ރައީސް މުއިއްޒުގެ އެ ވިދާޅުވާ ސްޕީޑްގައި ކުރިއަށް ދާ މަޝްރޫއުއަކީ ހިއްކާ ސަރަހައްދުތައް ގިރުމުގެ މަޝްރޫއު: ޑީޑީ
ރައީސް މުއިއްޒުގެ ސަރުކާރުގައި ތަރައްގީގެ މަޝްރޫއުތައް ހުއްޓި، ގައުމުގެ އިގްތިސާދީ ހާލަތު ދަށަށްދާތީ ޑީޑީ ވަނީ އެކަމުގެ ކަންބޮޑުވުންފާޅު ކުރައްވާފައި. މި ސަރުކާރުގެ ސިޔާސަތުތަކުގެ ސަބަބުން ޑޮލަރުގެ ރޭޓު މަތިވެ، ކުދި ވިޔަފާރިތައް ބަނގުރޫޓުވަމުންދާއިރު، ހިއްކާފައިވާ ބިންތައް ހިމާޔަތް ނުކުރެވި ގިރަމުންދާ މައްސަލަ ބޮޑު ކަމަށް އޭނާ ވިދާޅުވި. އެހެންކަމުން ރައްޔިތުންގެ އާމްދަނީއަށް ހުރަސްއެޅޭ މިފަދަ ސިޔާސަތުތަކާ ދެކޮޅަށް ރައްޔިތުން ނުކުންނަންޖެހޭ ކަމަށް ޑީޑީ ވިދާޅުވި.
ރާއްޖެޓީވީގެ ފަލަސުރުހީ ޕްރޮގްރާމެއްގައި އެމްޑީޕީގެ ކުރީގެ ރައީސް ޑރ.އިބްރާހިމް ދީދީ (ޑރ.ޑީޑީ) ވާހަކަ ދައްކަވަނީ. | ސްކްރީން އިމޭޖް
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ އެ ވިދާޅުވާ ސްޕީޑްގައި ކުރިއަށް ދާ މަޝްރޫއުއަކީ ހިއްކާ ސަރަހައްދުތައް ގިރުމުގެ މަޝްރޫއު ކަަމަށް އެމްޑީޕީގެ ކުރީގެ ރައީސް ޑރ. އިބްރާހިމް ދީދީ (ޑީޑީ) ވިދާޅުވެއްޖެ އެވެ.
ބުދަ ދުވަހު ރޭގެ "ފަލަސުރުޚީ" ޕްރޮގްރާމްގައި ޑީޑީ ވަނީ ރައީސް ޑރ.މުހައްމަދު މުއިއްޒު ވެރިކަމަށް ވަޑައިގެންނެވުމަށް ވެވަޑައިގެންނެވި ވައުދުފުޅާއި، މިހާރު އަމަލު ކުރައްވާ ގޮތަށް މުޅިން ތަފާތުކަން ފާހަގަކުރައްވައި މި ސަރުކާރަށް ވަރަށް ބޮޑަށް ފާޑު ވިދާޅުވެފަ އެވެ. އަދި ތަރައްގީގެ މަޝްރޫއުތައް ހުއްޓިފައިވާތީ އެކަމުގެ ކަންބޮޑުވުންފާޅު ކުރެއްވި އެވެ.
ޑީޑީ ވިދާޅުވީ މި ސަރުކާރާއެކު ގައުމު ހުއްޓިފައިވާ ކަމަށާއި، ކުރިއަށް ނުދާ ކަމަށެވެ.
ތަރައްގީގެ މަޝްރޫއުތަކަށް އިޝާރާތް ކުރައްވައި ޑީޑީ ވިދާޅުވީ މިސަރުކާރުގައި ހިއްކާފައިވާ ސަރަހައްދުތަކާއި، ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ރަށްރަށުން ހިއްކާފައިވާ ބިންތައް ހިމާޔަތް ނުކުރެވި ގިރަމުންދާ ކަމަށެވެ. އަދި ރައީސް މުއިއްޒު އެ ވިދާޅުވާ ސްޕީޑްގައި ކުރިއަށްދާ ހަމައެކަނި މަޝްރޫއުއަކީ ހިއްކާފައިވާ ސަރަހައްދުތައް ގިރުމާއި، ޑޮލަރުގެ ރޭޓު މަތިވުން ކަމަށް އޭނާ ވިދާޅުވި އެވެ.
