އީރާނަށް އަލުން ހަމަލާދޭން ތައްޔާރު: އިސްރާއީލު

ބޭނުންވެއްޖެ ހާލަތެއްގައި އީރާނާ ދެކޮޅަށް ކުރަމުންދާ އަސްކަރީ ހަރަކާތްތައް އަލުން ފެށުމަށް އެ ގައުމު އޮތީ ތައްޔާރަށް ކަމަށާއި، އެކަން ކުރާނީ ކުރިއަށްވުރެ ވަރުގަދަ ބާރަކާއެކު ކަމަށް އިސްރާއީލުގެ ދިފާއީ ވަޒީރު އިސްރާއީލް ކާޓްޒް ބުރާސްފަތި ދުވަހު ވިދާޅުވެއްްޖެ އެވެ.

އިސްރާއީލުގެ ދިފާއީ ވަޒީރު މިހެން ވިދާޅުވެފައި މިވަނީ، އެމެރިކާ އާއި އީރާނާ ދެމެދު އަލުން ކުރިމަތިލުންތައް ފެށިފައިވާ ދަނޑިވަޅެއްގަ އެވެ. މިއާއެކު، މިދިޔަ އޭޕްރީލް މަހު ގާއިމުކުރި ހަމަލާބަދަލުކުރުން ހުއްޓާލުމުގެ އެއްބަސްވުމާއި، ހަނގުރާމަ ނިމުމަކަށް ގެނައުމަށް ޖޫން މަހު އެމެރިކާ އާއި އީރާނާ ދެމެދު ވެވުނު އެއްބަސްވުމަށްފަހު، އަނެއްކާވެސް ފުރިހަމަ ހަނގުރާމައަކަށް ބަދަލުވެދާނެކަމުގެ ބިރު ވަނީ ބޮޑުވެފަ އެވެ.

އަސްކަރީ ރަސްމިއްޔާތެއްގައި ވާހަކަދައްކަވަމުން ކާޓްޒް ވިދާޅުވީ، ވައިގެ ސަރަހައްދުގެ ފުރިހަމަ ބާރު ހޯދުމަށާއި، އީރާނަށް އަލުން ހަމަލާދީ ކުރިމަތިވެފައިވާ ނުރައްކާތައް ނައްތާލުމަށްޓަކައި، އަސްކަރިއްޔާ އޮތީ ހަނގުރާމަ އަލުން ފެށުމަށް ފުރިހަމައަށް ތައްޔާރުވެ، އެލާޓްގައި ކަމަށެވެ. އަދި ބޭނުންވެއްޖެ ނަމަ ތިންވަނަ ފަހަރަށް ވެސް ހަމަލާދޭނެ ކަމަށް އޭނާ ވިދާޅުވި އެވެ.

މީގެ އިތުރުން އޭނާ ވިދާޅުވީ، އަލުން ހަނގުރާމައަށް އެނބުރި ދާން ޖެހިއްޖެ ނަމަ، އެނބުރި ދާނީ ކުރިއަށްވުރެ މާ ވަރުގަދަ ބާރަކާއެކު ކަމަށެވެ.

އެ ރަސްމިއްޔާތުގައި ވާހަކަދައްކަވަމުން ބޮޑުވަޒީރު ބެންޖަމިން ނަތަންޔާހޫ ވިދާޅުވީ، އިސްރާއީލުން އީރާނާ ދެކޮޅަށް ކުރިއަށްގެންދިޔަ ކުރީގެ ދެ އަސްކަރީ ހަރަކާތުގެ ސަބަބުން އީރާނު ވަނީ ބަލިކަށިވެފައި ކަމަށެވެ.

ނަމަވެސް، މި ކުރިމަތިލުންތައް އަދި މުޅިން ނިމުމަކަށް ނާންނަކަމަށް ނަތަންޔާހޫ އިއުތިރާފުވެވަޑައިގެންނެވި އެވެ.

ނަތަންޔާހޫ ވިދާޅުވީ، އީރާނުގެ އިއްތިހާދު ކުރިއަށްވުރެ ބަލިކަށިވެފައިވާއިރު، އިސްރާއީލު އޮތީ ކުރިއަށްވުރެ މާ ވަރުގަދަކޮށް ކަމަށެވެ.

އަދި ޔަމަނުން ފެށިގެން އީރާނާ ހަމައަށް ކޮންމެ ތަނަކަށް ވެސް އިސްރާއީލުގެ ވައިގެ ސިފައިންގެ އަތް ފޯރާނެކަން ސާބިތުކޮށްދީފައިވާ ކަމަށާއި، އެހެންނަމަވެސް މި ހަރަކާތްތައް އަދި ނުނިމޭކަން ގަބޫލުކުރަންޖެހޭ ކަމަށް އޭނާ ވިދާޅުވި އެވެ.

މި ހަނގުރާމަ ފެށުނީ މިދިޔަ ފެބްރުއަރީ މަހުގެ 28 ވަނަ ދުވަހު، އެމެރިކާ އާއި އިސްރާއީލު ގުޅިގެން އީރާނާ ދެކޮޅަށް ފެށި ވައިގެ ހަމަލާތަކާ އެކުގައެވެ. އެ ހަމަލާތަކުގައި އީރާނުގެ އެންމެ މަތީ ލީޑަރާއި އެ ގައުމުގެ އިސް އޮފިޝަލުންތަކެއް ވަނީ އަވަހާރަކޮށްލާފަ އެވެ.

މިއީ 2025 ވަނަ އަހަރުގެ ޖޫން މަހު ކުރި 12 ދުވަހުގެ ހަނގުރާމައަށްފަހު، އީރާނާ ދެކޮޅަށް އިސްރާއީލުން ހިންގި ދެވަނަ އަސްކަރީ ހަރަކާތެވެ.