ރައީސް މުއިއްޒުގެ ސަރުކާރަށް ދެއަހަރު ވެގެންދިޔައިރު ތިބީ ޅެން ހެދުމަށާއި، ބުޅާ ބެލެހެއްޓުމަށް މިނިސްޓްރީ ހަދައިގެން ބޭކާރު ހަރަދުތައް ކުރަން: އަމްރު
28 ޖޫން 2026 | އާދީއްތަ 06:41ވޯލްޑް ބޭންކުގެ ރިޕޯޓަށް ރިއާޔަތްކޮށް، ދައުލަތުގެ ހަރަދުތައް ކުޑަކުރުމަށް އެސްޓީއޯގެ ކުރީގެ އެމްޑީ އަމްރު ސަރުކާރަށް ވަނީ ގޮވާލައްވާފައި. ސިޔާސީ މުވައްޒަފުންނާއި މިނިސްޓްރީތައް އިތުރުކޮށް ބޭކާރު ހަރަދުތައް ކުރަމުންދާކަން ފާހަގަކުރައްވައި، މިކަންކަން އިސްލާހުނުކޮށްފިނަމަ ރައްޔިތުންނަށް ބޮޑެތި ދަތިތަކާ ކުރިމަތިލާންޖެހޭނެ ކަމަށް އޭނާ ވިދާޅުވި. އެހެންކަމުން އިގްތިސާދީ ހަމަޖެހުމަށް ވޯލްޑް ބޭންކުގެ އިރުޝާދުތަކާ އެއްގޮތަށް އަމަލުކުރުން މުހިންމު ކަމަށް އަމްރު ފާހަގަކުރެއްވި.
ރައީސުލްޖުމްހޫރިއްޔާ ޑރ.މުހައްމަދު މުއިއްޒު، ވަޒީރުންނާއެކު ބޭއްވެވި ބައްދަލުކުރެއްވުމެއްގެ ތެރެއިން. | ރައީސް އޮފީސް
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރަށް ދެއަހަރު ވެގެންދިޔައިރު ތިބީ ޅެން ހެދުމަށާއި، ބުޅާ ބެލެހެއްޓުމަށް މިނިސްޓްރީ ހަދައިގެން ބޭކާރު ހަރަދުތައް ކުރަން ކަމަށް އެސްޓީއޯގެ ކުރީގެ މެނޭޖިންގ ޑިރެކްޓަރ ހުސައިން އަމްރު ވިދާޅުވެއްޖެ އެވެ.
ރާއްޖެޓީވީގެ ޓީވީޓޯކް ޕްރޮގްރާމްގައި އަމްރު ވަނީ ވޯލްޑް ބޭންކުން އާންމު ކޮށްފައިވާ "މޯލްޑްވިސް ޑިވެލޮޕްމަންޓް އަޕްޑޭޓް" ރިޕޯޓަށް އިޝާރާތް ކުރައްވައި ވާހަކަ ދައްކަވާފަ އެވެ. ރިޕޯޓުގައި ފާހަގަކޮށްފައިވާ ގޮތަށް އާމްދަނީ އިތުރު ކުރުމަށް، ހަރަދުތައް ކުޑަ ކުރަންޖެހޭ ކަމަށް އޭނާ ވިދާޅުވި އެވެ.
ރައީސް މުއިއްޒުގެ ސަރުކާރަކީ ބޭކާރު ހަރަދު ކުރާ ސަރުކާރެއްކަން ފާހަގަކުރައްވައި އަމްރު ވިދާޅުވީ ވޯލްޑް ބޭންކު ރިޕޯޓުގައި ފާހަގަަކޮށްފައިވާ ގޮތަށް ކޮންމެ މަހަކު ދައުލަތުން ކުރާ ހަރަދު ކުޑަ ކުރަން ޖެހޭ ކަމަށެވެ.
އެގޮތުން ސިޔާސީ މުވައްޒަފުންނަށް ކުރާ ހަރަދާއި، މުލިއާ ގެއަށް ކުރާ ހަރަދާއި، މިނިސްޓްރީތަކަށް ކުރާ ހަރަދުގެ އިތުރުން އެހެނިހެން ކުންފުނިތަކަށް ކުރާ ބޭކާރު ހަރަދު ހުއްޓާލަން ޖެހޭ ކަމަށް އަމްރު ވިދާޅުވި އެވެ. އަދި މިސަރުކާރަށް ދެ އަހަރު ވެގެންދިޔައިރު ވެސް، ގައުމާއި، ރައްޔިތުންނަށް ފައިދާވާ ގޮތަށް މަސައްކަތެއް ނުކުރެވުނު ނަމަވެސް ޅެން ހެދުމަށާއި، ބުޅާ ބެލެހެއްޓުމަށް މިނިސްޓްރީ އެއް ހަދައި ބޭކާރު އެތައް ހަރަދެއް ކޮށްފައިވާ ކަަމަށް އޭނާ ވިދާޅުވި އެވެ.
އެނގިވަޑައިގަންނަވާނެ ދެ އަހަރު ވެގެން ދިޔައިރު ޅެން ހަދަން މިނިސްޓްރީއެއް ހަަދައިގެން ތިބީ. ބުޅާ ބަލަހައްޓަން މިނިސްޓްރީއެއް ހަދައިގެން ތިބީ. ކައުންސިލްތައް ބަލަހައްޓާށޭ ކިޔާފައި މިނިސްޓްރީއެއް ހަދައިގެން ތިބީ. އަޅުގަނޑުމެން އޭރު ވެސް ގޮވަމުން ދިޔައިން ތިކަން ނުކުރާށޭ. ކޮންމެ މިނިސްޓްރީއަކަށް 70 ނުވަތަ 80 ސިޔާސީ މުވައްޒަފުން ނަގައިގެން. މީގެ ކުރިން އެމްޑީޕީގެ ވެރިކަމުގައި ފިޒަރީޒް އެންޑް އެގްރިކަލްޗަރ ކިޔާ މިނިސްޓްރީއެއް އިންނާނެ. އެއް މިނިސްޓްރީ. އެ މިނިސްޓްރީގައި ތިބީ ބަރާބަރު 14 މުވައްޒަފުން ސިޔާސީ މުވައްޒަފުން. އެހެންނަމަވެސް މިސަރުކާރު އައިސްފައި ރައީސް މުއިއްޒު ވަކިކޮށްލެއްވީ އެގްރިކަލްޗަރ މިނިސްޓްރީ ވަކިން ފިޝަރީޒް މިނިސްޓްރީ ވަކިން. ކޮންމެ މިނިސްޓްރީއެއްގައި 70 ސިޔާސީ މީހުން.އެސްޓީއޯގެ ކުރީގެ މެނޭޖިންގ ޑިރެކްޓަރ ހުސައިން އަމްރު
އަމްރު ވިދާޅުވީ މިސަރުކާރުން ކުރާ ބޭކާރު ހަރަދުތައް ހުއްޓާނުލާ ނަމަ ނުވަތަ ސިޔާސީ މުވައްޒަފުންގެ އަދަދު މަދުނުކޮށް ކުރިއަށް ގެންދާނަމަ ގައުމާއި ރައްޔިތުންނަށް ވަރަށް ބޮޑަށް އުދަނގޫވެ، ނިކަމެތިކަން ކުރިމަތިވާނެ ކަމަށެވެ. އަދި ވޯލްޑް ބޭންކު ދީފައިވާ އިރުޝާދުތަކާއެކު އެގޮތަށް އަމަލު ކުރުމަށް އޭނާ ގޮވާލެއްވި އެވެ.
