ގަލްފުގެ މަސްރަހާ ބެހޭ މައުލޫމާތު ޓްރަމްޕް ނަތަންޔާހޫއަށް ހިއްސާކުރައްވައިފި

އީރާނަށް އެމެރިކާއިން އާ ހަމަލާތަކެއް ދީފައިވާ ކަމަށް ރިޕޯޓްތައް ބުނަމުންދަނިކޮށް، ގަލްފް ސަރަހައްދުގައި އެމެރިކާއިން ހިންގަމުންދާ އަސްކަރީ އޮޕަރޭޝަންތަކާ ބެހޭ މައުލޫމާތު، އެމެރިކާގެ ރައީސް ޑޮނަލްޑް ޓްރަމްޕް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއަށް ބުރާސްފަތި ދުވަހު އަރުވައިފި ކަމަށް ބޮޑުވަޒީރުގެ އޮފީހުން ބުނެފި އެވެ.

ދެ ބޭފުޅުންގެ ދެމެދުގައި އޮންނަ މެދުނުކެނޑޭ ގުޅުމުގެ ތެރެއިން، ގަލްފް ސަރަހައްދުގައި އެމެރިކާއިން އަޅަމުންދާ ފިޔަވަޅުތަކާ ބެހޭ އެންމެ ފަހުގެ މައުލޫމާތު ރައީސް ޓްރަމްޕް ބޮޑުވަޒީރާ ހިއްސާކުރައްވާފައިވާ ކަމަށް، އެކްސްގައި ނަތަންޔާހޫގެ އޮފީހުން އާންމުކުރި މެސެޖެއްގައި ބުނެފައިވެ އެވެ.

އެމެރިކާގެ އޮފިޝަލަކު ވެސް ވަނީ ބުރާސްފަތި ދުވަހު މި ފޯނު ކޯލް ކުރިއަށްދިޔަކަން ކަށަވަރުކޮށްދީފައެވެ. ނަމަވެސް އެ ކޯލާ ގުޅޭ އިތުރު ތަފްސީލެއް އެ އޮފިޝަލް ދެއްވާފައެއް ނުވެ އެވެ.

އެކްސްގައި ކުރި އެ ޕޯސްޓުގައިވާ ގޮތުން، ތުރުކީއާ މެދު އޮތް ކަންބޮޑުވުންތައް ވެސް އިސްރާއީލުގެ ލީޑަރު ވަނީ ވައިޓް ހައުސްއާ ހިއްސާކުރައްވާފަ އެވެ. އެގޮތުން ތުރުކީގެ ރައީސް ރަޖަބް ތައްޔިބް އުރުދުޣާން އާއި އެގައުމުގެ އިސްވެރިން، އިސްރާއީލު ދައުލަތުގެ ދެމިއޮތުމާ ދެކޮޅަށް ވާހަކަދައްކަވާ ކަމަށާއި، އިސްރާއީލުގެ ބޯޑަރުތަކުގައި ސަލާމަތީ ސަރަހައްދުތަކެއް ގާއިމުކުރުމުގެ މުހިންމުކަމާ ބެހޭގޮތުން ވެސް ނަތަންޔާހޫ ވާހަކަދެއްކެވި އެވެ.

އެމެރިކާގެ އެފް-35 މަރުކާގެ ހަނގުރާމަމަތީ ބޯޓުތަކާއި އޭގެ ބައިތައް އަންކާރާއަށް ވިއްކުމަކީ ސަރަހައްދީ ބާރުގެ ތަރާދަށް ބަދަލު އަންނާނެ ކަމެއް ކަމަށް ބުނެ އިސްރާއީލުން ދައްކާ ވާހަކަތަކަކީ "ދޮގު މައުލޫމާތު" ކަމަށް ބުނެ ރައީސް އުރުދުޣާން އަންގާރަ ދުވަހު ވަނީ އެ ވާހަކަތައް ދޮގުކުރައްވާފަ އެވެ.

ނޭޓޯގެ ބައިވެރިއެއް ކަމަށްވާ ތުރުކީއަށް އެފް-35 މަރުކާގެ ޖެޓުތައް ނުވިއްކުމަށް ނަތަންޔާހޫ ވަނީ ހޯމަ ދުވަހު އެމެރިކާއަށް ބާރުއަޅުއްވާފަ އެވެ.

އީރާނާއެކު ކުރަމުންދާ ހަނގުރާމަ މެނޭޖްކުރުމާ މެދު ޓްރަމްޕާއި ނަތަންޔާހޫއާ ދެމެދު ވަނީ ނުތަނަވަސްކަން އުފެދިފަ އެވެ. މި ހަނގުރާމައިގެ ސަބަބުން ތެލާއި މުދަލުގެ އަގު އިންތިހާއަށް އުފުލިފައިވާއިރު، މީގެ ސިޔާސީ ގެއްލުން އެމެރިކާގެ ރައީސަށް ދަނީ ކުރިމަތިވަމުންނެވެ.

ވޯލް ސްޓްރީޓް ޖާނަލްއިން ބުރާސްފަތި ދުވަހު ނަން ހާމަނުކުރާ މަސްދަރުތަކާ ހަވާލާދީ ރިޕޯޓްކޮށްފައިވާ ގޮތުގައި، ޓްރަމްޕް އަވަހާރަކޮށްލުމަށް އީރާނުން އާ ރޭވުމެއް ރާވަމުންދާކަން އިސްރާއީލުގެ އިންޓެލިޖެންސަށް ފާހަގަކުރެވިފައިވާ ކަމަށް އިސްރާއީލުން ވަނީ އެމެރިކާއަށް އަންގާފަ އެވެ.

ޓްރަމްޕްގެ ފުރަތަމަ ދައުރުގައި އެމެރިކާއިން އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) ގެ ޖެނެރަލް ގާސިމް ސުލައިމާނީ އަވަހާރަކޮށްލި ހާދިސާއާ ގުޅިގެން، ޓްރަމްޕްގެ ކިބައިން ބަދަލުހިފާނެ ކަމަށް އީރާނުން ވަނީ ފާޅުގައި ބުނެފަ އެވެ.

މިދިޔަ ފެބްރުއަރީ މަހުގެ 28 ވަނަ ދުވަހު އެމެރިކާ އާއި އިސްރާއީލު ގުޅިގެން ދޭން ފެށި ހަމަލާތަކުގައި އީރާނުގެ އެންމެ މަތީ ލީޑަރު އަލީ ޚާމަނާއީ އަވަހާރަކޮށްލުމާ ގުޅިގެން، ބަދަލުހިފުމަށް ތެހެރާނުން ގޮވާލާ ގޮވާލުންތައް ވަނީ ކުރިއަށްވުރެ ބޮޑަށް ވަރުގަދަވެފަ އެވެ.