ރާއްޖެއިން މިހާރު ޑޮލަރު ހޯދަން މަސައްކަތް ކުރާ ކޮންމެ ރައްޔިތެއް ނަފްސާނީ ވާނެ: މެންބަރު ނާޒިލް
ރާއްޖޭގެ އިގްތިސާދީ ސިޔާސަތުތަކަށް ފާޑުވިދާޅުވަމުން ހިތަދޫ ދެކުނު ދާއިރާގެ މެންބަރު ނާޒިލް ވިދާޅުވީ، ބޭންކުތަކުން ޑޮލަރާއި ޔޫރޯ ލިބުން ދަތިވުމުގެ ސަބަބުން އާންމު ރައްޔިތުންނާއި ވިޔަފާރިވެރިންނަށް ބޮޑެތި ތަކުލީފުތަކެއް ކުރިމަތިވަމުންދާ ކަމަށް. އެމްއެމްއޭގެ އާ ގަވާއިދާއެކު ރިސޯޓު މުވައްޒަފުންނަށް ޑޮލަރުން މުސާރަ އާއި ސާވިސް ޗާޖު ލިބުން ހުއްޓި، ބާޒާރުގައި ޑޮލަރު ދައުރުވުން މަދުވެފައިވާކަން އޭނާ ފާހަގަކުރެއްވި. މީގެ އިތުރުން، އިގްތިސާދީ ހީނަރުކަމެއްގައި އޮތް ދަނޑިވަޅެއްގައި ޑިވެލޮޕްމަންޓް ބޭންކާއި ބަންކަރިން ފަދަ ކަންކަމަށް ސަރުކާރުން ބޭކާރު ހަރަދުތަކެއް ކުރަމުންދާ ކަމަށް ވެސް މެންބަރު ނާޒިލް ތުހުމަތު ކުރެއްވި.
ރައްޔިތުން މަޖިލީހުގެ ޖަލްސާއެއްގައި ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް ވާހަކަ ދައްކަވަނީ. | ރައްޔިތުންގެ މަޖިލިސް
ދިވެހިރާއްޖެއިން މިހާރު ޑޮލަރު ހޯދަން މަސައްކަތް ކުރާ ކޮންމެ ރައްޔިތަކު ނަފްސާނީ ވާނެ ކަމަށް ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެންބަރު އަދި އެމްޑީޕީ ޕާލިމެންޓްރީ ގްރޫޕްގެ ލީޑަރު އިބްރާހިމް ނާޒިލް ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މެންބަރު ނާޒިލް ވަނީ ރައީސް މުއިއްޒުގެ ސަރުކާރާއެކު އިގްތިސާދު އަނދަވަޅަކަށް ވައްޓާލާފައިވާކަން ފާހަގަކުރައްވައި ވަރަށް ބޮޑަށް އިގްތިސާދީ ސިޔާސަތުތަކަށް ފާޑު ވިދާޅުވެފަ އެވެ.
މެންބަރު ނާޒިލް ވިދާޅުވީ މިގައުމުން ޑޮލަރު ނުލިބޭ ކަމަށާއި، ޑޮލަރު ހޯދަން މަސައްކަތް ކުރާ ރައްޔިތު މީހާ ނަފްސާނީ ވާނެ ކަމަށެވެ. އަދި ވިދާޅުވީ ބޭސް ފަރުވާއަށް ރާއްޖެއިން ބޭރަށް ދާ މީހުން ވެސް ޑޮލަރު ހޯދަނީ ވަރަށް ތަކުލީފުން، ބޮޑު އަގުގައި ކަމަށެވެ.
