އިހަވަންދޫގައި ހޮސްޕިޓަލް: އަމަލީ އެއްވެސް މަސައްކަތެއް ކުރިއަށް ނުދިޔަ ނަމަވެސް ކޮނެފައިވާ ވަޅުގަނޑުގައި ބޮއް އާލާވޭ!
އިހަވަންދޫ ހޮސްޕިޓަލުގެ މަސައްކަތް ހުއްޓި، ކޮނެފައިވާ ވަޅުގަނޑުގައި ފެންހެދި ބޮއް އާލާވަމުންދާތީ އެ ދާއިރާގެ ކުރީގެ މެންބަރު ޝިފާއު ވަނީ ކަންބޮޑުވުން ފާޅުކުރައްވާފައި. ކުރީގެ ސަރުކާރުން ބަޔަކާ ހަވާލުކޮށްގެން ކުރިއަށްގެންދިޔަ މި މަޝްރޫއު މި ސަރުކާރުން ހުއްޓުވުމަށް ފަހު، އާރްޑީސީއާ އަލުން ހަވާލުކުރި ނަމަވެސް އަމަލީ އެއްވެސް މަސައްކަތެއް ނުހިނގާކަމަށް އޭނާ ވިދާޅުވި. މިއީ ރައީސް މުއިއްޒުގެ ރިޔާސީ ވައުދުފުޅަކަށް ވީނަމަވެސް، މިހާރު ފެންނަނީ ރަށުގެ ސިއްހީ ނިޒާމަށް ސަރުކާރުން އިހުމާލުވަމުންދާ މަންޒަރު ކަމަށް ޝިފާއު ފާހަގަކުރެއްވި.
ރާއްޖެޓީވީގެ ވައުދުނާމާ ޕްރޮގްރާމްގައި ރައްޔިތުން މަޖިލީހުގެ އިހަވަންދޫ ދާއިރާގެ ކުރީގެ މެންބަރު މުހައްމަދު ޝާފިއު ވާހަކަ ދައްކަވަނީ. | ރާއްޖެއެމްވީ
ރައީސް ޑރ. މުހައްމަދު މުއިއްޒުގެ ސަރުކާރުން ހއ. އިހަވަންދޫގައި ހޮސްޕިޓަލެއް ތަރައްގީ ކުރުމަށް ކޮނެފައިވާ ވަޅުގަނޑުގައި ފެންހެދި، ބޮއް އާލާވަމުންދާ ކަމަށާއި، ހޮސްޕިޓަލް ގެ އަމަލީ މަސައްކަތް ކުރިއަށް ނުދާ ކަމަށް ރައްޔިތުން މަޖިލީހުގެ އިހަވަންދޫ ދާއިރާގެ ކުރީގެ މެންބަރު މުހައްމަދު ޝިފާއު ވިދާޅުވެއްޖެ އެވެ.
ރާއްޖެޓީވީގެ ވައުދުނާމާ ޕްރޮގްރާމްގައި ކުރީގެ މެންބަރު ޝިފާއު ވަނީ މިސަރުކާރަށް ވަރަށް ބޮޑަށް ފާޑު ވިދާޅުވެފަ އެވެ. އަދި ވިދާޅުވީ މިސަރުކާރުން އިހަވަންދޫ އަށް ވަރަށް ބޮޑަށް އިހުމާލުވަމުންދާ ކަަމަށާއި، އެރަށުގެ ސިއްހީ ނިޒާމު ރަނގަޅު ކުރަން ޖެހޭ ކަމަށެވެ.
އިހަވަންދޫގެ ހޮސްޕިޓަލް ގެ މަޝްރޫއަށް އިޝާރާތް ކުރައްވައި ޝިފާއު ވިދާޅުވީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ހޮސްޕިޓަލް ތަރައްގީ ކުރުމަށް ކުންފުންޏަކާ ހަވާލު ކުރި ކަމަށެވެ. ނަމަވެސް ސަރުކާރު ބަދަލުވެގެން ދިއުމާއެކު، އެމަސައްކަތް ހުއްޓާލުމަށް ހެލްތް މިނިސްޓްރީން ކޮންޓްރެކްޓަރަށް އެންގި ކަމަށް އޭނާ ވިދާޅުވި އެވެ.
މީގެ އިތުރުން ޝިފާއު ވިދާޅުވީ މިސަރުކާރުން ހޮސްޕިޓަލް ގެ މަސައްކަތް ފެށި ކަމަށާއި، ބޮޑު ވަޅުގަނޑެއް ކޮނެފައިވާ ކަމަށެވެ. އަދި މިހާރު އެވަޅުގަނޑުގައި ފެން ހެދި ބޮއް އަލާވަމުންދާ ކަމަށާއި، ހޮސްޕިޓަލް ގެ މަސައްކަތް ކުރިއަށް ނުދާ ކަމަށެވެ.
