދު ރައީސް މުއިއްޒު. މިކަމުން ސަލާމަތްވާން ހުރިހާ ދިވެހި ރައްޔިތުން އަތުގުޅާލަން ޖެހޭ ކަމުގައި. އަޅުގަނޑު އެދެނީ ހުޅުމާލޭގެ ހުރިހާ މެންބަރުން ވެސް މިކަމުގައި ބައިވެރިވާނެ ކަމަށް

ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު

މެންބަރު ޒިޔާދު މިމޭރުމުން ވާހަކަ ދެއްކެވިއިރު، ކެންދޫ ދާއިރާގެ މެންބަރު މައުރޫފު ޒާކިރު ވެސް ވަނީ ރައީސް މުއިއްޒަށް ވަރަށް ބޮޑަށް ފާޑު ވިދާޅުވެފަ އެވެ. އަދި ވިދާޅުވީ ރައީސް މުއިއްޒު ވެރިކަމަށް އައުމަށް ގިނަ ވައުދުތަކެއް ވެވަޑައިގެންނެވި ކަމަށެވެ. ނަމަވެސް މިއަދާ ހަަމައަށް ރައްޔިތަކަށް އެއްވެސް ފައިދާއެއް ނުވާ ކަމަށް މެންބަރު މައުރޫފު ވިދާޅުވި އެވެ. 

މީގެ އިތުރުން މެންބަރު މައުރޫފު ވިދާޅުވީ ދިވެހި ރައްޔިތުން ރައީސް މުއިއްޒުގެ ވެރިކަން ބަލައި ނުގަންނަ ކަމަށާއި، މާދަމާ ވެސް ގޮވާލާފިނަމަ މިވެރިކަން ވައްޓާލަން ގިނަ ދިވެހި ރައްޔިތުން ނުކުންނާނެ ކަމަށެވެ. 

ދިވެހި ރައްޔިތުން މި ވެރިކަމެއް ބަލައެއްނުގަނެއޭ. މާދަމާ ވެސް އަޅުގަނޑުމެން ގޮވާލީމާ ނުކުމެ މި ވެރިކަން ވައްޓާލަން ތައްޔާރަށް ދިވެހި ރައްޔިތުން އެ ތިބީ އިއްޒަތްތެރި ރައީސް. މި ވެރިކަން ބަލައެއް ނުގަނޭ. ރައީސް ވެސް ދެން ވިސްނަންވީ. އަނެއްކާވެސް އާ ލީޑަރަކު ގެނެސްގެން ޕީ.އެންސީއަށް ނުވަތަ އަޅުގަނޑުމެންނަށް ތަފާތު ޚިޔާލެއް، ފިކުރަށް ރަނގަޅު ލީޑަރެއް ހޯދައިގެން 2028 އަށް އާދެވޭތޯ. ރައީސް މުއިއްޒަށް އިތުބާރެއް ނެތް. 

ކެންދޫ ދާއިރާގެ މެންބަރު މައުރޫފު ޒާކިރު

މެންބަރު މައުރޫފު ވިދާޅުވީ، ރައީސް މުއިއްޒުގެ ސަރުކާރާއެކު  ގައުމުގެ މާލީ ހާލަތާއި އިގްތިސާދީ ހާލަތު އަދި އިޖުތިމާއީ އެއްވެސް ކަމެއް ހަމައަކަށް ނޭޅޭ ކަމަށާއި، މިއަދު ރައްޔިތަކަށް ހެޔޮ އެދިގެން މިސަރުކާރުން އެއްވެސް ކަމެއް ކުރާނެ ކަމަށް ގަބޫލުނުކުރާ ކަމަށެވެ. 

އެހެންކަމުން ރައީސް މުއިއްޒުގެ ވެރިކަން ބަދަލުކުރަން ޖެހޭ  ކަމަށް މެންބަރު މައުރޫފު ވިދާޅުވި އެވެ.