ވިޔަފާރިވެރިންނާ ހަވާލާ ދެއްވައި މެންބަރު ނާޒިލް ވިދާޅުވީ މިހާރު ބޭންކު މެދުވެރިކޮށް ޔޫރޯ ވެސް ޑޮލަރު ވެސް އަދި އެހެނިހެން ކަރަންސީއެއް ވެސް ނުލިބޭ ކަމަށެވެ. ނަމަވެސް މީގެ ކުރިން ވިޔަފާރިތަކަށް ވަރަށް ފަސޭހައިން ބޭންކް މެދުވެރިކޮށް ޔޫރޯ އާއި ޑޮލަރު ލިބޭ ކަމަށް ވިޔަފާރިވެރިން ބުނާ ކަމަށް މެންބަރު ނާޒިލް ވިދާޅުވި އެވެ.
މި ޑޮލަރު ހޯދަން ނުކުމެ އުޅޭ މީހަކު ހަގީގަތުގައި ވެސް މިއަދު ދިވެއްސަކު ވެއްޖެއްޔާ ރާއްޖޭގައި ހަމަ ނަފްސާނީ ވެފައި ހުންނާނީ. ފުރާ ދުވަސް ޖެހެނީ. ޓިކެޓު ނަގާފައި އޮތް ދުވަސް ކައިރި ވަނީ. ޑޮލަރެއް ނުލިބޭ. ގޮސްފައި ދެން ފަރުވާ ހޯދޭނެ ގޮތެއް ނެތް ޑޮލަރު ނުލިބެނީސް.ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެންބަރު އަދި އެމްޑީޕީ ޕާލިމެންޓްރީ ގްރޫޕްގެ ލީޑަރު އިބްރާހިމް ނާޒިލް
މިސަރުކާރުގެ ސިޔާސަތުތަކަށް އިޝާރާތް ކުރައްވައި މެންބަރު ނާޒިލް ވިދާޅުވީ އެމްއެމްއޭއަށް ރިިސޯޓުތަކުން ޑޮލަރު މާރުކުރަން މަޖުބޫރު ކުރުމާއެކު، ރިސޯޓު މުވައްޒަފުންނަށް ޑޮލަރު ނުލިބޭ ކަމަށާއި، ސަރވިސް ޗާޖު ދޭން ފެށީ ދިވެހި ރުފިޔާއިން ކަމަށެވެ. އަދި ރިސޯޓުތަކުގައި އަމިއްލަ ކުންފުނިތަކުން ނުވަތަ އަމިއްލަ މީހުން ކުރާ މަސައްކަތްތަކަށް ޑޮލަރު ބިލް ކުރި ނަމަވެސް މިހާރު ބިލްތަކަށް ދެނީ ދިވެހި ރުފިޔާ ކަމަށެވެ.
ނަތީޖާއެއް ގޮތުން ރަށު ތެރޭގައި ދައުރުވާ ޑޮލަރު ހުއްޓުމަކަށް އައީ ކަމަށާއި، ހުރިހާ ގެއްލުމެއް ލިބުނީ އާއްމު ރައްޔިތުންނަށް ކަމަށް މެންބަރު ނާޒިލް ވިދާޅުވި އެވެ.
މީގެ އިތުރުން މެންބަރު ނާޒިލް ވިދާޅުވީ ޑޮލަރުގެ މައްސަލައަށް ރަނގަޅު ހައްލެއް ހޯދައި ނުދެވުނުއިރު، ޑިވަލޮޮޕްމަންޓް ބޭންކެއް އުފައްދައި ބޭކާރު ޙަރަދުތަކެއް ކޮށްފައިވާ ކަމަށެވެ. އަދި ދެ ބޯޓެއް ގެނެސް، ބަންކަރިންގެ ޚިދުމަތް ތައާރަފްކޮށް ވެސް އިސްރާފު ކޮށްފައިވާ ކަމަށް މެންބަރު ނާޒިލް ވިދާޅުވި އެވެ.
މެންބަރު ނާޒިލް ވިދާޅުވީ ސަރުކާރުގެ މިފަދަ އަމަލުތަކުގެ ސަބަބުން ރާއްޖޭގެ އިގްތިސާދަށް ވަރަށް ބޮޑަށް ގެއްލުން ވަމުންދާ ކަމަށެވެ.
