ހަނިމާދޫއަށް ހިރިމަރަދޫގެ ރައްޔިތުން ބަދަލުކުރާ ކަމަށް ބުނެ، މިސަރުކާރުން ދަނީ ދެރަށުގެ ރައްޔިތުން ނިކަމެތި ކުރަމުން: ކައުންސިލް

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ހދ. ހަނިމާދޫ އަށް ހިރިމަރަދޫގެ ރައްޔިތުން ބަދަލުކުރާ ކަމަށް ބުނެ، ދެ ރަށުގެ ރައްޔިތުން ނިކަމެތި ކުރަމުން ގެންދާ ކަމަށް އެރަށުގެ ކައުންސިލުން ބުނެފި އެވެ. 

ހުކުރު ދުވަހުގެ ފަށާއިރު ޕްރޮގްރާމްގައި އެރަށުގެ ކައުންސިލްގެ ރައީސް އަލީ އިބްރާހިމް ވަނީ ހަނިމާދޫ އަށް ހިރިމަރަދޫ ރައްޔިތުން ބަދަލު ކުރުމުގެ މަސައްކަތުގައި ސަރުކާރުން އަމަލު ކުރާ ގޮތުން ކަންބޮޑުވުން ފާޅު ކޮށްފަ އެވެ. 

އަލީ ވިދާޅުވީ ހިރިމަރަދޫގެ ރައްޔިތުން ހަނިމާދޫ އަށް ބަދަލު ކުރުމުގެ މަސައްކަތުގައި މިސަރުކާރުގެ އެއްވެސް އިހުލާސްތެރިކަމެއް ނެތް ކަމަށާއި، މިހާރު އަމަލު ކުރަމުންދާ ގޮތުން ދެ ރަށުގެ ރައްޔިތުން ވެސް ވަރަށް ބޮޑަށް ނިކަމެތިވަމުންދާ ކަމަށެވެ.

އަލީ ވިދާޅުވީ ހަނިމާދޫ އަށް ހިރިމަރަދޫގެ ރައްޔިތުން ބަދަލުވާއިރު، ރިސޯސްތައް ގާއިމްވާން ޖެހޭ ކަމަށާއި، ނަމަވެސް އެއްވެސް މަސައްކަތެއް ކުރިއަށް ނުދާ ކަމަށެވެ. މި މަސައްކަތް ކުރުމަށް ބަޖެޓު ވެސް ނުދޭ ކަމަށް އޭނާ ވިދާޅުވި އެވެ.

މީގެ ކުރިން މިމަސައްކަތްތައް ވަކި ޕްލޭނެއްގެ ދަށުން ކުރިއަށް ދިޔަކަން ފާހަގަކުރައްވައި އަލީ ވިދާޅުވީ އޭރު ހުންނެވީ ސިޓީ މިނިސްޓަރު އާދަމް ޝަރީފް އުމަރު ކަމަށާއި، މިހާރު ވާނުވާ ނޭނގޭ ކަމަށެވެ. ހަނިމާދޫ އާއި ހިރިމަރަދޫ ރައްޔިތުން ހިމެނޭ ގޮތަށް ސަރުކާރުގެ ބޭފުޅުންނާއެކު ކޮމެޓީއެއް ހަދަން އެއްބަސްވެފައި އޮތް ނަމަވެސް ކޮމެޓީ ވެސް މިހާތަނަށް ހަދާފައިނުވާ ކަމަށް އޭނާ ވިދާޅުވި އެވެ. 

ރައީސުލްޖުމްހޫރިއްޔާ އެކަން ނިންމުމާ ހިސާބުން އަސްލު އަޅުގަނޑުމެންނާ ހިސާބަށް މިދިޔަ ދައުރުގައި އައީ އޭރުގެ ސިޓީ މިނިސްޓަރު އާދަމް ޝަރީފް ތެދެއްތޯ. އަސްލު އެބޭފުޅާ ވަރަށް ރަނގަަޅަށް އެމަސައްކަތް ކުރަން އައީ. އިހުލާސްތެރިކަމާއެކު އެކަން ކުރަން ޖެހޭ ގޮތަށް. އަޅުގަނޑުމެން އިރުޝާދު ވެސް ދިނީ މިކަން ކުރަން ޖެހޭނީ މިހެންނޭ. ދެން އަޅުގަނޑުމެންނާ ވާހަކަ ދައްކާފައި ބައްދަލުވުންތައް ބޭއްވިއިރުގަ އަޅުގަނޑުމެންނާ އެއްބަސްވެވުނީ ވެސް ހަނިމާދޫގައި 500 ހައުސިންގ އަކާއި، އަދި ހަނިމާދޫގައި 200 ގެވަޅުގައި ގެ އެޅޭނެ އިންތިޒާމާއި، އަދި ހަނިމާދޫގައި 200 ގެއަށް ފެނާއި ނަރުދަމާ އާއި ކަރަންޓު ލެވޭނެ އިންތިޒާމާއި އަދި ސްކޫލުގައި މަދުވެފައި ހުރި ކްލާސްރޫމްތަކާއި ހޮސްޕިޓަލާއި މިހުރިހާ މަސައްކަތެއް ހިނގަމުން ދާނޭ ހިރިމަރަދޫ ރައްޔިތުންގެ 184 ގެ އަޅަމުންދާއިރު. އެއީ ހިރިމަރަދޫ ރައްޔިތުން ވެސް މިރަށަށް ބަދަލުވީމަ އެ ރައްޔިތުން ވެސް ވާނީ މިރަށުގެ ރައްޔިތުންނަށޭ. އެހެންވީމަ ރަށެއްގެ ރައްޔިތުން ބަދަލުވާއިރު އެއަންނަ ރަށަކަށް އަންނަން ޖެހޭނޭ ތަރައްގީގެ ކަންތައްތަކެއް. އެބޭފުޅުން އަންނަނީ އެރަށް ކަމު ނުގޮސްގެން ނޫނީ ރިސޯސްތައް މަދުވީމަ.   

ހަނިމާދޫ ކައުންސިލްގެ ރައީސް އަލީ އިބްރާހިމް

އަލީ ވިދާޅުވީ ހިރިމަރަދޫގެ ރައްޔިތުންނަކީ ހަނިމާދޫގެ ރައްޔިތުންގެ ގޮތުގައި ކަނޑައެޅި ނަމަވެސް މި ރައްޔިތުން ބަދަލު ކުރުމަށް ކުރަން ޖެހޭ އެއްވެސް މަސައްކަތެއް ނުވަތަ މިމަސައްކަތް ކުރުމަށް ސަރުކާރުގެ ފަރާތުން އެއްބާރުލުން ނުލިބޭ ކަމަށެވެ. އަދި މި ސަރުކާރުން އަތޮޅު ކައުންސިލްތައް އުވާނުލިނަމަ  އަތޮޅު ކައުންސިލުން އެ ޒިންމާ ނަގައިގެން މިމަސައްކަތް ކުރާނެ ކަމަށް އޭނާ ވިދާޅުވި އެވެ. 

ހިރިމަރަދޫގެ ރައްޔިތުން ހިރިމަރަދޫގައި ތިއްބާ، އެމީހުންނަކީ ހަނިމާދޫ ރައްޔިތުން ކަމަށް ރައީސް މުއިއްޒު ހަމަޖެއްސެވީ 30 ޑިސެންބަރު 2025 ގަ އެވެ.