ރައީސް އިބްރާހިމް މުހައްމަދު ސޯލިހުގެ ވެރިކަން ނިމުނުއިރުގަ އިހަވަންދޫގެ ރައްޔިތުން އެންމެ ބޮޑަށް އުންމީދު ކުރަމުން އައީ އެއްކަންތައް މިއީ ހޮސްޕިޓަލެއް އެރަށުގައި ގާއިމް ކުރުން. ހޮސްޕިޓަލް ގެ މަސައްކަތް ބަޔަކާ ކޮންޓްރެކްޓް ކުރެވި އަމަލީ މަސައްކަތް ފަށާފައި އޮތީ އެނގޭތޯ. މިވެރިކަން ބަދަލުވުމާއެކު މަސައްކަތް ހުއްޓުވާލި. ކޮންޓްރެކްޓަރަށް ހަމަ ސީދާ ހެލްތް މިނިސްޓްރީން އަންގައިގެން މަސައްކަތް ހުއްޓުވާލާ ކޮށްފައި ހުރި މަސައްކަތަށް ވެލިއަޅާ ފޮރުވާލީ. ފޮރުވާލާފައި ރައްޔިތުން މަޖިލިސް އިންތިޚާބުގެ ކެންޕޭނަށް ވެގެން އަނެއްކާ ވެސް ހުސް ގަނޑެއްގައި ސޮއި ކުރުވީ އާރްޑީސީ މީހުން ލައްވާ. ހޮސްޕިޓަލް ގެ މަސައްކަތް ހަވާލުކުރި ކަމަށް. މިއަދު އެބަ އޮތް އެތަން ކޮނެފައި. ކޮނެފައި އޮތް ފެންގަނޑަކީ ބޮއް އާލާކުރާ ފެންގަނޑެއް. ފުދޭވަރަކަށް ރަނގަޅަށް އެތަނުގައި ބޮއް އެބައޮތް އެތަނުގައި އެނގޭތޯ. އެނޫން ކަމެއް ނެތް އެތާގައި.ރައްޔިތުން މަޖިލީހުގެ އިހަވަންދޫ ދާއިރާގެ ކުރީގެ މެންބަރު މުހައްމަދު ޝާފިއު
ޝިފާއު ވިދާޅުވީ އިހަވަންދޫގައި ހޮސްޕިޓަލެއް ތަރައްގީ ކުރުމަކީ ރައީސް މުއިއްޒުގެ ރިޔާސީ ވައުދުފުޅެއް ކަމަށެވެ. އަދި އެމަނިކުފާނުގެ ވެރިކަމުގެ ފުރަތަމަ އަހަރު މިމަޝްރޫއުގެ މަސައްކަތް ނިންމާނެ ކަމަށް ވައުދުވެފައިވާ ކަމަށް އޭނާ ވިދާޅުވި އެވެ.
އިހަވަންދޫގައި ތަރައްގީކުރާ ހޮސްޕިޓަލު އިމާރާތްކުރުމުގެ މަސައްކަތް ކުރީ ސަރުކާރުން 2023 ވަނަ އަހަރުގެ ޖަނަވަރީ މަހުގެ ތެރޭގައި ހަވާލުކުރީ ޑުޕްލެކްސް ޕްރައިވެޓް ލިމިޓެޑް ކުންފުންޏާ އެވެ. ނަމަވެސް މަސައްކަތް ކުރިއަށް ނުގެންދާ ކަމަށް ބުނެ، މިސަރުކާރުން ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)އާ މިމަޝްރޫއު ހަވާލުކުރީ 29 ޖެނުއަރީ 2025 ގަ އެވެ.
123 މިލިއަނަށްވުރެ ގިނަ ރުފިޔާ މިމަޝްރޫއަށް ހޭދަވާއިރު، އިހަވަންދޫގައި ތަރައްގީ ކުރަން ނިންމާފައި ވަނީ 30 އެނދުގެ ހޮސްޕިޓަލެކެވެ. އަދި މި ހޮސްޕިޓަލްގައި އެކޮމޮޑޭޝަން ބްލޮކަކާއި އެހެނިހެން ޚިދުމަތްތައް ފޯރުކޮށްދިނުމަށް ބޭނުންވާ އިމާރާތެއް ވެސް ތަރައްގީ ކުރާނެ ކަމަށް ސަރުކާރުން ބުނެ އެވެ.