މީގެ އިތުރުން ޑީޑީ ވިދާޅުވީ ތަރައްގީގެ މަޝްރޫއުތައް ކުރިއަށް ގެންދިއުމުގައި ވެސް ތިމާވެއްޓަށް ވެސް ބެލުމެއް ނެތް ކަމަށެވެ.
މިސާލަކަށް ދަންނަވާ ކަމަށްވަންޏާ އައްޑޫގައި ރައީސް ސޯލިހުގެ ސަރުކާރުން ފަތުރުވެރިކަން ކުރިއަށް ގެންދިއުމަށްޓަކައި ދެ ފަޅު ހިއްކާފައި ރިސޯޓު ހަދަން ދެ ފަޅު ހިއްކާފައި އޮތް. އެހެންނަމަވެސް އެއިން އެއްވެސް ޕްރޮޖެކްޓެއް ކުރިއަށް ނުގެންދެވޭ. ހަމަ މުއިއްޒުގެ ސްޕީޑްގައި ގިރަމުން މިދަނީ އެދަނީ. މުއިއްޒު ސްޕީޑްގައި އެދާ ޕްރޮޖެކްޓްތަކުގެ ތެރޭގައި ހިމެނޭ ހިއްކާފައި ހުރި ތަންތަން ގިރަމުން ދިއުންވެސް އެނގޭތޯ. ދެން ޑޮލަރުގެ ރޭޓް މައްޗަށް ދިއުމާއި، މިއީ ހަގީގަތުގައި މުއިއްޒުގެ ސްޕީޑްގައި ކުރިއަށް ދާ މައިގަނޑު ދެ ކަންތަކަކީ.އެމްޑީޕީގެ ކުރީގެ ރައީސް ޑރ. އިބްރާހިމް ދީދީ
މީގެ އިތުރުން ޑީޑީ ވިދާޅުވީ ގައުމު ކުރިއެރުމަށްޓަކައި މިސަރުކާރުގެ ސިޔާސަތުތައް ބަދަލު ކުރަންޖެހޭ ކަމަށާއި، މިހާރު މިއޮތް ސިޔާސަތާއެކު ރައްޔިތުން ނިކަމެތި ވަމުންދާ ކަމަށެވެ.
މިސަރުކާރު ނުވަންނަ ވިޔަފާރިއެއް ނެތްކަން ފާހަގަކުރައްވައި ޑީޑީ ވިދާޅުވީ އައިޖީއެމްއެޗްގައި އައިނު ވިއްކާ ފިހާރައެއް ހޮޅުވާފައިވާއިރު، ފަތުރުވެރިކަމުގެ ސިނާއަތަށް ވެސް ހައްޖު ކޯޕްރޭޝަން ވަދެފައިވާ ކަމަށެވެ. ޑީޑީ ވިދާޅުވީ ރައީސް މުއިއްޒު ވެރިކަމަށް ވަޑައިގެންނެވީ ކުދި އަދި މެދު ފަންތީގެ ވިޔަފާރިތަކަށް ފަހި ފުރުސަތުތައް ފަހިކޮށް ދިނުމަށް ކަމަށެވެ. ނަމަވެސް އެއްވެސް ކަހަލަ ފަހި ފުރުސަތެއް ނުލިބި، ވިޔަފާރިތައް އިދަ ޖެހި، ބަނގުރޫޓް ވަމުންދާ ކަމަށް އޭނާ ވިދާޅުވި އެވެ.
އެހެންކަމުން ރައްޔިތުންގެ އާމްދަނީ ހުއްޓެމުންދާ މިސިޔާސަތުތަކާ ދެކޮޅަށް ރައްޔިތުން ނުކުންނަން ޖެހޭ ކަމަށް ޑީޑީ ވިދާޅުވި އެވެ.
